Read Iban Pemansut 27 Bible Online

Pemansut 27 - Iban bible

Pemansut 27

¹“Gaga siti alta ari kayu akasia. Mija nya enda tau enda besegi empat. Pemanjai iya 2 meter, buka iya 2 meter, lalu peninggi iya 1 meter.

²Gaga tanduk ba empat iti sukut alta nya. Tanduk empat iti nya enda tau enda digaga selajur ari kayu ti dikena ngaga alta nya empu, lalu semua tanduk nya enda tau enda disampak enggau temaga magang.

³Gaga kali alai nyimpan amau ti bechampur enggau lemak, lalu gaga senduk, mangkuk, pengait, enggau talam alai engkah bara api. Semua pekekas tu enda tau enda digaga ari temaga magang.

⁴Gaga siti gelegar temaga, lalu lekatka empat iti chengkerung temaga ba sukut gelegar nya.

⁵Lekatka gelegar nya ari baruh tisi alta nya, ngenyauh nya ngagai puchuk, lalu ngenyauh nya ngagai kaki alta nya.

⁶Gaga kayu kena ngaling alta nya, ari kayu akasia, lalu sampak kayu pengaling nya enggau temaga.

⁷Rasukka kayu pengaling nya ngagai chengkerung ti ba siti-siti rusuk alta nya, kena ngesan alta nya.

⁸Gaga alta nya ari papan, lalu awakka alta nya berumbang, nitihka pelan ti udah ditunjukka Aku ngagai nuan ba bukit nya.

⁹“Ngelingi langkau sembiang nya, gaga siti dinding ngena kain tirai ti digaga ari kain linin ti alus. Ke tisi ti muak ke selatan, pemanjai kain tirai nya 50 meter,

¹⁰dilekatka ngagai dua puluh batang tiang temaga ti didudukka ba atas dua puluh iti pelasar temaga, ti bisi pengait enggau simpai pirak.

¹¹Gaga baka nya mega ke tisi ti muak ke utara.

¹²Ke tisi ti muak ke barat, pemanjai kain tirai nya 25 meter, bisi sepuluh batang tiang, enggau sepuluh iti pelasar ke tiang nya.

¹³Ke tisi ti muak ke timur, alai pintu penama digaga, pemanjai dinding nya mega 25 meter.

¹⁴Ba tisi penama nya, ari sepiak-sepiak, bisi kain tirai. Pemanjai iya 7.5 meter, enggau tiga iti batang tiang, enggau tiga iti pelasar ke tiga iti batang tiang nya.

¹⁶Mua pintu penama nya empu enda tau enda bisi kain tirai. Pemanjai iya 10 meter, ditenun ngena ubung linin ti alus, ubung ti digaga ari bulu bedus ti bechura biru, ungu enggau mirah, lalu dilagu ngena sulam. Tirai tu enda tau enda digantung ari empat batang tiang ti bediri ba atas empat iti pelasar.

¹⁷Semua tiang ti ngelingi tengah laman nya enda tau enda dipejantilka enggau pangan diri ngena batang pirak, lalu pengait ke tiang nya enda tau enda digaga ari pirak, lalu pelasar ke tiang nya digaga ari temaga magang.

¹⁸Pemanjai tengah laman nya 44 meter. Buka iya 25 meter, lalu peninggi iya 2.2 meter. Kain tirai nya enda tau enda digaga ari kain linin ti alus, lalu pelasar digaga ari temaga.

¹⁹Semua pekekas ti dikena dalam langkau sembiang nya, enggau semua tiang bantilka Langkau Kain nya, enggau tiang bantilka dinding ti ngelingi Langkau Kain nya empu, enda tau enda digaga ari temaga magang.

²⁰“Nuan enda tau enda ngasuh orang Israel mai ngagai nuan minyak kana ti pemadu manah ke lampu, ngambika lampu nya ulih ditungkun genap lemai.

²¹“Aron enggau bala anak lelaki iya enda tau enda ngengkahka lampu nya dalam Langkau Kain TUHAN, di luar kain tirai ti ari mua Peti Lampang Batu Adat. Lampu nya enda tau enda seruran menyadi kenyau ari lemai nyentuk ngagai pagi. Atur tu enda tau enda seruran dititihka orang Israel enggau peturun sida belama iya.