Read Iban Pemansut 7 Bible Online

Pemansut 7 - Iban bible

Pemansut 7

¹Ku TUHAN bejaku, “Aku deka ngaga nuan nyadi baka Allah Taala di mua raja, lalu menyadi nuan Aron deka bejaku ngagai iya, nyadi nabi nuan.

²Padahka ngagai Aron semua utai ti dipesanka Aku ngagai nuan, lalu iya deka bejaku ngasuh raja ngelepaska orang Israel ngambika sida angkat ari menua Ejip.

³ Tang Aku deka ngasuh ati raja kieh, lalu iya enggai mendingka nuan, taja pen Aku ngereja mayuh macham utai ti tau ngasuh ati takut di menua Ejip. Udah nya baru Aku deka ngukum menua Ejip ngena ukum ti berat, lalu nguluka nembiak Aku pansut ari menua nya.

⁵Orang Ejip deka nemu Aku endang amat TUHAN, lebuh Aku ngedarka jari Aku ngelaban sida, lalu mai orang Israel pansut ari menua sida.”

⁶Moses seduai Aron lalu ngereja utai ti diasuh TUHAN.

⁷Ba maya seduai iya ke bejaku ngagai raja, umur Moses endang udah manggai lapan puluh taun, lalu umur Aron lapan puluh tiga taun.

⁸Ku TUHAN bejaku ngagai Moses seduai Aron,

⁹“Enti raja ngasuh seduai ngereja kereja ajih, asuh Aron mai tungkat iya, lalu nikauka tungkat nya ke tanah, di mua raja, lalu tungkat nya deka bebali nyadi ular.”

¹⁰Moses seduai Aron lalu mansang ngagai raja, lalu ngereja utai ti udah diasuh TUHAN. Aron nikauka tungkat iya ke tanah di mua raja enggau di mua bala pemesai iya, lalu tungkat nya bebali nyadi ular.

¹¹Raja lalu mesanka bala nembiak iya ti bepenemu-dalam, enggau orang ke tau keramat. Sida ngena keramat sida, lalu ngereja utai baka ke dikereja Aron.

¹²Sida nikauka tungkat sida ke tanah, lalu tungkat sida bebali nyadi ular. Tang tungkat Aron nelan tungkat sida.

¹³Tang raja mengkang kieh, lalu munyi ti ku TUHAN, raja enggai mendingka Moses seduai Aron.

¹⁴Udah nya TUHAN lalu bejaku ngagai Moses, “Raja nya kieh amat, lalu enggai ngelepaska nembiak Aku.

¹⁵Nya alai seduai enda tau enda betemu enggau iya pagila, lebuh iya nurun ngagai Sungai Nile. Bai tungkat ti udah bebali nyadi ular, lalu anti iya ba tebing sungai nya.

¹⁶Udah nya sebut ngagai iya, ‘TUHAN Allah Taala orang Hebrew, udah ngasuh aku madahka ngagai nuan, nuan enda tau enda ngelepaska nembiak Iya, ngambika sida ulih nyembah Iya di menua puang. Tang datai ke diatu, nuan mengkang enda mending.

¹⁷ Nya alai, Tuan Raja, diatu TUHAN madahka nuan deka nemu sapa TUHAN, ari utai ti deka dikereja Iya. Peda nuan, aku deka malu ai sungai tu ngena tungkat tu, lalu ai tu deka bebali nyadi darah.

¹⁸Ikan deka mati, lalu sungai tu deka bebau but, datai ke orang Ejip enda ulih ngirup ai tu.’ ”

¹⁹Ku TUHAN bejaku ngagai Moses, “Asuh Aron mai tungkat iya lalu ngedarka tungkat nya atas semua sungai, parit, tali ai, enggau letung di menua Ejip. Ai nya deka bebali nyadi darah. Lalu semua menua Ejip deka dibalut darah, nyengkaum tong kayu enggau benda.”

²⁰Moses seduai Aron lalu ngereja nitihka pesan TUHAN. Di mua raja enggau bala pemesai raja, Aron ngedarka tungkat iya, lalu malu ai sungai nya, lalu semua ai dalam sungai nya bebali nyadi darah magang.

²¹Ikan ti dalam sungai nya mati. Sungai nya lalu balat amat bebau but, datai ke orang Ejip enda ulih ngirup ai ari sungai nya. Semua menua Ejip dibalut darah magang.

²²Udah nya bala orang ke tau keramat lalu ngereja utai baka ke dikereja Aron, ngena penemu keramat sida. Lalu raja mengkang kieh baka selama. Munyi ti ku TUHAN, raja enggai mendingka Moses seduai Aron.

²³Iya nguing lalu pulai ngagai istana, lalu mengkang enggai ibuhka semua utai nya.

²⁴Semua orang Ejip lalu numbak tanah ba sepemanjai tebing sungai nya begigaka ai irup, laban sida enda ulih ngirup ai sungai nya.

²⁵Tu ketujuh hari udah bekau TUHAN malu sungai nya.