Read Iban Jop 15 Bible Online

Jop 15 - Iban bible

Jop 15

¹Jaku nya nadai reti, Jop! Nadai reti!

³Nadai orang ke bepenemu-dalam deka bejaku munyi nuan tauka bejaku ngarika diri empu ngena leka jaku ti nadai reti.

⁴Enti nitihka peneka ati nuan, nadai orang deka nangika Allah Taala, lalu nadai mega orang deka besampi ngagai Iya.

⁵Penyai nuan nyata ari utai ti disebut nuan. Nuan nguji ngelalaika penyai diri ngena pemintar nuan bejaku.

⁶Aku enda ibuh ngukum nuan. Nuan diukum genap leka jaku ti disebut nuan empu.

⁷Kati nuan ngumbai diri orang ke terubah ada? Kati nuan bisi dia lebuh Allah Taala ngaga bukit?

⁸Kati nuan bisi ninga pelan ti digaga Allah Taala? Kati penemu-dalam semina bisi ba nuan siku aja?

⁹Nadai utai ti ditemu nuan, ti enda ditemu kami.

¹⁰Kami belajarka penemu-dalam ari orang ke buban bulu pala, orang ke dulu agi ada ari apai nuan.

¹¹Allah Taala deka ngelantangka ati nuan. Nama kebuah nuan agi nulak nya? Kami udah bejaku ngarika Iya ngena jaku ti alus.

¹²Tang nuan isin, lalu melutka mata merening ngagai kami.

¹³Nuan ringat ngagai Allah Taala, lalu ngelaban Iya.

¹⁴ Kati mensia ulih nyadi chukup tuchi? Kati orang ulih nyadi lurus di mua Allah Taala?

¹⁵Indah bala melikat Iya deh enda dipechayaka Iya. Indah sida nya deh enda tuchi ba mata Iya.

¹⁶Kitai ngirup penyai baka ke ngirup ai. Sigi amat. Kitai tu jai. Kitai tu nadai guna.

¹⁷Jop, diatu pendingka utai ti ditemu aku.

¹⁸Orang ke bepenemu-dalam udah ngajar utai ti bendar ngagai aku utai ti udah dipelajarka sida ari aki ini sida, lalu sida enda ngelalaika utai ti resia.

¹⁹Menua sida nadai orang kampar. Orang nadai mai sida ninggalka Allah Taala.

²⁰Orang ke jai, ke nekanka pengidup orang bukai deka natka pemerinsa seumur idup.

²¹Nyawa ti ngemba deka merak ba pending sida, lalu bala penyamun deka nyerang sida lebuh sida ngumbai diri likun.

²²Sida nadai jalai ngarapka diri ulih rari ari pemetang, laban siti pedang benung nganti, deka munuh sida,

²³lalu bala burung benung nganti, deka makai bangkai sida. Sida endang nemu diri deka merinsa.

²⁴Penusah ti besai, baka raja ti bekuasa, benung nganti deka nyerang sida.

²⁵Nya meh pengujung orang ke ngenggam lalu ngedarka jari ngelaban Allah Taala lalu nyakap Iya ti Pemadu Bekuasa.

²⁶Sida tu sumbung sereta seruran angkat ngelaban. Sida kieh lalu ngedarka terabai sida lalu belanda mansang ngelaban Allah Taala.

²⁸Sida nya meh orang ke ngalahka nengeri ti besai lalu ngerampas rumah ti udah ditinggalka orang rari. Tang semua nengeri enggau rumah nya deka dirusak lebuh maya perang.

²⁹Sida enda ulih lama kaya. Nadai utai ti dikembuan sida ulih tan lama. Indah ayuk sida deh deka lesap,

³⁰lalu sida enda ulih ngerarika diri ari pemetang. Sida deka nyadi baka dan kayu ti ditunu api, enggau bungai[20] ti dikebuka ribut.

³¹Enti sida chukup beli lalu arapka penyai, penyai meh deka nyadika upah sida.

³²Sebedau sida mati, sida deka layu,[21] layu baka dan, lalu enda ulih idup baru.

³³Sida deka nyadi baka batang anggur ti gugur buah puda, baka kayu kana ti gugur bungai.

³⁴Orang ke enda arapka Allah Taala, nadai peturun, lalu api deka ngerusak rumah ti digaga ngena chara makai suap.

³⁵Sida bekira deka ngaga pengachau, enggau ngereja penyai. Ati sida seruran deka nipu.