Read Iban Jop 13 Bible Online

Jop 13 - Iban bible

Jop 13

¹Mata aku udah meda semua utai tu. Pending aku udah ninga lalu meretika utai nya.

²Utai ti ditemu nuan mega ditemu aku. Aku enda kurang ari nuan.

³Tang aku deka bejaku enggau Allah Taala, ukai enggau nuan. Aku deka bejaku enggau Iya pasal pekara aku.

⁴Nuan ngena pemula ngelalaika diri enda nemu utai. Nuan tu baka lutur ti enda nemu ngeraika orang.

⁵Anang bejaku, nya baru orang ngumbai nuan bepenemu-dalam!

⁶Pendingka aku lebuh aku madahka pekara aku.

⁷Nama kebuah nuan bula? Kati nuan ngumbai pemula nuan ulih mai penguntung ngagai Allah Taala?

⁸Kati nuan nguji bejaku ngarika Allah Taala? Kati nuan deka bejaku ngarika Iya dalam kot?

⁹Enti Allah Taala meresa nuan, bisi enda ke Iya tetemuka utai ti manah ba nuan? Kati nuan ngumbai diri ulih ngemelika Allah Taala, baka nuan ke ngemelika mensia?

¹⁰Taja pen nuan belalai bepilih mata, Iya deka nganu nuan,

¹¹lalu kuasa Iya deka ngenakutka nuan.

¹²Jaku-dalam ti disebut nuan nadai guna baka amau. Jaku kelakar nuan lemi baka tanah liat.

¹³Anang bemunyi, lalu beri aku peluang bejaku. Awakka utai nyadi ari jaku nya.

¹⁴Aku sedia deka berambunka nyawa aku.

¹⁵Aku nadai utai diadang agi, nya alai enda ngawa enti Allah Taala munuh aku. Aku deka bejaku ngarika diri empu di mua Iya.

¹⁶Kada enda pemerani aku ulih ngelepaska aku, laban nadai orang ke jai berani bediri di mua Allah Taala.

¹⁷Diatu pendingka jaku penerang ari aku.

¹⁸Aku sedia deka mantaika pekara aku, laban aku nemu diri endang ngena.

¹⁹Allah Taala, kati Nuan datai deka nyalah aku? Enti pia, aku sedia enggai bejaku lalu mati.

²⁰Awakka aku minta dua bengkah utai. Enti Nuan besetujuka utai nya, nya baru aku enda belalai ari Nuan.

²¹Badu agi ngukum aku, lalu badu agi ngemba aku.

²²Bejaku dulu, O Allah Taala, ngambika aku nyaut. Tauka, awakka aku bejaku, lalu Nuan nyaut.

²³Nama dosa aku? Nama penyalah aku? Nama penyalah aku ti dikena Nuan bedawaka aku?

²⁴Nama kebuah Nuan ngelalaika mua Nuan ari aku? Nama kebuah Nuan ngaga aku baka munsuh?

²⁵Kati Nuan nguji ngemba aku? Aku tu orang ke nadai guna, semina daun ti dikebuka ribut. Nuan nyerang sebatang rumput ti rangkai.

²⁶Nuan balat amat nyalah aku. Indah penyalah ti dikereja aku lebuh aku agi biak, deh dikingatka Nuan semua.

²⁷ Nuan nanchang kaki aku ngena rantai. Nuan nengkilaka genap singkang aku. Indah bekau kaki aku deh abis diperesa Nuan.

²⁸Ketegal nya, aku nyau repuk baka kayu ti buruk, baka baju ti abis diempa gegat.