Read Iban Pemansut 24 Bible Online

Pemansut 24 - Iban bible

Pemansut 24

¹TUHAN lalu bejaku ngagai Moses, “Niki ke atas ngagai Aku ba bukit tu, nuan enggau Aron, Nadap, Abihu, enggau tujuh puluh iku tuai orang Israel; lalu lebuh kita agi jauh, meremi lalu nyembah.

²Semina nuan siku aja tau datai semak ngagai Aku. Sida ke bukai enda tau datai semak ngagai Aku, lalu orang mayuh enda tau niki ngagai bukit tu.”

³Moses datai lalu madahka ngagai orang mayuh semua pesan TUHAN, enggau semua adat Iya. Semua orang mayuh lalu nyaut sama sereta, ku sida, “Kami deka ngereja semua utai ti udah disebut TUHAN.”

⁴Moses lalu nuliska semua pesan TUHAN. Tumu pagi hari siti, iya ngaga siti alta ba kaki bukit nya, lalu ngerintaika dua belas igi batu, sigi ke siti-siti raban bansa orang Israel ti dua belas bengkah nya.

⁵Udah nya iya ngasuh orang ke bujang datai lalu sida nunu piring ke TUHAN, lalu ngenjuk sekeda jelu sapi nyadika piring pemaik.

⁶Moses ngambi setengah ari darah jelu nya, lalu nyimpan darah nya dalam mangkuk, lalu setengah diunsaika iya ngagai alta.

⁷Udah nya iya ngambi bup sempekat TUHAN, lalu macha bup nya enggau nyawa ti inggar ngagai orang mayuh. Lalu ku orang mayuh bejaku, “Kami deka ngasika TUHAN, lalu deka ngereja semua utai ti udah diasuh Iya kereja kami.”

⁸ Udah nya Moses lalu ngambi darah ti dalam mangkuk nya, lalu ngunsaika darah nya ngagai orang mayuh. Ku iya, “Tu darah kena nanggam sempekat ti udah digaga TUHAN enggau kita, lebuh Iya meri semua pesan tu.”

⁹Moses, Aron, Nadap, Abihu enggau tujuh puluh iku bala tuai orang Israel lalu niki ngagai bukit nya

¹⁰lalu sida meda Allah Taala ke disembah orang Israel. Di baruh kaki Allah Taala bisi utai ti baka geladak ti digaga ari batu nilam, ti biru baka langit.

¹¹Allah Taala enda ngerusak bala tuai bansa orang Israel tu. Sida meda Allah Taala, lalu udah nya sida makai ngirup.

¹²Ku TUHAN bejaku ngagai Moses, “Niki ke atas ngagai Aku ba bukit tu, lalu lebuh nuan ditu, Aku deka meri ngagai nuan dua iti lampang batu ti udah alai Aku nuliska semua adat kena ngajar orang mayuh.”

¹³Moses, enggau Josua ti nyadi penulung iya, angkat lalu Moses niki ngagai bukit ti kudus nya.

¹⁴Ku Moses bejaku enggau bala tuai orang mayuh, “Kita diau ditu, nganti pemulai kami duai Josua. Aron enggau Hur bisi ditu enggau kita. Enti kita bisi pekara diputarka, kita tau betemu enggau seduai iya.”

¹⁵Moses lalu niki ngagai Bukit Sinai, ti dibalut mua hari.

¹⁶Mulia TUHAN lalu datai ba Bukit Sinai, lalu mua hari mungkur bukit nya enam hari; ba hari ti ketujuh TUHAN ngangauka Moses ari mua hari nya.

¹⁷Nyadi orang Israel meda mulia TUHAN nya baka api ti mau ba tuchung bukit nya.

¹⁸ Moses tama ngagai mua hari nya lalu niki ngagai bukit nya, lalu diau dia empat puluh hari empat puluh malam.