Read Iban Pemansut 26 Bible Online

Pemansut 26 - Iban bible

Pemansut 26

¹“Gaga langkau sembiang nya ngena sepuluh lambar kain linin ti alus, ti ditenun ari bulu bedus ti bechura biru, ungu enggau mirah. Sulam kain linin nya enggau gambar bala melikat cherub ti besayap.

²Genap lambar kain nya sebaka pemesai magang. Pemanjai lambar nya 14 meter, lalu buka iya 2 meter.

³Jait lima iti kain nya betangkir nyadi siti ladang, lalu jait lima iti kain ti bukai baka nya mega.

⁴Gaga rambing ari kain ti biru ba tisi siti-siti ladang.

⁵Gaga lima puluh iti rambing ba kain ti terubah ba ladang ti keterubah, enggau lima puluh iti rambing ti besenentang enggau rambing ba kain ti pemadu tisi ba ladang ti kedua.

⁶Gaga lima puluh iti pengait emas kena bejantilka dua iti bidang kain nya nyadi siti langkau sembiang.

⁷“Gaga tudung ke langkau sembiang nya ngena sebelas lambar kain ti digaga ari bulu kambin.

⁸Gaga semua kain nya sebaka pemesai, lima belas meter pemanjai, enggau dua meter buka.

⁹Jait lima lambar kain nya nyadi siti ladang, lalu enam lambar ti bukai nyadi ladang siti da agi. Lipatka dua lambar kain ti keenam ba atas mua Langkau Kain nya.

¹⁰Engkahka lima puluh iti rambing ba tisi lambar ti penudi, dalam siti-siti ladang, enggau lima puluh iti rambing ba tisi bidang ti siti.

¹¹Gaga lima puluh iti pengait temaga, lalu engkahka pengait nya ba rambing nya, kena bejantilka dua iti ladang kain nya, ngambika dua iti ladang nya nyadi siti tudung.

¹²Awakka setengah lambar ti laluh, kating-kating ari belakang langkau sembiang nya.

¹³Lima puluh sentimeter ti lebih nya ditejuka kating-kating ba tisi langkau sembiang nya, kena map iya.

¹⁴Gaga dua iti agi tudung, siti ari kulit bedus ti lelaki, dichat mirah, lalu siti digaga ari kulit jelu, ti digaga alus, nyadika tudung ti di luar.

¹⁵“Gaga langkar ke langkau sembiang nya ari kayu akasia.

¹⁶Siti-siti langkar nya enda tau enda 4 meter pemanjai, lalu buka iya 66 sentimeter,

¹⁷lalu bisi dua iti cherebut, ngambika siti-siti papan nya tau dipejantilka enggau papan ti bukai. Semua papan nya enda tau enda bisi cherebut magang.

¹⁸Gaga dua puluh singkap papan ke langkar langkau sembiang, ke tisi ti muak ke selatan

¹⁹enggau empat puluh iti pelasar ti digaga ari pirak. Pelasar tu deka diengkah di baruh papan langkar nya, dua iti ke siti-siti papan, kena ngetanka cherebut ti dua iti nya.

²⁰Gaga dua puluh iti papan ke langkar langkau sembiang nya, ke tisi ti muak ke utara

²¹enggau empat puluh iti pelasar ti digaga ari pirak, dua iti di baruh siti-siti papan langkar nya.

²²Ke tisi belakang ti muak ke barat, ke langkau sembiang nya, gaga enam iti papan ke langkar iya,

²³enggau dua iti papan ke langkar sukut iya di belakang.

²⁴Papan ke langkar ti ba sukut tu enda tau enda bejantil belabuh ari kaki nyentuk ke puchuk. Papan ke langkar ti dikena ngaga sukut dua iti tu, enda tau enda digaga ngena chara nya.

²⁵Nya alai, lapan iti papan diguna nyadika langkar, enggau enam belas iti pelasar ti digaga ari pirak, dua iti di baruh siti-siti papan langkar nya.

²⁶“Gaga lima belas iti alang dinding ari kayu akasia, lima iti nyadi langkar ke siti-siti tisi ke langkau sembiang nya,

²⁷lima iti langkar tisi ti setiban enggau nya, enggau lima iti langkar ke tisi ti muak ke barat, ke langkau sembiang nya di belakang.

²⁸Alang dinding tengah, ti diengkah melintang semua papan langkar nya, deka digaga ngenyauh nya ke atas, ngenyauh nya ke baruh, lalu digaga belabuh ari ujung siti nyentuk ngagai ujung siti dalam langkau sembiang nya.

²⁹Sampak semua papan langkar ke Langkau Kain nya enggau emas, lalu gaga chengkerung emas alai ngerasukka alang dinding nya. Alang dinding nya pen enda tau enda mega disampak enggau emas.

³⁰Dirika langkau sembiang nya nitihka pelan ti udah ditunjukka Aku ngagai nuan ba bukit nya.

³¹“Gaga siti tirai ari kain linin ti alus, ti ditenun ari bulu bedus ti bechura biru, ungu enggau mirah. Sulamka gambar bala melikat cherub ti besayap ba kain tirai nya.

³²Gantung tirai nya ari empat batang tiang ti digaga ari kayu akasia, ti disampak enggau emas, ti bisi pengait, lalu didudukka ba atas empat iti pelasar ti digaga ari pirak.

³³ Engkahka kain tirai nya ari baruh garis pengait ti ba perabung Langkau Kain nya, lalu engkahka Peti Lampang Batu Adat ti ngundan dua iti lampang batu nya, ari belakang tirai nya. Kain tirai nya deka nyeraraka Endur ti Kudus ari Endur ti Pemadu Kudus.

³⁴Engkahka tudung ba Peti Lampang Batu Adat nya.

³⁵Di luar Endur ti Pemadu Kudus, engkahka mija dalam langkau sembiang nya ngimbai tisi utara, lalu penuduk lampu nya diengkahka ngimbai tisi selatan.

³⁶“Ke penama ngagai Langkau Kain nya, gaga sebidang kain tirai ti ditenun ngena ubung linin, ubung bulu bedus ti bechura biru, ungu enggau mirah, lalu dilagu ngena sulam.

³⁷Kena ngantung kain tirai tu, gaga lima batang tiang, ari kayu akasia, disampak enggau emas, lalu bisi dilekatka pengait emas. Gaga lima iti pelasar temaga, ke lima batang tiang tu.