Read Iban Pemansut 33 Bible Online

Pemansut 33 - Iban bible

Pemansut 33

¹ Ku TUHAN bejaku ngagai Moses, “Angkat ari endur tu, nuan enggau orang mayuh ti udah dibai nuan pansut ari menua Ejip, lalu mansang kita ngagai menua ti udah disemaya Aku ngagai Abraham, Isak, enggau Jakop, enggau ngagai peturun sida.

²Aku deka ngasuh siku melikat ngiring kita, lalu Aku deka muru orang Kanaan, orang Amor, orang Iti, orang Peris, orang Ibi enggau orang Jebus.

³Kita deka mupuk ngagai menua ti kaya sereta ami. Tang Aku Empu enda enggau kita, enggai ke Aku munuh kita di rantau jalai, laban kita tu orang ke kieh.”

⁴Lebuh orang mayuh ninga nya, sida lalu belabuh ngulit, lalu enda agi bekenaka barang ti berega;

⁵laban TUHAN udah ngasuh Moses madahka jaku tu ngagai sida: “Kita tu orang ke kieh. Enti Aku bejalai sama enggau kita sekejap aja, Aku deka munuh kita abis lengis. Nya alai buka semua perengka emas ti dikena kita. Aku deka bekiraka utai ti deka dikereja Aku ngagai kita.”

⁶Nya alai, udah bekau sida ke angkat ari Bukit Sinai, orang Israel nadai agi bekenaka perengka emas.

⁷Genap kali orang Israel nirika kem, Moses ngambi Langkau Kain TUHAN ti kudus nya, lalu nirika iya jauh mimit ari luar kem. Langkau Kain nya dikumbai Langkau Kain TUHAN, lalu barang sapa deka betanyaka utai ngagai TUHAN, enda tau enda pansut ari kem lalu mansang ngagai Langkau Kain nya.

⁸Genap kali Moses mansang ngagai Langkau Kain nya, orang mayuh bediri ba mua pintu langkau kain sida empu, lalu nengkilaka Moses mupuk, datai ke iya udah tama ngagai Langkau Kain TUHAN.

⁹Lebuh Moses udah tama, gentilang remang nurun lalu bediri ba mua pintu Langkau Kain nya, lalu TUHAN bejaku ngagai Moses.

¹⁰Lebuh orang mayuh meda gentilang remang nya bediri di penama ngagai Langkau Kain TUHAN, sida meremi.

¹¹TUHAN bejaku betunga mua enggau Moses, baka orang ke bejaku enggau pangan. Udah nya, Moses pulai ngagai kem. Tang orang bujang ti nyadi penyaup Moses, Josua anak Nun, diau dalam Langkau Kain TUHAN.

¹²Ku Moses bejaku enggau TUHAN, “Nuan sigi amat udah ngasuh aku nguluka bala orang tu ngagai menua nya, tang Nuan enda madahka sapa ke diasuh Nuan bejalai enggau aku. Nuan udah madahka Diri amat nemu sereta rinduka aku.

¹³Nya alai enti Nuan amat rinduka aku, padahka pelan Nuan ngagai aku, ngambika aku ulih nemu Nuan enggau dalam agi lalu majak ngerinduka ati Nuan. Ingatka Diri ti udah milih bansa orang tu ke Nuan Empu.”

¹⁴Ku TUHAN bejaku, “Aku Empu deka bejalai enggau nuan, lalu Aku deka ngasuh nuan belelak.”

¹⁵Disaut Moses, “Enti Nuan enda bejalai enggau kami, anang ngasuh kami angkat ari endur tu.

¹⁶Baka ni ku orang tau nemu Nuan rinduka bala nembiak Nuan tu, lalu rindu mega ke aku, enti Nuan enda bejalai enggau kami? Enti Nuan bejalai enggau kami, nya deka nunjukka kami tu lain ari orang bansa bukai di dunya tu.”

¹⁷Ku TUHAN bejaku ngagai Moses, “Aku deka ngereja utai ti dipinta nuan, laban Aku amat nemu nuan, lalu Aku amat lantang ati ke nuan.”

¹⁸Udah nya Moses lalu bejaku, “Awakka aku meda mulia Nuan.”

¹⁹ Disaut TUHAN, “Aku deka ngasuh mulia Aku mansa mua nuan, lalu di mua nuan empu, Aku deka nyebut nama Aku ti kudus. Aku tu TUHAN, lalu Aku deka ngayanka pengasih enggau penyiru Aku ke orang ke dipilih Aku.

²⁰Aku enda ngasuh nuan meda mua Aku, laban nadai orang ulih idup enti iya meda mua Aku,

²¹tang ba semak Aku bisi siti endur, alai nuan tau bediri ba atas batu.

²²Lebuh mulia Aku mansa, Aku deka nyimpan nuan dalam lubang batu nya, lalu mungkur nuan ngena jari Aku, datai ke Aku udah ngelebus.

²³Udah nya Aku deka matak jari Aku baru, lalu nuan deka meda belakang Aku, tang enda meda mua Aku.”