Read Iban Pemansut 34 Bible Online

Pemansut 34 - Iban bible

Pemansut 34

¹Ku TUHAN bejaku ngagai Moses, “Tetak dua iti lampang batu baka ke terubah. Aku deka nuliska ba lampang batu nya leka jaku baka ke udah ditulis ba dua iti lampang batu ti terubah, ti dipechahka nuan.

²Tumu pagi hari pagila nuan enda tau enda sedia, lalu niki ngagai Bukit Sinai lalu betemu enggau Aku ba tuchung bukit nya.

³Nadai orang tau datai enggau nuan, tauka bisi ba bukit nya. Indah jelu sapi enggau jelu bedus deh enda tau ditejuka ngulam ba kaki bukit nya.”

⁴Nya alai Moses lalu ningkuh dua iti lampang batu, lalu tumu pagi hari siti, iya mai lampang batu nya ngagai Bukit Sinai, nitihka asuh TUHAN.

⁵TUHAN nurun dalam mua hari, bediri dia enggau Moses, lalu madahka nama Diri ti kudus, iya nya TUHAN.[37]

⁶ Udah nya TUHAN mansa mua Moses, lalu ngangau, “Aku tu TUHAN Allah Taala ti kasih sereta siru, lubah ringat, sereta mandangka penetap ati enggau pengerindu ti besai.

⁷Aku deka tetap rinduka beribu-ribu [38] serak lalu ngampun penyai enggau dosa, tang Aku tetap deka ngukum anak enggau uchu ngagai ketiga enggau keempat serak ketegal dosa apai indai sida.”

⁸Moses lalu beguai-guai meremi ke tanah, lalu nyembah TUHAN.

⁹Ku iya, “O TUHAN, enti Nuan amat rinduka aku, aku minta Nuan bejalai enggau kami. Orang tu kieh, tang ampun penyai enggau dosa kami, lalu terima meh kami tu nyadika nembiak Nuan.”

¹⁰Ku TUHAN bejaku ngagai Moses, “Diatu Aku ngaga siti sempekat enggau orang Israel. Aku deka ngereja utai ti besai di mua sida baka ke nadai udah kala dikereja ba semua orang bansa bukai di dunya tu. Semua bansa deka meda pemesai utai ti dikereja Aku ti TUHAN, laban Aku deka ngereja utai ti amat besai ke kita.

¹¹Kita enda tau enda ngasika pesan ti deka diberi Aku ngagai kita sehari tu. Aku deka muru orang Amor, orang Kanaan, orang Iti, orang Peris, orang Ibi, enggau orang Jebus, lebuh kita nyerang.

¹²Anang ngaga sempekat enggau bansa orang ke nguan menua ti digagai kita, laban sempekat nya deka nyadi panjuk ti tau munuh kita.

¹³ Tang kita enda tau enda ngeruntuhka alta sida, ngerusak tiang sida, lalu nebang tiang keramat sida.

¹⁴“Anang nyembah petara bukai, laban Aku tu TUHAN ti chemburu.[39]

¹⁵Anang ngaga sempekat enggau orang ke diau di menua nya, laban lebuh sida nyembah lalu ngenjuk piring ngagai petara sida, sida deka mai kita sama enggau sida, lalu kita deka tetengukka pemakai ti diberi sida ngagai petara sida.

¹⁶Enti anak lelaki kita jadi enggau indu orang bansa bukai, sida deka mai anak lelaki kita ninggalka Aku, lalu nyembah petara sida.

¹⁷ “Anang ngaga engkeramba ari besi lalu anang nyembah sida.

¹⁸ “Intu Gawai Roti Ti Enda Beragi. Munyi ti udah dipadahka Aku ngagai kita, empa roti ti enda beragi dalam kandang tujuh hari dalam bulan Abip, laban nya bulan kita angkat ari menua Ejip.

¹⁹ “Genap iku anak tuai kita ke lelaki, enggau genap iku anak tuai ti lelaki ari jelu tupi kita, endang enggi Aku magang,

²⁰ tang kita enda tau enda meli pulai baru genap iku anak tuai keledai kita ngena siku anak domba kena nyilih iya. Enti kita enda meli iya pulai baru, patahka rekung iya. Beli pulai baru semua anak tuai kita ke lelaki. “Nadai orang tau datai ngagai Aku enti iya enda mai piring.

²¹ “Kita bisi enam hari alai kita gawa, tang anang gawa ba hari ti ketujuh, nemuka nya maya ngeradu tanah tauka lebuh maya ngetau.

²² “Intu Gawai Ngetau lebuh kita baru deka belabuh ngetau, lalu intu Gawai Belangkau lebuh musin ruruh daun, lebuh kita ngumpul buah kita.

²³“Tiga kali dalam setaun semua lelaki ari bala kita enda tau enda datai nyembah Aku TUHAN Allah Taala ke disembah orang Israel.

²⁴Lebuh Aku udah muru semua bansa bukai lalu ngerembaika rampa menua kita, nadai orang deka nguji ngalahka menua kita lebuh kita ngintu gawai tiga bengkah tu.

²⁵ “Anang meri roti ti beragi lebuh kita meri jelu nyadika piring ngagai Aku. Anang ngalau ngagai pagi hari siti isi jelu ti udah disayat kita lebuh Gawai Paska.

²⁶ “Genap taun bai ngagai Rumah TUHAN utai ti terubah diketau kita. “Anang manduk anak domba tauka anak kambin ngena ai tusu indai iya empu.”

²⁷Ku TUHAN bejaku ngagai Moses, “Tuliska leka jaku tu, laban Aku ngaga sempekat tu enggau nuan sereta enggau orang Israel, beduduk ba leka jaku tu.”

²⁸Moses diau dia enggau TUHAN empat puluh hari empat puluh malam, nadai makai, nadai ngirup. Iya nuliska ba lampang batu nya semua leka jaku sempekat nya, iya nya Sepuluh Pesan.

²⁹ Lebuh Moses nurun ari Bukit Sinai, mai Sepuluh Pesan nya, mua iya beperenching laban iya udah bejaku enggau TUHAN. Tang iya enda nemu mua diri beperenching.

³⁰Aron enggau semua orang mayuh bela merening ngagai Moses, lalu meda mua iya beperenching, lalu sida takut datai semak ngagai iya.

³¹Tang Moses ngangauka sida, lalu Aron enggau semua tuai bansa mansang ngagai iya. Moses lalu bejaku enggau sida.

³²Udah bekau nya, semua orang Israel lalu begelumu ngelingi iya. Moses lalu meri ngagai sida semua pesan ti udah diberi TUHAN ngagai iya ba Bukit Sinai.

³³Lebuh Moses udah bejaku enggau sida, iya mampul mua diri ngena kain.

³⁴Genap kali Moses tama ngagai Langkau Kain TUHAN, deka bejaku ngagai TUHAN, iya muka kain ti dikena iya mampul mua iya. Lebuh iya pansut, iya madahka ngagai orang Israel semua utai ti udah diasuh TUHAN sebut iya,

³⁵lalu sida meda mua iya beperenching. Udah nya iya mampul mua iya baru nyentuk ngagai maya iya bejaku baru enggau TUHAN.