Read Iban Pemansut 39 Bible Online

Pemansut 39 - Iban bible

Pemansut 39

¹Sida ngaga pekayan ke sida imam ari bulu bedus ti bechura biru, ungu enggau mirah, ngambika bisi dikena sida imam lebuh sida gawa ba Endur ti Kudus. Sida ngaga pekayan imam ke Aron nitihka pesan TUHAN ngagai Moses.

²Sida ngaga epod ari kain linin, bulu bedus ti bechura biru, ungu enggau mirah; enggau ari ubung emas.

³Sida nempa keping emas ti mipis, lalu netak keping emas nya nyadi ubung emas ti alus, ngambika bisi disulamka ngagai kain linin ti alus, enggau ngagai bulu bedus ti bechura biru, ungu enggau mirah.

⁴Sida ngaga dua iti papak tali bau ke epod, lalu ngelekatka papak tali bau nya ngagai tisi epod nya kena nanchang iya.

⁵Belulang ti udah ditenun, ti digaga ari utai ti dikena ngaga epod, dijait ngagai epod nya, ngambika belulang nya selajur enggau epod nya empu, nitihka pesan TUHAN ngagai Moses.

⁶Sida nyendiaka batu unam, lalu ngengkahka batu nya dalam sangkum emas. Nama dua belas iku anak lelaki Jakop udah ditebuk ba batu nya.

⁷Sida ngengkahka batu karnelian ba papak tali bau epod, kena ngingatka dua belas raban bansa orang Israel, nitihka pesan TUHAN ngagai Moses.

⁸Sida ngaga terabai dada ari utai ti dikena sida ngaga epod, lalu disulam sebaka enggau epod nya.

⁹Terabai dada nya besegi empat, lalu dilipat dua. Pemanjai iya 22 sentimeter lalu buka iya 22 sentimeter.

¹⁰Sida ngengkahka empat iti rintai batu ti berega ba terabai dada nya. Rintai ti keterubah ngundan batu akek, batu sebarajat, enggau batu berega ti mirah;

¹¹ba rintai ti kedua, batu samerut, batu nilam, enggau batu intan;

¹²ba rintai ti ketiga, batu pusparagan, batu sejabu, enggau batu matis;

¹³lalu ba rintai ti keempat, batu perusah, batu unam, enggau batu asija.

¹⁴Sigi-sigi batu nya bisi nama siku ari bala anak lelaki Jakop, ti ditebuk ba batu nya, kena ngingatka dua belas raban bansa orang Israel.

¹⁵Ke terabai dada, sida ngaga rantai ari emas ti tulin, ti dibelitka baka tali.

¹⁶Sida ngaga dua iti sangkum emas, enggau dua iti chengkerung emas, lalu ngelekatka chengkerung emas nya ngagai sukut terabai dada nya ti di atas.

¹⁷Sida ngelekatka tali emas ti dua iti nya ngagai dua iti chengkerung emas nya

¹⁸lalu ngelekatka puting tali emas ti ari setak, ngagai sangkum emas ti dua iti nya. Nya meh chara sida nanchangka tali emas di mua, ngagai papak tali bau epod.

¹⁹Sida ngaga dua iti chengkerung emas, lalu ngelekatka chengkerung emas ti dua iti nya ngagai dua iti sukut terabai dada di baruh, ba tisi ti ari dalam, ti semak epod.

²⁰Sida ngaga dua iti da agi chengkerung emas, lalu ngelekatka chengkerung nya ngagai tisi papak tali bau ke epod, ari baruh, semak abi jait epod, ari atas belulang ti ditenun alus.

²¹Nitihka padah TUHAN ngagai Moses, sida nanchangka chengkerung ti ba terabai dada ngagai chengkerung ti ba epod, ngena tali ti biru, ngambika terabai dada nya terengkah ba atas belulang nya, lalu enda ngelechut.

²²Baju panjai ti dibap epod, digaga ari bulu bedus aja.

²³Lubang alai ngerasukka pala, digaga tegap ngena bingkai ti ditenun, ngambika enda charik.

²⁴Ba semua puting baju panjai nya sida ngelekatka buah delima ti digaga ari kain linin ti alus, enggau ari bulu bedus ti bechura biru, ungu enggau mirah, beselat enggau gerunung ti digaga ari emas ti tulin, nitihka pesan TUHAN ngagai Moses.

²⁷Sida ngaga baju ke Aron, enggau ke bala anak lelaki iya,

²⁸enggau labung, selapuk, tanchut pandak ari linin,

²⁹enggau selampai ari linin ti alus, enggau ari bulu bedus ti bechura biru, ungu enggau mirah, lalu disulam, nitihka pesan TUHAN ngagai Moses.

³⁰Sida ngaga, ari emas ti tulin, utai ti dikena ngelagu makota ti kudus nya, lalu sida nebukka leka jaku, “Diserahka Ngagai TUHAN”, ba makota nya.

³¹Sida nanchangka makota nya ba mua labung, ngena tali ti biru, nitihka pesan TUHAN ngagai Moses.

³²Semua pengawa begagaka langkau sembiang dalam Langkau Kain TUHAN pen tembu. Orang Israel udah ngaga semua utai nya nitihka pesan TUHAN ngagai Moses.

³³Sida lalu mai langkau sembiang, enggau semua pekekas iya, pengait iya, ramu langkar, alang dinding, tiang, enggau pelasar ke tiang nya;

³⁴tudung Langkau Kain nya ti digaga ari kulit bedus ti lelaki, dichat mirah; tudung ke Langkau Kain nya ti digaga ari kulit jelu ti digaga alus; kain tirai;

³⁵Peti Lampang Batu Adat ti ngundan lampang batu, kayu ti dikena ngesan Peti nya, enggau tudung Peti nya;

³⁶mija enggau semua pekekas iya, enggau roti ti diberi ngagai Allah Taala;

³⁷penuduk lampu ti digaga ari emas ti tulin, lampu, semua pekekas enggau minyak ke lampu nya;

³⁸alta ti digaga ari emas, minyak tata; menyan ti bebau rengut; kain tirai ke pintu penama ngagai Langkau Kain nya;

³⁹alta enggau gelegar ti digaga ari temaga, kayu ti dikena ngaling alta nya, enggau semua pekekas ke alta nya; bisin alai bebasu, enggau penuduk iya;

⁴⁰kain tirai ti dikena ninding tengah laman, tiang iya, enggau pelasar ke tiang nya; kain tirai ke pintu penama ngagai tengah laman nya, enggau tali bantil sida; tiang bantilka langkau sembiang nya; semua pekekas ti deka dikena dalam langkau sembiang nya, enggau dalam Langkau Kain TUHAN;

⁴¹enggau pekayan ti manah ti deka dikena bala imam dalam Endur ti Kudus, iya nya gari ti kuduska Aron ti nyadi imam, enggau ke bala anak lelaki iya.

⁴²Orang Israel udah ngereja semua pengawa nya betul-betul nitihka pesan TUHAN ngagai Moses.

⁴³Moses meresa semua utai nya, lalu meda semua utai nya udah digaga nitihka asuh TUHAN. Nya alai Moses merekatka utai nya.