Read Iban Jop 12 Bible Online

Jop 12 - Iban bible

Jop 12

¹Sigi amat. Nuan bejaku ngarika orang mayuh. Lebuh nuan mati, penemu-dalam ti dikembuan nuan deka ditabanka nuan mati.

³Tang aku nemu berunding baka nuan. Aku enda kurang agi ari nuan. Semua utai ti disebut nuan endang udah ditemu semua orang.

⁴Indah bala pangan aku deh ketawaka aku diatu. Sida ketawa taja pen aku lurus sereta nadai penyalah. Tang suba Allah Taala nyaut sampi aku.

⁵Nuan nadai penusah, tang taja pia nuan beduan aku. Nuan mukut orang ke baru deka rebah.

⁶Tang bala perumpak enggau orang ke enda nangika Allah Taala diau nadai utai ngachau, Taja pen sida manggaika diri ba pengering sida empu.

⁷Indah burung enggau jelu deh ulih ngajar nuan mayuh macham utai.

⁸Uji tanyaka penemu-dalam ari utai ti idup di darat, enggau di tasik.

⁹Semua sida nemu diri udah digaga TUHAN.

¹⁰Allah Taala Empu ke ngatur pengidup utai ti digaga Iya. Allah Taala endang bekuasa atas seput semua mensia.

¹¹Tang baka dilah nuan ti ngasaika penyamai utai ti diempa, Baka nya meh pending nuan deka lantang ninga leka jaku.

¹²Orang ke tuai bisi penemu-dalam, Tang Allah Taala bisi penemu-dalam enggau kuasa. Orang ke tuai bisi runding ti dalam, Tang Allah Taala bisi runding ti dalam sereta bisi kuasa ngereja utai.

¹⁴Lebuh Allah Taala ngeruntuh, sapa ulih nirika utai nya baru, Lalu sapa ulih ngelepaska orang ke ditutup Allah Taala dalam rumah jil?

¹⁵Kemarau nyadi lebuh Allah Taala nagang hari ujan. Bah nyadi lebuh Allah Taala ngasuh hari ujan.

¹⁶Allah Taala endang kering sereta seruran menang. Orang ke ditipu enggau orang ke nipu endang di baruh kuasa Iya.

¹⁷Iya muai penemu-dalam ari bala pemerintah Lalu ngasuh bala tuai nyadi baka orang ke beli.

¹⁸Iya muai raja ari kerusi diraja sida, lalu ngejil sida.

¹⁹Iya ngemaruhka bala imam enggau orang ke bekuasa.

²⁰Iya ngasuh orang ke tau dikarapka, badu agi bejaku, Lalu muai penemu-dalam ari orang ke tuai.

²¹Iya mechat orang ke megai kuasa Lalu muai pengering bala pemerintah.

²²Iya ngasuh penampak manchar ba endur ti pemadu petang.

²³Iya ngasuh mayuh bengkah bansa kering sereta bekuasa, Tang udah nya Iya ngalahka sida lalu ngerusak sida.

²⁴Iya ngasuh bala tuai sida beli Lalu nejuka sida segau-segau, charut runding sereta tesat.

²⁵Sida bejalai gama-gama dalam petang, Guir-guir baka orang ke mabuk.