Read Iban Pemansut 3 Bible Online

Pemansut 3 - Iban bible

Pemansut 3

¹Nyadi sekali, lebuh Moses benung ngibun bedus enggau kambin mentua iya Jetro, ti nyadi imam orang Midian, iya nguluka raban jelu nya bejalai meraka menua puang, lalu datai di Sinai, iya nya bukit ti kudus.

² Dia siku melikat TUHAN pegari di mua iya, baka api ti pansut ari babas. Moses meda babas nya mau laban api, tang babas nya enda angus.

³“Nyelai amat utai nya,” ku iya bepikir. “Nama kebuah babas nya enda angus? Uji aku meda semak agi.”

⁴Lebuh TUHAN meda Moses mansang semak agi, Iya lalu ngangauka Moses ari dalam babas nya, ku Iya, “Moses! Moses!” “Tu aku,” ku Moses nyaut.

⁵Ku Allah Taala bejaku, “Anang datai semak. Buka selipar nuan, laban nuan bediri ba tanah ti kudus.

⁶Aku tu Allah Taala aki ini nuan, Allah Taala ke disembah Abraham, Isak, enggau Jakop.” Nya alai Moses lalu mampul mua diri, laban iya takut merening ngagai Allah Taala.

⁷Ku TUHAN bejaku, “Aku udah meda pemedis bala nembiak Aku diperinsaka orang di menua Ejip. Aku udah ninga sida ngangau minta diri dilepaska ari mandur ke ngemataka sida. Aku nemu pemalat sida kena perinsa,

⁸nya alai Aku nurun laban Aku deka ngelepaska sida ari jari orang Ejip, lalu mai sida pansut ari menua Ejip ngagai menua ti luas, menua ti kaya sereta ami[6] ti diuan orang Kanaan, orang Iti, orang Amor, orang Peris, orang Ibi, enggau orang Jebus.

⁹Aku udah ninga sabak bala nembiak Aku, lalu Aku meda chara orang Ejip nekanka pengidup sida.

¹⁰Diatu Aku ngirumka nuan ngagai raja menua Ejip, ngambika nuan mai nembiak Aku pansut ari menua Ejip.”

¹¹Tang ku Moses bejaku enggau Allah Taala, “Sapa aku tu? Baka ni ku aku ulih betemu enggau raja? Lalu baka ni ku aku ulih mai orang Israel pansut ari menua Ejip?”

¹²Ku Allah Taala nyaut, “Aku deka meruan enggau nuan, lalu lebuh nuan mai orang Israel pansut ari menua Ejip, kita deka nyembah Aku ba bukit tu. Tu nyadika tanda Aku udah ngirumka nuan.”

¹³ Tang ku Moses nyaut, “Lebuh aku betemu enggau orang Israel, lalu nyebut ngagai sida, ‘Allah Taala aki ini kita udah ngasuh aku betemu enggau kita,’ sida deka nanya ngagai aku, ‘Sapa nama Iya?’ Nama utai ti patut dipadahka aku ngagai sida?”

¹⁴ Ku Allah Taala nyaut Moses, “AKU TU MEH AKU. Nuan enda tau enda madahka ngagai orang Israel: ‘Iya ke dikumbai AKU TU MEH AKU[7] udah ngirumka aku ngagai kita.’

¹⁵Padahka ngagai orang Israel, Aku TUHAN Allah Taala aki ini sida, Allah Taala ke disembah Abraham, Isak enggau Jakop, udah ngirumka nuan ngagai sida. Tu nama Aku, lalu nama tu deka meruan belama iya. Tu meh nama ti deka dikena semua turun-menurun ngangauka Aku jemah ila.

¹⁶Mupuk meh nuan, lalu gempuruka bala tuai orang Israel, lalu padahka ngagai sida, Aku TUHAN Allah Taala aki ini sida, Allah Taala ke disembah Abraham, Isak enggau Jakop, udah pegari di mua nuan. Padahka ngagai sida, Aku udah datai ngagai sida, lalu udah meda utai ti benung dikereja orang Ejip ngagai sida.

¹⁷Aku udah mutuska runding deka mai sida pansut ari menua Ejip, alai sida ke balat kena perinsa, lalu Aku deka mai sida ngagai menua ti kaya sereta ami, menua ti diuan orang Kanaan, orang Iti, orang Amor, orang Peris, orang Ibi enggau orang Jebus.

¹⁸“Sida deka mendingka utai ti disebut nuan. Udah nya, nuan enda tau enda mansang enggau bala tuai orang Israel, ngagai raja menua Ejip, lalu nyebut ngagai iya, ‘TUHAN Allah Taala orang Hebrew, udah betemu enggau kami. Nya alai awakka kami bejalai ngagai menua puang dalam pejalai kira tiga hari lalu ngenjuk piring ngagai TUHAN Allah Taala kami.’

¹⁹Aku nemu, raja menua Ejip sigi enggai ngelepaska kita, enti iya enda dipejal.

²⁰Tang Aku deka ngena kuasa Aku, lalu deka ngukum menua Ejip, ngena utai ti balat ngenakut. Udah nya baru iya deka ngelepaska kita.

²¹ “Aku deka mejalka orang Ejip bebasaka nembiak Aku, ngambika, lebuh sida angkat ari menua nya, sida enda mupuk puang.

²²Genap iku indu orang Israel deka mansang ngagai orang Ejip ke berimbai pendiau enggau sida, enggau ngagai indu orang Ejip ke serumah enggau sida, lalu deka minta gari, perengka emas enggau perengka pirak. Orang Israel deka ngerasukka utai nya ba anak lelaki enggau anak indu sida, lalu nabanka pengaya orang Ejip.”