Read Iban Pemansut 37 Bible Online

Pemansut 37 - Iban bible

Pemansut 37

¹Besalel ngaga Peti Lampang Batu Adat nya ari kayu akasia. Pemanjai iya 110 sentimeter; buka iya 66 sentimeter, lalu peninggi iya 66 sentimeter.

²Besalel nyampak Peti Lampang Batu Adat nya enggau emas ti tulin, ari luar enggau ari dalam, lalu ngelekatka lilit emas ngelingi Peti nya.

³Iya ngaga empat iti chengkerung emas kena ngesan Peti nya, lalu ngelekatka chengkerung nya ngagai empat iti kaki ke Peti nya, dua iti chengkerung ba tisi siti-siti.

⁴Iya ngaga kayu kena ngesan Peti nya ari kayu akasia, ti disampak iya enggau emas,

⁵lalu dirasukka iya ngagai chengkerung ti ba siti-siti tisi Peti nya.

⁶Iya ngaga tudung ke Peti nya ari emas ti tulin. Pemanjai tudung nya 110 sentimeter, lalu buka iya 66 sentimeter.

⁷Besalel nempa dua iku melikat cherub ti besayap, ari emas,

⁸siku ke tiap iti puting tudung nya. Iya ngaga melikat dua iku nya selajur enggau emas ti dikena ngaga tudung nya empu.

⁹Melikat cherub ti besayap nya betunga mua enggau pangan diri ba atas tudung nya, lalu sayap seduai iya ngerembai mungkur tudung nya.

¹⁰Besalel ngaga mija nya ari kayu akasia. Pemanjai mija nya 88 sentimeter. Buka iya 44 sentimeter, lalu peninggi iya 66 sentimeter.

¹¹Besalel nyampak mija nya enggau emas ti tulin, lalu ngaga lilit emas ngelingi mija nya.

¹²Iya ngaga bingkai, buka 7.5 sentimeter, ngelingi mija nya, lalu ngaga lilit ba semua tisi bingkai nya.

¹³Iya ngaga empat iti chengkerung emas kena ngaling mija nya, lalu ngelekatka chengkerung nya ba empat iti kaki ti ba sukut mija nya.

¹⁴Chengkerung emas ti dikena ngaling mija nya diengkah semak bingkai mija nya.

¹⁵Iya ngaga kayu pengaling ke mija nya ari kayu akasia, ti disampak iya enggau emas.

¹⁶Iya ngaga semua chapak ke mija nya ari emas ti tulin: nyengkaum pinggai, mangkuk, tepayan, enggau mangkuk ti dikena ngenjuk piring wain.

¹⁷Besalel ngaga penuduk lampu ari emas ti tulin, lalu ngaga penuduk enggau batang penuduk lampu nya ari emas ti ditempa. Bungai ti dikena ngias penuduk lampu nya, nyengkaum kuntum enggau serindak bungai, ditempa selajur ari emas ti dikena ngaga penuduk lampu nya empu.

¹⁸Enam iti dan pansut ari tisi penuduk lampu nya, tiga iti ari sepiak-sepiak.

¹⁹Genap iti dan nya bisi tiga iti bungai kena ngias iya, digaga baka gamal bungai almon, ti bisi kuntum enggau serindak.

²⁰Batang penuduk lampu nya bisi empat iti bungai kena ngias iya. Bungai nya baka gamal bungai almon, lalu bisi kuntum enggau serindak.

²¹Siti kuntum digaga ari baruh siti gerempung dan.

²²Kuntum bungai nya, dan iya, enggau penuduk lampu nya ditempa selajur ari siti lumpung emas.

²³Iya ngaga tujuh iti lampu ke penuduk lampu nya, lalu iya ngaga sepit enggau talam ari emas ti tulin.

²⁴Iya ngena 34 kilogram emas ti tulin begagaka penuduk lampu, enggau semua pekekas ke penuduk lampu nya.

²⁵Besalel ngaga siti alta ari kayu akasia, alai nunu menyan. Mija nya besegi empat. Pemanjai iya 45 sentimeter; buka iya 45 sentimeter, lalu peninggi iya 90 sentimeter. Tanduk mija nya, ti ba empat iti sukut mija nya, digaga selajur enggau isi mija nya empu.

²⁶Iya nyampak puchuk, semua empat iti tisi, enggau tanduk mija nya enggau emas ti tulin, lalu ngelekatka lilit emas ngelingi mija nya.

²⁷Iya ngaga dua iti chengkerung emas kena ngaling mija nya, lalu ngelekatka chengkerung nya ari baruh lilit ti ba tisi dua iti, alai ngerasukka kayu ti dikena ngaling mija nya.

²⁸Iya ngaga kayu pengaling ke mija nya ari kayu akasia, ti disampak iya enggau emas.

²⁹ Iya mega ngaga minyak tata ti kudus, enggau menyan ti bebau rengut, dichampur enggau minyak wangi.