Read Iban Jop 10 Bible Online

Jop 10 - Iban bible

Jop 10

¹Aku nyau leju idup. Pendingka pemalat putap aku.

²Anang ngukum aku, O Allah Taala. Padahka penyalah aku ti dikena Nuan bedawaka aku?

³Kati Nuan patut ngemalat nya merinsaka aku? Lalu mechat utai ti udah digaga Nuan Empu? Lalu udah nya tuchum meda pelan orang ke jai?

⁴Kati Nuan meda utai baka chara kami?

⁵Kati umur Nuan pandak baka umur kami?

⁶Nama kebuah Nuan mansik dosa aku Lalu begigaka semua penyalah aku?

⁷ Nuan nemu aku endang nadai penyalah. Nuan nemu orang sigi nadai ulih ngelepaska aku ari jari Nuan.

⁸Jari Nuan Empu ti ngaga nempa aku, Lalu diatu jari nya mega ngerusak aku.

⁹Kingatka Diri ti udah ngaga aku ari tanah liat.[18] Kati Nuan deka nginsarka aku nyadi amau baru?

¹⁰ Nuan udah meri pengering ngagai apai aku, ngambika aku dikandungka. Nuan udah ngasuh aku mansang besai dalam kandung indai aku.

¹¹Nuan udah ngaga tubuh aku ngena tulang enggau rakat Lalu malut tulang nya ngena gumpal isi enggau kulit.

¹²Nuan udah meri aku pengidup enggau pengerindu ti enda berubah Lalu aku idup laban Nuan ngibun aku.

¹³Tang diatu aku nyau nemu, Nuan endang lama udah berunding deka ngemediska aku.

¹⁴Nuan nengkilaka meda enti aku deka bedosa, Ngambika Nuan enggai ngampun aku.

¹⁵Lebuh aku bedosa, aku lalu kena laban penusah ketegal Nuan, Tang lebuh aku ngereja utai ti ngena, aku enda ulih ngangkatka pala diri Laban aku malu, Sereta balat merinsa.

¹⁶Lalu enti aku ulih ngangkatka pala diri Nuan lalu baka singa, ngasu aku. Indah kereja ajih deh dikena Nuan ngelaban aku.

¹⁷Nuan endang seruran bisi saksi ngelaban aku. Pengeringat Nuan ngagai aku mansang balat-sebalat. Nuan endang seruran bekiraka chara kena Nuan nyerang aku.

¹⁸O Allah Taala, nama kebuah Nuan ngelakka aku ada? Aku patut udah mati sebedau orang meda aku,

¹⁹Lalu pansut ari kandung terus ngagai pendam Baka ti nadai kala idup.

²⁰Umur aku nyau deka abis. Anang ngachau aku! Awakka aku ngelantangka diri kala lebuh aku agi idup.

²¹Aku deka mupuk enda lama da agi, lalu enda pulai agi, Mansang ngagai menua ti piam sereta petang,

²²Menua pemetang, alai ayuk enggau penyarut nyadi Alai penampak empu nyadi pemetang.