Read Iban Pemansut 36 Bible Online

Pemansut 36 - Iban bible

Pemansut 36

¹“Besalel, Oholiap, enggau semua orang ke gawa, ti udah diberi TUHAN pengelandik enggau penemu ngereja semua macham pengawa begagaka Langkau Kain TUHAN, enda tau enda ngaga semua utai nya nitihka jaku TUHAN.”

²Moses mesanka Besalel, Oholiap, enggau semua orang bukai ke bisi pengelandik, ti udah diberi TUHAN penau sereta bisi ati deka nulung, lalu ngasuh sida berengkah gawa.

³Sida nerima ari Moses semua pemeri ti udah dibai orang Israel kena begagaka Langkau Kain TUHAN. Tang orang Israel majak mai pemeri sida ngagai Moses tiap pagi.

⁴Udah nya orang ke landik ngereja pengawa begagaka Langkau Kain TUHAN mansang

⁵lalu madahka ngagai Moses, “Utai ti diberi orang mayuh kena ngereja pengawa ti diasuh TUHAN, nyau lebih ari chukup.”

⁶Moses lalu ngirumka pesan ngagai serata kem nya, enda ngasuh orang meri utai agi kena begagaka Langkau Kain TUHAN. Nya alai orang mayuh lalu badu agi mai utai kia.

⁷Utai ti udah dibai kia nyau lebih ari chukup kena nembuka semua pengawa nya.

⁸Orang ke pemadu landik ari bala orang ke gawa lalu ngaga langkau sembiang nya ari sepuluh lambar kain linin ti alus, enggau ari bulu bedus ti bechura biru, ungu enggau mirah, lalu disulam enggau gambar bala melikat cherub ti besayap.

⁹Semua lambar kain nya sebaka pemesai magang. Pemanjai iya 14 meter, lalu buka iya 2 meter.

¹⁰Sida nyait lima lambar ari sepuluh lambar kain nya nyadika siti bidang, lalu nyait lima lambar ti bukai nyadi bidang ti kedua.

¹¹Sida ngaga rambing ari kain ti biru ba tisi siti-siti bidang.

¹²Sida ngelekatka lima puluh iti rambing ba siti bidang, enggau lima puluh iti rambing ti senimbal enggau sida nya, ba tisi kain ti ba bidang ti kedua.

¹³Sida ngaga lima puluh iti pengait emas, ti dikena sida bejantilka dua iti bidang kain nya nyadi siti langkau sembiang.

¹⁴Udah nya, sida ngaga siti tudung ke langkau sembiang nya ari sebelas iti lambar kain ti digaga ari bulu kambin.

¹⁵Sida ngaga semua lambar kain nya sebaka pemesai magang: pemanjai iya 15 meter, lalu buka iya 2 meter.

¹⁶Sida nyait lima lambar ari kain nya nyadi siti bidang, lalu lima lambar ti bukai nyadi bidang ti kedua.

¹⁷Sida ngelekatka lima puluh iti rambing ba tisi lambar kain ti tisi bendar, enggau lima puluh iti rambing ba tisi bidang ti bukai.

¹⁸Sida ngaga lima puluh iti pengait temaga, kena bejantilka dua iti bidang kain nya, ngambika dua iti bidang nya nyadi siti tudung.

¹⁹Sida mega ngaga dua iti tudung kena map tudung nya, siti ari kulit jelu bedus ti lelaki, ti udah dichat mirah, enggau siti ari kulit jelu ti alus, nyadika tudung ti ari luar bendar.

²⁰Sida ngaga langkar ti bediri ke langkau sembiang nya ari kayu akasia.

²¹Pemanjai siti-siti kayu langkar nya 4 meter, lalu buka iya 66 sentimeter,

²²sereta bisi dua iti cherebut, ngambika kayu langkar nya tau dipejantilka enggau pangan diri. Semua kayu langkar ke langkau sembiang nya bisi cherebut magang.

²³Sida ngaga dua puluh iti kayu langkar ke tisi ti muak ke selatan

²⁴enggau empat puluh iti pelasar pirak ti diengkah di baruh langkar nya, dua iti pelasar di baruh siti-siti kayu langkar, endur alai ngunjamka cherebut ti dua iti ti ba kayu langkar nya.

²⁵Sida ngaga dua puluh iti kayu langkar ke tisi ti muak ke utara ke langkau sembiang nya

²⁶enggau empat puluh iti pelasar pirak, dua iti di baruh siti-siti kayu langkar.

²⁷Ke dinding ti di belakang langkau sembiang nya, ti muak ke barat, sida ngaga enam iti kayu langkar.

²⁸Dua iti ari kayu langkar digaga nyadika sukut langkau sembiang nya.

²⁹Langkar ti ba sukut tu bejantil ari baruh nyentuk ke puchuk. Kayu langkar ti dua iti nya, ke dua iti sukut nya, digaga ngena chara nya.

³⁰Nya alai, lapan iti kayu langkar enggau enam belas iti pelasar pirak, dua iti di baruh siti-siti kayu langkar.

³¹Sida ngaga lima belas iti alang dinding ari kayu akasia, lima iti ke langkar ti ba tisi siti-siti ke langkau sembiang nya,

³²lima iti ke langkar ba tisi siti, enggau lima iti langkar ke tisi ti muak ke barat, ti di belakang langkau sembiang nya.

³³Alang ti ba tengah-tengah, ti diengkah ngenyauh nya ke atas, ngenyauh nya ke baruh, diengkah sepemanjai tisi Langkau Kain nya, ari ujung siti ngagai ujung siti.

³⁴Sida nyampak kayu langkar Langkau Kain nya enggau emas, lalu ngelekatka chengkerung emas ba kayu langkar nya alai ngerasukka alang dinding. Alang dinding nya mega disampak enggau emas.

³⁵Sida ngaga kain tirai ari kain linin ti alus, bulu bedus ti bechura biru, ungu enggau mirah, lalu disulam enggau gambar bala melikat cherub ti besayap.

³⁶Sida ngaga empat batang tiang ari kayu akasia kena nuatka kain tirai nya, nyampak tiang nya enggau emas, lalu ngelekatka pengait emas ba tiang nya. Udah nya sida lalu ngaga empat iti pelasar pirak alai nudukka tiang nya.

³⁷Ke pintu penama ngagai Langkau Kain nya, sida ngaga siti kain tirai ari linin ti alus, bulu bedus ti bechura biru, ungu enggau mirah, lalu dilagu ngena sulam.

³⁸Sida ngaga lima batang tiang ke kain tirai tu. Siti-siti tiang bisi dilekatka pengait. Puchuk enggau batang tiang nya disampak enggau emas, lalu sida ngaga lima iti pelasar temaga ke tiang nya.