Read Iban Pemansut 28 Bible Online

Pemansut 28 - Iban bible

Pemansut 28

¹“Pesanka menyadi nuan Aron enggau anak iya Nadap, Abihu, Eleasar, enggau Itamar. Seraraka sida ari orang Israel, ngambika sida gawa ke Aku nyadi imam.

²Gaga pekayan imam ke menyadi nuan Aron, ngambika iya dibasa orang sereta sigat gaya.

³Pesanka semua orang ke udah diberi Aku pengelandik begagaka utai, lalu asuh sida ngaga gari ke Aron, ngambika iya ulih diserahka nyadi imam gawa ke Aku.

⁴Asuh sida ngaga siti terabai dada, siti epod, siti baju panjai, selambar baju ti disulam, siti labung, enggau siti selampai dada. Sida enda tau enda ngaga pekayan imam tu ke menyadi nuan Aron enggau ke bala anak lelaki iya, ngambika sida ulih gawa nyadi imam Aku.

⁵Orang ke landik ngaga pekayan nya enda tau enda ngaga semua utai nya ari bulu bedus ti bechura biru, ungu enggau mirah, enggau kain linin ti alus.

⁶“Sida enda tau enda ngaga epod ari bulu bedus ti bechura biru, ungu enggau mirah, ubung emas, enggau kain linin ti alus, ti dilagu enggau sulam.

⁷Dua iti papak tali bau kena ngelekatka epod, enda tau enda dilekatka ba tisi epod nya empu.

⁸Siti belulang ti ditenun ari bulu bedus, ubung emas, enggau ari ubung linin ti alus, enda tau enda dijait ngagai epod.

⁹Ambi dua igi batu akek mirah, lalu tebukka nama dua belas iku anak Jakop ba batu nya,

¹⁰nitihka penuai sida, enam iku ba batu sigi, lalu nama enam iku ba batu sigi.

¹¹Asuh orang ke landik ngaga perengka ti berega nebukka nama bala anak lelaki Jakop ba batu nya, lalu lekatka batu nya ba bingkai emas.

¹²Lekatka batu nya ba papak tali bau epod nya, kena nunjukka dua belas raban bansa orang Israel. Nya chara Aron deka mai nama sida ba bau iya, ngambika Aku ti TUHAN, deka seruran ingatka nembiak Aku.

¹³Gaga dua iti sangkum emas

¹⁴enggau dua iti rantai ari emas ti tulin, ti dibelitka baka tali, lalu lekatka rantai nya ngagai sangkum nya.

¹⁵“Gaga siti terabai dada ke Imam Besai kena iya ngiga peneka Allah Taala. Terabai dada nya enda tau enda digaga ari utai ti dikena ngaga epod, lalu disulam baka ke nyulam epod.

¹⁶Terabai dada nya enda tau enda besegi empat, lalu belipat dua - pemanjai iya 22 sentimeter, lalu buka iya 22 sentimeter.

¹⁷Lekatka empat iti rintai batu ti berega ba terabai dada nya. Ba rintai ti keterubah lekatka sigi batu akek, sigi batu jakut kuning, enggau sigi batu berega ti bechura mirah.

¹⁸Ba rintai ti kedua, lekatka sigi batu samerut, sigi batu nilam, enggau sigi batu intan.

¹⁹Ba rintai ti ketiga, lekatka sigi batu pirus, sigi batu sejabu, enggau sigi batu kechubung.

²⁰Lalu ba rintai ti keempat, lekatka sigi batu pirus, sigi batu akek mirah, enggau sigi batu asija. Semua sida tu enda tau enda dilekatka dalam sangkum emas magang.

²¹Genap igi batu ti berega nya enda tau enda ditebuk enggau nama genap iku bala anak lelaki Jakop, siti nama ke siti raban bansa orang Israel.

²²Gaga rantai ari emas ti tulin, ti dibelitka baka tali, ke terabai dada nya.

²³Gaga dua iti chengkerung emas, lalu lekatka chengkerung emas dua iti nya ngagai sukut terabai dada nya ba puting ti ari atas,

²⁴lalu tanchangka tali emas ti dua iti nya ngagai chengkerung emas ti dua iti nya.

²⁵Tanchangka ujung tali ti dua iti nya ngagai sangkum ti dua iti nya, lalu ngena chara nya, sida ditanchangka di mua, ngagai papak tali bau epod.

²⁶Udah nya, gaga dua iti chengkerung emas, lalu lekatka chengkerung dua iti nya ngagai sukut terabai dada ba puting ti ari baruh, ba tisi ari dalam epod.

²⁷Gaga dua iti da agi chengkerung emas, lalu lekatka chengkerung dua iti nya ngagai ujung papak tali bau epod, semak endur alai jait epod nya, ari atas belulang ti udah ditenun.

²⁸Tanchangka chengkerung ti ba terabai dada nya ngagai chengkerung ti ba epod ngena tali ti biru, ngambika terabai dada nya terengkah ba atas belulang nya, lalu enda tingkil.

²⁹“Lebuh Aron tama ngagai Endur ti Kudus, iya enda tau enda ngena terabai dada ti ngundan nama semua raban bansa orang Israel, ngambika Aku ti TUHAN, deka seruran ingatka nembiak Aku.

³⁰ Engkahka Urim enggau Tumim [32] dalam terabai dada nya, ngambika Aron mai utai nya lebuh iya ngadap ngagai Aku. Lebuh maya nya, iya enda tau enda ngena terabai dada, ngambika iya ulih nemu peneka Aku ke orang Israel.

³¹“Baju panjai ti ari baruh epod enda tau enda semua digaga ari bulu bedus ti bechura biru.

³²Baju panjai nya enda tau nadai lubang alai pala, lalu tisi lubang tu enda tau enda dikeringka ngena bingkai ti ditenun, ngambika lubang nya enda charik.

³³Ba semua puting baju panjai nya, lekatka rundai buah delima ti digaga ari bulu bedus ti bechura biru, ungu enggau mirah, beselat enggau gerunung ti digaga ari emas.

³⁵Aron enda tau enda ngena baju panjai nya lebuh iya ngereja pengawa imam. Lebuh iya datai ngagai Aku ba Endur ti Kudus, tauka lebuh iya ninggalka Endur nya, munyi gerunung iya deka didinga, lalu iya enda kena bunuh.

³⁶“Gaga utai siti ari emas lalu tebukka leka jaku ‘Diserahka Ngagai TUHAN,’ ba utai nya

³⁷Tanchangka utai nya ba mua labung ngena tali ti biru.

³⁸Utai nya enda tau enda seruran bisi ba kening Aron, lalu Aron empu deka betanggungjawapka penyalah ti nyadi lebuh orang Israel ngenjuk piring sida nyadi pemeri ti kudus; utai nya deka seruran bisi ba kening iya, ngambika Aku, ti TUHAN, rinduka sida.

³⁹“Tenun baju ke Aron ari linin ti alus, lalu gaga labung ngena linin ti alus, sereta enggau selampai ti dilagu enggau sulam.

⁴⁰“Gaga baju, selampai, enggau selapuk ke bala anak lelaki Aron, ngambika sida dibasa orang sereta sigat gamal.

⁴¹Rasukka gari tu ba menyadi nuan, Aron, enggau ba bala anak lelaki iya. Udah nya berekatka sida, lalu tata sida ngena minyak kana kena nyerahka sida, ngambika sida ulih bekereja nyadi imam ke Aku.

⁴²Gaga tanchut pandak ke sida ari kain linin. Tanchut nya mungkur punggung nyentuk ngagai pah, ngambika sida enda ngayanka tubuh diri

⁴³Aron enggau bala anak lelaki iya enda tau enda seruran ngena tanchut pandak nya lebuh sida tama ngagai Langkau Kain TUHAN, tauka mansang ngagai alta lalu bekereja nyadi imam dalam Endur ti Kudus, ngambika sida enda kena bunuh ketegal ngayanka tubuh diri. Tu atur ti meruan belama iya ke Aron enggau bala peturun iya.