Read Iban Pemansut 25 Bible Online

Pemansut 25 - Iban bible

Pemansut 25

¹Ku TUHAN bejaku ngagai Moses,

²“Asuh orang Israel meri siti pemeri ngagai Aku. Terima aja semua pemeri ti deka diberi orang mayuh.

³Pemeri nya nyengkaum emas, pirak, enggau temaga,

⁴kain linin ti alus, bulu bedus ti bechura biru, ungu enggau mirah, kain ti digaga ari bulu kambin,

⁵kulit bedus ti lelaki, ti udah dichat mirah, kulit jelu ti udah dialuska, kayu akasia,

⁶minyak lampu, rempah kena ngaga minyak tata, enggau kena ngaga menyan ti bebau rengut,

⁷batu unam enggau batu berega ti bukai, ti deka diengkahka ba epod[31] Imam Besai, enggau ba terabai dada iya.

⁸Orang Israel enda tau enda ngaga Langkau TUHAN ke Aku, ngambika Aku diau enggau sida.

⁹Gaga langkau sembiang enggau semua pekekas iya, nitihka pelan ti ditunjukka Aku ngagai nuan.

¹⁰“Gaga siti Peti ari kayu akasia. Pemanjai peti nya 110 sentimeter, buka iya 66 sentimeter, lalu peninggi iya 66 sentimeter.

¹¹Sampak iya enggau emas ti tulin ari dalam enggau ari luar, lalu gaga lilit ari emas ti tulin ba semua tisi iya.

¹²Gaga empat iti chengkerung ari emas ti tulin kena mai Peti nya, lalu lekatka chengkerung nya ngagai empat iti kaki Peti nya, dua iti chengkerung ba tisi sepiak-sepiak.

¹³Gaga kayu kena ngesan peti nya ari kayu akasia. Sampak kayu nya enggau emas,

¹⁴lalu rasukka kayu nya ngagai chengkerung ti ba tisi Peti nya sepiak-sepiak.

¹⁵Kayu ti dikena ngesan Peti nya enda tau enda ditejuka dalam chengkerung nya, lalu nadai tau diambi ari nya.

¹⁶Udah nya, simpan dalam Peti nya dua iti lampang batu ti deka diberi Aku ngagai nuan, ti alai pesan ditulis.

¹⁷ “Gaga tudung ari emas ti tulin. Pemanjai iya 110 sentimeter, lalu buka iya 66 sentimeter.

¹⁸Gaga ari emas ti ditempa dua iku melikat cherub ti besayap,

¹⁹siku ba puting setak, lalu siku ba puting setak. Tempa seduai nya selajur enggau tudung nya, ari siti tekang emas.

²⁰Melikat cherub ti besayap dua iku nya betunga mua enggau pangan diri, lalu sayap seduai iya enda tau enda ngerembai mungkur tudung Peti nya.

²¹Engkahka lampang batu dua iti nya dalam Peti nya, lalu tudung iya.

²²Aku deka betemu enggau nuan dia, lalu ari atas tudung ti ba entara dua iku melikat cherub ti besayap nya, Aku deka meri ngagai nuan semua Adat Aku, ke orang Israel.

²³“Gaga siti mija ari kayu akasia. Pemanjai iya 88 sentimeter, buka iya 44 sentimeter, lalu peninggi iya 66 sentimeter.

²⁴Sampak mija nya enggau emas ti tulin, lalu gaga lilit ngelingi tisi mija nya.

²⁵Gaga bingkai 7.5 sentimeter buka ngelingi mija nya, lalu gaga lilit ngelingi bingkai nya.

²⁶Gaga empat iti chengkerung emas ke mija nya, kena ngesan iya, lalu engkahka chengkerung nya ba empat iti sukut mija nya, ba kaki mija nya.

²⁷Chengkerung ti alai ngerasukka kayu kena ngesan mija nya enda tau enda diengkah semak bingkai mija nya.

²⁸Gaga kayu ti dikena ngesan mija nya ari kayu akasia, lalu sampak kayu nya enggau emas.

²⁹Gaga chapak, mangkuk, kebuk, enggau mangkuk ti dikena ngenjuk piring wain. Semua utai tu enda tau enda digaga ari emas magang.

³⁰ Mija nya enda tau enda diengkah di mua Peti Lampang Batu Adat, lalu ba atas mija nya enda tau enda seruran bisi roti ti kudus ti diberi ngagai Aku.

³¹“Gaga siti penuduk lampu ari emas ti tulin. Gaga burit iya enggau batang iya ari emas ti ditempa. Bungai ti dikena ngias iya, nyengkaum kuntum bungai enggau serindak bungai, enda tau enda digaga selajur ari emas siti nya aja.

³²Enam iti dan deka pansut ari tisi penuduk lampu nya, tiga iti ari sepiak-sepiak.

³³Genap iti dan nya enda tau enda bisi tiga iti bungai kena ngias iya. Bungai nya digaga baka gamal bungai almon, sama enggau kuntum enggau serindak bungai.

³⁴Batang penuduk lampu nya enda tau enda bisi empat iti bungai kena ngias iya, lalu bungai nya digaga baka gamal bungai almon, lalu bisi kuntum enggau serindak bungai.

³⁵Di baruh siti gerempung dan, enda tau enda bisi siti kuntum bungai.

³⁶Kuntum bungai, dan, enggau penuduk lampu nya enda tau enda digaga ari siti aja lampang emas ti ditempa.

³⁷Gaga tujuh iti lampu ke penuduk lampu nya, lalu awakka lampu nya manchar ke mua.

³⁸Gaga sepit enggau talam ke penuduk lampu nya ari emas ti tulin

³⁹Ambi 34 kilogram emas ti tulin kena kita ngaga penuduk lampu enggau semua pekekas tu.

⁴⁰ Kita enda tau enda ngaga utai nya enggau bejimat nitihka pelan ti udah ditunjukka Aku ngagai nuan ba bukit nya.