Read Iban Jop 14 Bible Online

Jop 14 - Iban bible

Jop 14

¹ Semua kitai tu endang ada lemi sereta nadai daya magang. Semua kitai endang enda panjai umur sereta ditinggang penusah seumur idup.

²Kitai mansang besai tuai lalu jampat layu baka bungai. Kitai lesap baka ayuk.

³Kati Nuan deka malik ngagai aku, Allah Taala? Tauka, nyara lalu ngakim aku?

⁴Nadai utai ti tuchi ulih pansut ari utai ti enda tuchi baka mensia.

⁵Umur mensia endang udah diletak Nuan. Penyampau bulan alai mensia idup endang udah ditetapka Nuan. Nuan endang udah ngeletak utai nya, lalu utai nya enda ulih diubah.

⁶Anang malik ngagai kami, lalu anang ngachau kami.[19] Awakka kami ngelantangka diri idup merinsa, enti kami ulih.

⁷Kayu ti udah ditebang, agi bisi pengadang. Iya tau nelesak lalu tumbuh baru.

⁸Taja pen urat iya nyau tuai, lalu pugu iya mati,

⁹tang enti iya dipanjah, iya deka nelesak baru baka kayu ti muda.

¹⁰Tang kami mati, lalu nya meh pengujung kami. Lebuh kami mati, dini alai kami?

¹¹Baka sungai ti badu agi rarat, enggau danau ti rangkai,

¹²baka nya meh mensia mati, lalu enda angkat agi. Sida enda dani, seagi-agi langit meruan bisi. Sida enda ulih dani.

¹³Naka meh pemanah enti Nuan ngelalaika aku di dunya pemati. Awakka aku dilalaika nyentuk ngagai maya Nuan badu agi ringat. Udah nya, letak meh maya alai Nuan ngingatka aku.

¹⁴Enti orang mati, kati iya ulih angkat idup baru? Tang aku deka nganti maya ti manah agi, nganti maya penusah tu abis.

¹⁵Nya baru Nuan deka ngangau, lalu aku deka nyaut, lalu Nuan deka gaga ati ke aku, ti udah digaga Nuan.

¹⁶Udah nya baru Nuan deka nengkilaka genap singkang aku, tang enda nyidi dosa aku.

¹⁷Nuan deka ngampun lalu muai dosa aku. Nuan deka muai semua penyalah aku.

¹⁸Maya deka datai alai bukit deka runtuh lalu tingkah deka dibuai.

¹⁹Ai deka numpurka batu, lalu ujan ti bangat deka nusurka tanah. Nya meh jalai Nuan ngerusak pengadang dalam pengidup kami.

²⁰Nuan ngalahka kami, lalu muai kami belama iya. Mua kami ngerecham lebuh kami mati.

²¹Bala anak kami bulih basa, tang kami enda nemu nya, lalu orang pen nadai mega madahka ngagai kami, lebuh sida kena pechat.

²²Kami semina natka tubuh diri ti pedis enggau ati ti tusah.