Read Iban Pemansut 40 Bible Online

Pemansut 40 - Iban bible

Pemansut 40

¹Ku TUHAN bejaku ngagai Moses,

²“Kena satu hari bulan ti kesatu, dirika langkau sembiang ke Langkau Kain TUHAN.

³Engkahka dalam langkau sembiang nya, Peti Lampang Batu Adat ti ngundan Sepuluh Pesan, lalu gantung kain tirai di mua Peti nya.

⁴Bai mija ngagai langkau sembiang nya, lalu engkahka pekekas ba atas mija nya. Bai mega penuduk lampu ngagai langkau sembiang nya, lalu lekatka lampu ba penuduk lampu nya.

⁵Dirika mija ti digaga ari emas, ti alai nunu menyan, di mua Peti Lampang Batu Adat, lalu gantung kain tirai di mua pintu langkau sembiang nya.

⁶Dirika mija ti alai nunu piring di mua langkau sembiang ke Langkau Kain TUHAN.

⁷Engkah bisin ti dikena bebasu ba entara Langkau Kain TUHAN enggau alta nya, lalu irika ai ngagai bisin nya.

⁸Dirika tirai ngelingi tengah laman nya, lalu gantung tirai ba pintu penama ngagai tengah laman nya.

⁹“Udah nya ambi minyak tata, lalu tata langkau sembiang nya, enggau semua utai ti dalam iya ngambika nyeraraka sida. Semua utai nya nyadi kudus magang.

¹⁰Udah nya, tata alta enggau semua pekekas ke mija nya kena nyerahka iya, ngambika utai nya kudus magang.

¹¹Ngena chara nya mega, serahka bisin ti dikena bebasu enggau penuduk iya.

¹²“Bai Aron enggau bala anak lelaki iya ngagai penama Langkau Kain TUHAN, lalu asuh sida mandi dia.

¹³Rasukka pekayan imam ngagai Aron, tata iya. Nya meh chara nuan nyeraraka iya, ngambika iya tau gawa nyadi imam ke Aku.

¹⁴Bai bala anak lelaki iya, lalu rasukka baju ba sida.

¹⁵Udah nya, tata sida, baka chara nuan ke nata apai sida, ngambika sida tau gawa nyadi imam ke Aku. Enggau minyak tata nya, sida diserahka nyadi imam belama iya.”

¹⁶Moses ngereja semua utai nya nitihka asuh TUHAN.

¹⁷Nya alai, kena satu hari bulan ti kesatu, dalam taun ti kedua sida udah angkat ari menua Ejip, langkau sembiang nya didirika.

¹⁸Moses nanam pelasar ke langkau sembiang nya, nirika papan langkar iya, ngelekatka alang dinding, lalu nirika tiang ke langkau sembiang nya.

¹⁹Iya nganchau tudung ba atas langkau sembiang nya, lalu ngengkahka tudung ti ari luar amat ba atas langkau sembiang nya, betul-betul nitihka asuh TUHAN.

²⁰Udah nya iya ngambi dua iti lampang batu Adat, lalu ngengkahka lampang batu nya dalam Peti Lampang Batu Adat. Iya ngerasukka kayu pengaling Peti ngagai chengkerung Peti, lalu ngengkahka tudung ba atas Peti nya.

²¹Udah nya iya ngengkahka Peti nya dalam langkau sembiang, lalu ngantung kain tirai. Nya meh chara iya ninding Peti Lampang Batu Adat nya, nitihka asuh TUHAN.

²²Iya ngengkahka mija dalam Langkau Kain TUHAN, ba tisi utara langkau sembiang, di luar kain tirai,

²³lalu ngengkahka ba atas mija nya, roti ti diserahka ngagai TUHAN, nitihka asuh TUHAN.

²⁴Iya ngengkahka penuduk lampu dalam Langkau Kain TUHAN, ba tisi selatan, seberai ari mija nya.

²⁵Iya lalu nungkun lampu nya di mua TUHAN, nitihka asuh TUHAN.

²⁶Iya ngengkahka alta emas dalam Langkau Kain TUHAN, di mua kain tirai,

²⁷lalu nunu menyan ti bebau rengut dia, nitihka asuh TUHAN.

²⁸Iya ngantung kain tirai ba pintu penama ngagai langkau sembiang,

²⁹lalu ngengkahka alta alai nunu piring ba mua pintu langkau sembiang ke Langkau Kain TUHAN, lalu ngenjuk piring tunu enggau piring gandum ba alta nya, nitihka asuh TUHAN.

³⁰Iya ngengkahka bisin ti dikena bebasu ba entara Langkau Kain TUHAN enggau alta nya, lalu ngisi bisin nya enggau ai.

³¹Moses, Aron, enggau bala anak lelaki iya masu kaki sida dia

³²genap kali sida tama ngagai Langkau Kain TUHAN, tauka mansang ngagai alta nya, nitihka asuh TUHAN.

³³Moses nirika dinding ngelingi langkau sembiang enggau alta nya, lalu ngantung kain tirai ba pintu penama ngagai tengah laman. Nya meh chara iya nembuka semua pengawa nya.

³⁴ Udah nya mua hari lalu mungkur Langkau Kain TUHAN, lalu mulia TUHAN ngisi endur nya.

³⁵Lalu Moses enda ulih tama ngagai Langkau Kain TUHAN, laban mua hari nya diau ba atas Langkau Kain nya, lalu mulia TUHAN ngemenuhka langkau sembiang.

³⁶Tiap kali mua hari nya angkat ari langkau sembiang nya, orang Israel mindah kem.

³⁷Seagi-agi mua hari nya mengkang ari atas Langkau Kain nya, orang Israel mengkang enda mindah ari endur nya.

³⁸Sekumbang sida ke mindahka kem ari endur siti ngagai endur siti, orang Israel ulih meda mua hari TUHAN ba atas langkau sembiang nya lebuh siang hari, enggau api ti menyadi ari atas langkau sembiang nya lebuh malam hari.