Read Iban Pemansut 31 Bible Online

Pemansut 31 - Iban bible

Pemansut 31

¹Ku TUHAN bejaku ngagai Moses,

²“Aku udah milih Besalel anak Uri, uchu Hur, ari raban bansa Judah,

³lalu Aku udah ngemenuhka iya enggau Roh Allah Taala, penau enggau pengelandik ngereja semua macham pengawa,

⁴ngaga pelan ke utai ti deka digaga, lalu ngaga utai nya ari emas, pirak enggau temaga;

⁵netak batu ti berega ti deka disangkum; ngukir kayu; enggau ngereja genap macham pengawa begagaka utai ti dikena ngias.

⁶Aku udah mega milih Oholiap anak Ahisamak, ari raban bansa Dan, bekereja enggau iya. Aku udah mega meri pengelandik ti besai ngagai semua orang ke landik begagaka utai, ngambika sida ulih ngaga semua utai ti udah diasuh Aku gaga sida, iya nya:

⁷Langkau Kain TUHAN, Peti Lampang Batu Adat enggau tudung iya, semua perengka ti dikena dalam Langkau Kain TUHAN nya,

⁸mija enggau pekekas iya, penuduk lampu ti digaga ari emas ti tulin, enggau semua pekekas iya, alta alai nunu menyan,

⁹alta alai nunu piring, enggau semua pekekas iya, bisin kena bebasu enggau penuduk iya,

¹⁰pekayan imam ti manah amat, ti deka dikena Aron enggau bala anak lelaki iya lebuh sida bekereja nyadi imam,

¹¹minyak tata, enggau menyan ti bebau rengut ti dikena ba Endur ti Kudus. Lebuh sida ngaga semua utai nya, sida enda tau enda ngereja pengawa nya nitihka chara ti udah dipadahka Aku ngagai nuan.”

¹²TUHAN ngasuh Moses

¹³madahka ngagai orang Israel munyi tu: “Intu Hari Sabat, hari alai Aku diau, laban nya nyadika tanda entara kita enggau Aku belama lama iya, kena nunjukka Aku ti TUHAN udah ngaga kita nyadi nembiak Aku.

¹⁴Kita enda tau enda ngintu hari alai kita diau nya, laban hari nya kudus. Barang sapa enda ngintu hari nya, lalu bekereja ba hari nya, enda tau enda dibunuh.

¹⁵ Kita bisi enam hari alai kita gawa, tang hari ti ketujuh nya hari alai kita diau ti diserahka ngagai Aku. Barang sapa ngereja sebarang macham pengawa ba hari nya, deka dibunuh.

¹⁶Orang Israel enda tau enda ngintu hari nya nyadika tanda sempekat.

¹⁷ Tu nyadika tanda ti meruan belama lama iya entara orang Israel enggau Aku, laban Aku ti TUHAN, udah ngaga langit enggau dunya dalam enam hari, lalu ba hari ti ketujuh Aku ngetu gawa, lalu diau.”

¹⁸Lebuh Allah Taala udah tembu bejaku ngagai Moses ba bukit Sinai, Iya meri ngagai Moses dua iti lampang batu ti alai Allah Taala Empu udah nuliska pesan Iya.