Read Iban Pemansut 35 Bible Online

Pemansut 35 - Iban bible

Pemansut 35

¹Moses ngempuruka semua orang Israel, lalu bejaku enggau sida, “Tu utai ti udah diasuh TUHAN kereja kita:

² Kita bisi enam hari alai kita gawa, tang hari ti ketujuh nya hari ti kudus, hari kita diau, hari ti diserahka kita ngagai Aku ti TUHAN. Barang sapa gawa ba hari nya, deka dibunuh.

³Indah nungkunka api dalam rumah kita deh kita enda tau lebuh Hari Sabat.”

⁴Ku Moses bejaku enggau semua orang Israel, “Tu utai ti udah dipesanka TUHAN:

⁵Beri pemeri ngagai TUHAN. Genap iku orang ke deka meri pemeri, enda tau enda mai pemeri emas, pirak tauka temaga;

⁶kain linin ti alus; bulu bedus ti biru, ungu enggau mirah; kain ti digaga ari bulu kambin;

⁷kulit bedus ti lelaki, ti udah dichat mirah; kulit jelu ti udah digaga alus; kayu akasia;

⁸minyak ke lampu; rempah kena ngaga minyak tata, enggau menyan ti bebau rengut;

⁹batu unam enggau batu berega ti bukai ti deka dilekatka ba epod enggau ba terabai dada Imam Besai.

¹⁰“Semua orang ari bala kita ke landik begagaka utai, enda tau enda datai, lalu ngaga semua utai ti udah diasuh TUHAN, nyengkaum:

¹¹langkau sembiang, tudung ke Langkau sembiang nya, enggau tudung ti ari luar, pengait enggau papan ke langkar langkau nya, alang ke langkar nya, tiang, enggau pelasar ke tiang nya;

¹²Peti Lampang Batu Adat, kayu ti dikena ngaling iya, tudung iya, enggau kain tirai kena ninding iya;

¹³mija, kayu ti dikena ngaling mija nya, enggau semua pekekas ke mija nya; roti ti diberi ngagai Allah Taala;

¹⁴penuduk lampu, enggau pekekas iya; lampu enggau minyak ke lampu nya;

¹⁵alta alai nunu menyan, enggau kayu ti dikena ngaling alta nya; minyak tata; menyan ti bebau rengut; tirai kena ninding mua pintu langkau sembiang nya;

¹⁶alta alai nunu piring tunu, enggau gelegar ti digaga ari temaga, ti digantung ari alta nya, kayu ti dikena ngaling alta nya, enggau semua pekekas iya; bisin alai bebasu enggau penuduk iya;

¹⁷kain tirai kena ninding tengah laman, tiang alai ngantung tirai enggau pelasar ke tiang nya; kain tirai ke mua pintu penama ngagai tengah laman nya;

¹⁸tiang bantilka langkau sembiang nya, enggau tali ti dikena mantilka Langkau Kain nya, enggau kena mantilka kain tirai ti ninding tengah laman nya;

¹⁹enggau pekayan ti manah amat ti deka dikena bala imam lebuh sida bekereja dalam Endur ti Kudus, iya nya gari ti kuduska Imam Aron enggau bala anak lelaki iya.”

²⁰Semua orang Israel lalu angkat ari endur nya,

²¹lalu semua orang ke deka meri pemeri, datai mai pemeri sida ngagai TUHAN kena begagaka Langkau Kain TUHAN. Sida mai semua utai ti diguna kena nyembah Allah Taala, enggau kena begagaka pekayan imam.

²²Semua orang ke deka, ti lelaki enggau ti indu, mai pin tambit kain, antin, tinchin, tenggak, enggau semua macham perengka emas, lalu nyerahka semua utai nya ngagai TUHAN.

²³Semua orang ke bisi ubung linin ti alus; bulu bedus ti bechura biru, ungu tauka mirah; kain ti digaga ari bulu kambin; kulit bedus ti lelaki ti udah dichat mirah; tauka kulit jelu ti udah dialuska, mai utai nya.

²⁴Semua orang ke ulih meri pirak tauka temaga, mai pemeri sida ngagai TUHAN, lalu semua orang ke bisi kayu akasia, ti tau diguna kena begagaka utai, mai utai nya.

²⁵Semua indu ke landik begagaka utai, mai ubung linin ti alus, enggau ubung bulu bedus ti bechura biru, ungu enggai mirah, ti udah digaga sida.

²⁶Sida mega begagaka ubung ari bulu kambin.

²⁷Bala tuai orang Israel lalu mai batu unam enggau batu berega ti bukai, ti deka dilekatka ba epod, enggau ba terabai dada,

²⁸enggau rempah, enggau minyak ke lampu, minyak kena ngaga minyak tata, enggau menyan ti bebau rengut.

²⁹Semua orang Israel ti deka, datai mai pemeri sida ngagai TUHAN, kena ngereja pengawa ti udah diasuh TUHAN kereja Moses.

³⁰Ku Moses bejaku enggau orang Israel, “TUHAN udah milih Besalel anak Uri, uchu Hur, ari raban bansa Judah.

³¹Allah Taala udah ngemenuhka iya enggau kuasa [40] Iya lalu udah meri iya penau, pengelandik, enggau penemu kena iya ngereja semua pengawa begagaka utai,

³²kena iya begagaka pelan, lalu nguna pelan nya begagaka perengka emas, pirak enggau temaga;

³³kena iya netak batu ti berega ti deka dilekatka; ngukir kayu; enggau pengawa bukai.

³⁴TUHAN udah meri ngagai iya enggau ngagai Oholiap anak Ahisamak, ke ari raban bansa Dan, pengelandik ngajar orang bukai begagaka utai.

³⁵Iya udah meri seduai iya pengelandik ngereja semua macham pengawa ti dikereja orang ke betebukka utai, nengkebang, betenun ngena ubung linin ti alus; bulu bedus ti bechura biru, ungu enggau mirah; enggau ngena kain ti bukai. Seduai iya landik ngereja semua macham pengawa, lalu seduai iya landik nengkebang.