Read Iban Pemansut 32 Bible Online

Pemansut 32 - Iban bible

Pemansut 32

¹ Lebuh orang mayuh meda Moses lama enda nurun ari bukit nya, sida lalu begelumu ngelingi Aron, lalu bejaku enggau iya, “Kitai enda nemu namaka penyadi Moses ti udah nguluka kitai pansut ari menua Ejip. Nya alai gaga siku petara [35] ke kitai, ngambika iya bisi nguluka kitai.”

²Ku Aron bejaku enggau sida, “Tingkilka antin emas ti dikena bini, anak lelaki, anak indu kita, lalu bai utai nya ngagai aku.”

³Nya alai semua orang lalu ningkilka antin emas sida, lalu mai utai nya ngagai Aron.

⁴ Aron ngambi, lalu ngeluluhka antin nya, nuang emas nya ngagai siti chuan, lalu nempa siku anak sapi ti lelaki ari emas nya. Ku orang mayuh bejaku, “Orang Israel, tu petara kitai, ti udah nguluka kitai pansut ari menua Ejip!”

⁵Udah nya Aron lalu ngaga siti alta di mua anak sapi emas nya, lalu madahka ngagai orang mayuh, “Pagila kitai deka begawai ngemesaika TUHAN.”

⁶ Tumu pagi hari siti, sida mai sekeda jelu nyadika piring tunu, lalu jelu ti bukai nyadika piring pemaik. Orang mayuh belatur duduk, lalu begawai. Sida balat amat ngirup lalu ngereja pengawa ti kamah.

⁷Ku TUHAN bejaku ngagai Moses, “Alai nuan nurun enggau jampat, laban bala nembiak nuan, ti udah diuluka nuan pansut ari menua Ejip, udah bedosa lalu udah nulak Aku.

⁸Sida udah limpang ari jalai Aku. Sida udah ngeluluhka emas lalu ngaga siku anak sapi ti lelaki ari emas nya, lalu udah nyembah sereta ngenjuk piring ngagai utai nya. Sida ngumbai utai nya petara ti udah nguluka sida pansut ari menua Ejip.

⁹Aku nemu pengekieh sida.

¹⁰Nya alai anang nguji nagang Aku. Aku ringat ngagai sida, lalu Aku deka ngerusak sida. Udah nya baru Aku ngaga nuan enggau peturun nuan nyadi bansa ti kering.”

¹¹ Tang Moses minta kasih ngagai TUHAN Allah Taala iya. Ku iya, “TUHAN, nama kebuah Nuan ringat ngemalat nya ngagai bala nembiak Nuan, ti udah dilepaska Nuan ari menua Ejip ngena pemesai pengering enggau kuasa Nuan?

¹²Enti Nuan ngerusak sida, orang Ejip deka ngumbai Nuan mai nembiak Nuan pansut ari menua Ejip laban Nuan deka munuh sida abis lengis ba sebelah bukit tu. Badu agi ringat. Ubah runding Nuan, lalu anang ngasuh penusah tu ninggang nembiak Nuan.

¹³ Kingatka nembiak Nuan Abraham, Isak enggau Jakop. Kingatka Nuan ti udah besemaya enggau sida ngena sumpah deka ngasuh peturun sida ngemayuh bintang ti di langit, lalu meri ngagai peturun sida semua menua ti udah disemaya Nuan nyadika pesaka sida belama iya.”

¹⁴TUHAN lalu ngubah runding Diri, lalu enda nyadi ngasuh penusah ti besai ninggang nembiak Iya.

¹⁵Moses lalu nurun ari bukit nya, mai lampang batu ti dua iti nya ti alai pesan udah ditulis ba sepiak-sepiak lampang batu nya.

¹⁶Lampang batu nya udah digaga Allah Taala Empu, lalu Iya udah nebukka pesan Iya ba batu nya.

¹⁷Lebuh Josua ninga orang mayuh manjung, iya lalu nyebut ngagai Moses, “Aku ninga munyi orang ke beperang dalam kem.”

¹⁸Ku Moses, “Nya ukai munyi panjung orang ke menang tauka alah. Nya munyi orang belagu.”

¹⁹Lebuh Moses nyau datai semak ngagai kem nya, lalu tepedaka anak sapi nya, enggau orang mayuh ke betanda, iya pedis ati, lalu ngempaska ba kaki bukit nya lampang batu ti dibai iya. Lampang batu nya lalu pechah.

²⁰Iya lalu ngambi anak sapi ti udah digaga sida, ngeluluhka iya, nginsarka iya nyadi amau, lalu nyampur iya enggau ai. Udah nya iya lalu mejalka orang Israel ngirup ai nya.

²¹Ku iya bejaku enggau Aron, “Nama utai ti udah dikereja orang tu ngagai nuan, datai ke nuan nyau ngasuh sida bedosa ngemalat tu?”

²²Disaut Aron, “Anang ringat ngagai aku. Nuan nemu pengeras orang tu deka ngereja penyai.

²³Ku sida bejaku ngagai aku, ‘Kitai nadai nemu namaka penyadi Moses, ti udah mai kitai pansut ari menua Ejip. Nya alai gaga ke kitai siku petara ngambika iya bisi nguluka kitai.’

²⁴Aku lalu ngasuh sida mai perengka emas sida ngagai aku. Orang ke bisi perengka emas lalu ningkilka utai nya ari tubuh sida, lalu meri utai nya ngagai aku. Aku lalu nibarka perengka emas nya ngagai api. Anak sapi ti lekaki tu lalu pansut ari api nya!”

²⁵Moses nemu Aron endang enda ngerara orang mayuh tang nejuka sida ngereja utai nitihka peneka sida empu lalu ngemelika diri di mua munsuh sida.

²⁶Nya alai Moses lalu bediri ba mua pintu kem, lalu bejaku enggau nyawa ti inggar, “Semua orang ke setanah enggau TUHAN, mansang kitu!” Semua orang Lewi lalu begempuru ngelingi iya.

²⁷Ku Moses bejaku ngagai sida, “TUHAN Allah Taala ke disembah orang Israel ngasuh genap iku kita nangkin pedang kita, lalu bejalai nengah kem tu, belabuh ari pintu tu, nyentuk ngagai pintu nyin, lalu munuh semua menyadi kita, pangan kita, enggau orang ke berimbai pendiau enggau kita.”

²⁸Orang Lewi ngasika jaku Moses, lalu munuh kira tiga ribu iku orang sehari nya.

²⁹Ku Moses bejaku ngagai orang Lewi, “Sehari tu kita udah nyiri diri empu [36] nyadi imam TUHAN, laban kita udah munuh anak lelaki kita, enggau sida menyadi lelaki kita. Nya kebuah TUHAN udah merekatka kita sehari tu.”

³⁰Hari siti Moses bejaku ngagai orang mayuh, “Kita udah balat amat bedosa. Tang diatu aku deka niki ngagai bukit nya baru ngagai TUHAN, nyangka ukur aku ulih minta TUHAN ngampun dosa kita.”

³¹Moses lalu mansang baru ngagai TUHAN, lalu ku iya bejaku enggau TUHAN, “Orang tu udah balat amat bedosa. Sida udah ngaga siku petara ari emas, lalu nyembah iya.

³² Ampun dosa sida. Tang enti Nuan enggai, awakka Nuan muai nama aku ari bup Nuan.”

³³Ku TUHAN nyaut, “Semina orang ke udah bedosa ngelaban Aku aja ti deka dibuai Aku nama ari bup Aku.

³⁴Nya alai, mupuk nuan, lalu uluka orang mayuh ngagai endur ti udah dipadahka Aku ngagai nuan. Ingat, melikat Aku deka ngiring nuan, tang maya deka datai alai Aku deka ngukum orang tu ketegal dosa sida.”

³⁵Nya alai TUHAN lalu ngasuh penyakit ninggang orang mayuh, laban sida udah ngasuh Aron ngaga anak sapi emas nya.