Read Iban Pemansut 4 Bible Online

Pemansut 4 - Iban bible

Pemansut 4

¹Lalu ku Moses nyaut TUHAN, “Tang, kati enti orang Israel enda arapka aku, lalu enggai mendingka utai ti disebut aku; nama utai ti tau dikereja aku, enti sida ngumbai Nuan nadai udah kala pegari di mua aku?”

²TUHAN lalu nanya Moses, “Nama utai ba jari nuan nya?” “Tungkat,” ku Moses nyaut.

³Ku TUHAN bejaku, “Tikauka tungkat nya ke tanah.” Lebuh Moses nikauka tungkat nya ke tanah, tungkat nya lalu bebali nyadi ular. Iya lalu surut ari ular nya.

⁴Udah nya TUHAN lalu bejaku baru enggau Moses, “Jengkau lalu ambi ular nya ari iku.” Moses nyengkau lalu nangkap ular nya, lalu ular nya bebali nyadi tungkat baru.

⁵Ku TUHAN bejaku enggau iya, “Kereja nya kena nunjukka ngagai orang Israel TUHAN Allah Taala aki ini sida, Allah Taala ke disembah Abraham, Isak enggau Jakop, sigi amat udah pegari di mua nuan.”

⁶TUHAN lalu bejaku baru ngagai Moses, “Simpan jari nuan ke dalam baju panjai nuan.” Moses lalu ngereja nya. Lebuh iya narit jari iya pansut, jari iya bisi penyakit, bepetik burak, baka seleju.

⁷Udah nya TUHAN lalu bejaku, “Simpan jari nuan baru ke dalam baju panjai nuan.” Moses lalu ngereja nya. Lebuh iya narit jari iya pansut baru, jari iya udah pulai suman baru baka perengka tubuh iya ti bukai.

⁸Ku TUHAN bejaku, “Enti sida enggai arapka nuan, tauka enda arapka kereja ajih ti terubah, utai tu deka ngasuh sida arap.

⁹Enti sida enda arapka nuan lebuh sida meda kereja ajih dua bengkah tu, lalu enti sida enggai mendingka utai ti disebut nuan, ambi ai ari Sungai Nile, lalu bubuhka ai nya ngagai tanah. Ai nya deka bebali nyadi darah.”

¹⁰Tang ku Moses, “Enggai aku, TUHAN. Anang ngasuh aku. Aku enda lanchar bejaku, lalu aku apin nyadi orang ke lanchar bejaku sekumbang Nuan ti udah bejaku ngagai aku. Aku enda lanchar bejaku, lubah sereta kat-kat.”

¹¹Ku TUHAN bejaku ngagai iya, “Sapa meri mensia mulut? Sapa ngasuh iya bengal tauka bisu? Sapa ngasuh iya ulih meda, tauka buta? Aku ti TUHAN.

¹²Nya alai, mupuk nuan! Aku deka nulung nuan bejaku, lalu Aku deka madahka utai ti patut disebut nuan.”

¹³Tang ku Moses nyaut, “Enggai aku, TUHAN. Asuh orang bukai.”

¹⁴TUHAN lalu ringat ngagai Moses. Ku Iya, “Kati ku baka menyadi nuan, Aron, ke ari peturun Lewi? Aku nemu iya lanchar bejaku. Iya diatu baru deka datai betemu enggau nuan, lalu iya deka gaga ati lebuh iya meda nuan.

¹⁵Nuan tau bejaku enggau iya, lalu madahka ngagai iya utai ti disebut Aku. Aku deka nyaup seduai bejaku, lalu Aku deka madahka utai ti patut dikereja seduai.

¹⁶Iya deka bejaku ngagai orang mayuh ngarika nuan. Nya baru nuan deka nyadi baka Allah Taala, madahka ngagai Aron utai ti patut disebut iya.

¹⁷Bai tungkat tu, laban nuan deka ngereja kereja ajih ngena tungkat tu.”

¹⁸Udah nya Moses pulai ngagai mentua iya ti lelaki, Jetro, lalu ku iya bejaku enggau Jetro, “Aku minta nuan ngawakka aku pulai ngagai kaban belayan aku di menua Ejip, deka nemu enti sida agi meruan.” Jetro besetuju lalu meri selamat tinggal ngagai iya.

¹⁹Lebuh Moses agi di Midian, TUHAN bejaku ngagai iya, “Alai nuan pulai baru ngagai menua Ejip, laban semua orang ke deka munuh nuan suba, udah mati magang.”

²⁰Moses lalu mai bini iya, enggau sida anak lelaki iya, nepanka sida ba siku keledai, lalu mupuk sama enggau sida ngagai menua Ejip, mai tungkat ti udah diasuh Allah Taala bai iya.

²¹TUHAN lalu bejaku baru ngagai Moses, “Laban nuan diatu pulai baru ngagai menua Ejip, nuan enda tau enda ngereja di mua raja, semua kereja ajih ngena kuasa ti udah diberi Aku ngagai nuan. Tang Aku deka ngasuh ati raja kieh, ngambika iya enggai nyagi orang Israel angkat ari menua nya.

²²Udah nya, nuan enda tau enda madahka ngagai iya, pasal Aku ti TUHAN, ti udah nyebut, ‘Israel nya anak lelaki Aku ti tuai.

²³ Aku udah ngasuh nuan ngelepaska anak lelaki Aku, ngambika iya ulih nyembah Aku, tang nuan enggai. Diatu Aku deka munuh anak lelaki nuan ke tuai.’ ”

²⁴Ba endur alai sida ke bemalam di rantau jalai ngagai menua Ejip, TUHAN betemu enggau Moses, deka munuh iya.

²⁵Tang bini iya Sipora lalu ngambi siti batu ti tajam, netak kulit ujung butuh anak lelaki iya, lalu negu kaki Moses [8] ngena batu nya. Laban pengawa nya pengawa betutus, nya alai iya nyebut ngagai Moses, “Ngena darah tu aku ngaku nuan nyadika laki aku.” Nya alai TUHAN enda nyadi munuh Moses.

²⁷Lebuh maya nya mega, TUHAN bejaku ngagai Aron, “Alai nuan mansang ngagai menua puang lalu betemu enggau Moses.” Aron lalu mupuk deka betemu enggau Moses ba bukit ti kudus. Lebuh iya betemu enggau Moses, iya nyium Moses.

²⁸Udah nya Moses lalu madahka ngagai Aron semua utai ti udah disebut TUHAN, lebuh TUHAN madahka ngagai iya pasal kereja ajih ti udah diasuh TUHAN kereja iya.

²⁹Moses seduai Aron lalu bejalai ngagai menua Ejip, lalu ngelumuka semua tuai bansa orang Israel.

³⁰Aron lalu madahka semua utai ti udah disebut TUHAN ngagai Moses. Udah nya Moses lalu ngereja semua kereja ajih di mua orang mayuh.

³¹Sida arap, lalu lebuh sida ninga TUHAN udah datai ngagai sida, lalu udah meda pemalat sida kena perinsa, sida meremi lalu nyembah Iya.