Read Iban Pemansut 6 Bible Online

Pemansut 6 - Iban bible

Pemansut 6

¹Udah nya TUHAN lalu bejaku ngagai Moses, “Diatu nuan deka meda utai ti deka dikereja Aku ngagai raja nya. Aku deka mejalka iya ngelepaska bala nembiak Aku. Aku deka mejalka iya muru sida pansut ari menua tu.”

² Allah Taala lalu bejaku ngagai Moses, ku Iya, “Aku tu TUHAN.

³Aku, Allah Taala ti Pemadu Bekuasa, udah pegari di mua Abraham, ngagai Isak, tang Aku enda ngasuh Diri ditemu sida ngena nama Aku ti kudus, iya nya TUHAN. [9]

⁴Aku mega udah ngaga sempekat enggau sida, besemaya deka meri sida menua Kanaan, menua ti udah alai sida diau nyadi orang kampar.

⁵Diatu Aku udah ninga demuh orang Israel, laban sida udah dipejalka nyadi ulun, lalu Aku ingatka sempekat Aku.

⁶Nya alai, padahka ngagai orang Israel Aku bejaku ngagai sida munyi tu, ‘Aku tu TUHAN. Aku deka ngelepaska lalu nebus kita ari pengidup kita ke nyadi ulun orang Ejip. Aku deka ngedarka lengan Aku ti kering lalu ngukum orang Ejip, lalu Aku deka nebus kita.

⁷Aku deka ngaga kita nyadi nembiak Aku, lalu Aku deka nyadi Allah Taala kita. Kita deka nemu Aku endang TUHAN Allah Taala kita, lebuh Aku ngelepaska kita ari pengidup kita ke nyadi ulun di menua Ejip.

⁸Aku deka mai kita ngagai menua ti udah disemaya Aku ngena sumpah ngagai Abraham, Isak enggau Jakop, lalu Aku deka meri menua nya ngagai kita, nyadika pesaka kita. Aku tu TUHAN.’ ”

⁹Moses lalu madahka jaku nya ngagai orang Israel, tang sida enggai mendingka iya, laban sida nyau lemi semengat ketegal merinsa nyadi ulun.

¹⁰Udah nya TUHAN lalu bejaku ngagai Moses,

¹¹“Alai nuan madahka ngagai raja menua Ejip, iya enda tau enda nejuka orang Israel angkat ari menua iya.”

¹²Tang ku Moses nyaut, “Indah orang Israel deh enggai mendingka aku. Nya alai nama kebuah raja menua Ejip deka mendingka orang ke enda lanchar bejaku baka aku?”

¹³TUHAN lalu bejaku ngagai Moses seduai Aron. Ku Iya, “Padahka ngagai orang Israel enggau ngagai raja menua Ejip, pasal Aku ti udah ngasuh seduai nguluka orang Israel pansut ari menua Ejip.”

¹⁴Reuben, iya nya anak tuai Jakop, bisi empat iku anak lelaki: Hanok, Pallu, Hesron, enggau Karmi. Sida nya nurunka raban peturun ti ngangkatka nama sida.

¹⁵Simeon bisi enam iku anak lelaki: Jemuel, Jamin, Ohat, Jachin, Hanok, enggau Saul. Sida tu diadaka siku indu orang Kanaan. Sida tu nurunka raban peturun ti ngangkatka nama sida.

¹⁶ Lewi bisi tiga iku anak lelaki: Gerson, Kohat, enggau Merari. Sida nya nurunka raban peturun ti ngangkatka nama sida.

¹⁷Gerson bisi dua iku anak lelaki: Libni seduai Simei, lalu seduai tu mayuh peturun.

¹⁸Kohat bisi empat iku anak lelaki: Amram, Isar, Hebron, enggau Usil. Kohat idup ngagai umur 133 taun.

¹⁹Merari bisi dua iku anak lelaki: Mahli seduai Musi. Tu meh bala raban peturun orang Lewi enggau peturun sida.

²⁰Amram jadi enggau menyadi indu apai iya empu, ke benama Jokibit, lalu Jokibit ngadaka Aron seduai Moses. Amram idup ngagai umur 137 taun.

²¹Isar bisi tiga iku anak lelaki: Korah, Nepek, enggau Sikri.

²²Usil mega bisi tiga iku anak lelaki: Misael, Elsapan, enggau Sitri.

²³Aron jadi enggau Elisheba, anak indu Aminadap, menyadi indu Nason. Elisheba ngadaka Nadap, Abihu, Eleasar, enggau Itamar.

²⁴Korah bisi tiga iku anak lelaki: Asir, Elkanah, enggau Abiasap. Sida tu nurunka raban peturun Korah.

²⁵Eleasar anak Aron jadi enggau siku anak indu Putiel, ke ngadaka Pinehas. Sida tu nyadi tuai bilik enggau tuai peturun ari raban bansa Lewi.

²⁶Aron seduai Moses meh orang ke alai TUHAN bejaku, “Bai orang Israel pansut ari menua Ejip.”

²⁷Seduai tu meh orang ke bejaku minta raja menua Ejip ngelepaska orang Israel.

²⁸Ku TUHAN bejaku ngagai Moses di menua Ejip,

²⁹“Aku tu TUHAN. Padahka ngagai raja menua Ejip semua utai ti dipadahka Aku ngagai nuan.”

³⁰Tang ku Moses nyaut TUHAN, “Nuan nemu aku enda lanchar bejaku. Nama kebuah raja deka mendingka aku?”