Read Iban Pemansut 38 Bible Online

Pemansut 38 - Iban bible

Pemansut 38

¹Besalel ngaga siti alta ari kayu akasia, alai nunu piring. Alta nya besegi empat. Pemanjai iya 2 meter, buka iya 2 meter lalu peninggi iya 1 meter.

²Besalel ngaga tanduk ba atas empat iti sukut alta nya, selajur enggau isi alta nya empu. Iya nyampak semua alta nya enggau temaga.

³Iya mega begagaka semua pekekas ke alta nya: talam alai engkah amau, pekekas kena ngauk amau, mangkuk, pengait, enggau talam alai engkah bara api. Semua pekekas nya digaga ari temaga magang.

⁴Iya ngaga gelegar ari temaga, lalu ngelekatka gelegar nya ari baruh bingkai alta nya, ngenyauh nya ke atas, ngenyauh nya ke baruh.

⁵Iya ngaga empat iti chengkerung kena ngaling alta nya. Chengkerung nya dilekatka iya ba empat iti sukut alta nya.

⁶Iya ngaga kayu pengaling ke alta nya, ari kayu akasia, ti disampak iya enggau temaga.

⁷Kayu pengaling nya dirasukka ngagai chengkerung ti ba tisi alta nya. Alta nya digaga ari papan, lalu berumbang.

⁸ Iya ngaga bisin temaga enggau penuduk ke bisin nya ari cheremin temaga ti diempu bala indu ke bekereja ba penama ngagai Langkau Kain TUHAN.

⁹Iya ngaga tirai kain linin ti alus nyadika dinding ngelingi Langkau Kain TUHAN. Ba tisi ti muak ke selatan, pemanjai tirai nya 50 meter,

¹⁰digantung ari dua puluh batang tiang temaga, ti duduk ba dua puluh iti pelasar temaga, lalu bisi pengait enggau simpai pirak.

¹¹Dinding ke tisi ti muak ke utara sebaka enggau iya ti muak ke selatan, sama panjai 50 meter.

¹²Ba tisi ti muak ke barat, pemanjai kain tirai nya 25 meter, lalu bisi sepuluh batang tiang enggau sepuluh iti pelasar ke tiang nya, sereta bisi pengait enggau simpai pirak.

¹³Ba tisi ti muak ke timur, ba endur alai pintu penama ngagai Langkau Kain nya, pemanjai dinding nya 25 meter.

¹⁴Ba sepiak-sepiak pintu penama nya bisi 7.5 meter kain tirai, enggau tiga batang tiang, enggau tiga iti pelasar.

¹⁶Semua kain tirai ti ngelingi tengah laman nya digaga ari kain linin ti alus magang.

¹⁷Pelasar ke tiang nya digaga ari temaga, lalu pengait, simpai, enggau tutup ke puchuk tiang nya digaga ari pirak magang. Semua tiang ti ngelingi endur nya dipejantilka enggau pangan diri ngena sengkar pirak.

¹⁸Kain tirai ke pintu penama ngagai tengah laman nya digaga ari kain linin, ti ditenun ari bulu bedus ti bechura biru, ungu enggau mirah, lalu disulam. Pemanjai kain tirai nya 10 meter, lalu peninggi iya 2.5 meter, baka dinding ti ngelingi tengah laman nya.

¹⁹Kain tirai nya digantung ari empat batang tiang, ti duduk ba atas empat iti pelasar temaga. Pengait ke tiang nya, tutup puchuk tiang nya, enggau sengkar kena bejantilka tiang nya digaga ari pirak magang.

²⁰Semua tiang bantilka langkau sembiang nya, enggau ke dinding ti ngelingi tengah laman nya, digaga ari temaga magang.

²¹Tu gaya penyampau utai ti dikena ngaga Langkau Kain TUHAN, endur alai nyimpan dua iti lampang batu ti alai Sepuluh Pesan udah ditulis. Utai nya udah dipinta Moses, lalu ditulis orang Lewi ke bekereja di baruh Itamar anak Imam Aron.

²²Besalel anak Uri, uchu Hur, ari raban bansa Judah, ngaga semua utai ti udah diasuh TUHAN.

²³Orang ke nulung iya, Oholiap anak Ahisamak, ari raban bansa Dan, nya endang orang ke tukang ukir, tukang nengkebang, tukang tenun ngena linin ti alus, enggau ngena bulu bedus ti bechura biru, ungu enggau mirah.

²⁴Semua emas ti udah diserahka ngagai TUHAN kena ngaga Langkau Kain TUHAN, berat 1,000 kilogram, ditimbang ngena atur timbang ti udah diletak dalam Langkau Kain TUHAN.

²⁵ Semua pirak ti ulih ari pengawa ti ngitung tubuh orang Israel, berat 3,430 kilogram, ditimbang ngena atur timbang ti udah diletak dalam Langkau Kain TUHAN.

²⁶ Penyampau utai tu sebaka enggau penyampau ti udah dibayar semua orang ke udah ditulis nama lebuh ngitung tubuh. Genap iku sida nya mayar penyampau ti ditetapka nitihka atur timbang ti udah diletak dalam Langkau Kain TUHAN. Pemayuh lelaki orang Israel ke umur dua puluh taun ke atas, ke ditulis nama lebuh ngitung tubuh nya 603,550 iku.

²⁷Ari semua pirak nya, 3,409 kilogram dikena ngaga seratus iti pelasar ke Langkau Kain TUHAN, enggau pelasar ke kain tirai, 34 kilogram ke siti-siti pelasar.

²⁸Dua puluh tiga kilogram teda pirak nya dikena Besalel ngaga simpai enggau pengait ke tiang, enggau tutup ke puchuk tiang.

²⁹Penyampau temaga ti udah diserahka ngagai TUHAN nya 2,425 kilogram.

³⁰Temaga nya dikena ngaga pelasar ke pintu Langkau Kain TUHAN, kena ngaga alta temaga, enggau gelegar ke alta nya, enggau semua pekekas ti dikena ba alta nya,

³¹pelasar ke dinding ti ngelingi tengah laman enggau ke pintu penama ngagai tengah laman nya, sereta enggau semua tiang bantilka langkau sembiang nya, enggau tiang bantilka dinding tengah laman nya.