Read Iban Jop 16 Bible Online

Jop 16 - Iban bible

Jop 16

¹Aku bisi udah ninga jaku ti munyi nya suba. Jaku ti dikena kita merindang aku semina ngasuh ati aku merinsa ngapa.

³Kati kita enda nemu ngetu bejaku? Kati kita enda tau enda nyadi orang ke pengabis dudi badu bejaku?

⁴Enti sema kita baka aku, lalu aku baka kita, aku pen ulih meh mansutka jaku munyi kita, nemu ngilikka pala baka orang ke bepenemu-dalam lalu ngujan kita ngena leka jaku.

⁵Aku ulih ngeringka kita ngena jaku ajar lalu enda ngetu bejaku merindang kita.

⁶Tang utai ti disebut aku nadai ulih nyaup aku, lalu enti aku enda engkeretik, nadai ga nya ulih ngasuh aku badu agi pedis.

⁷Allah Taala, diatu Nuan udah ngasuh aku lelak. Nuan udah nejuka kami sebilik dibunuh.

⁸Nuan udah nangkap aku. Nuan tu munsuh aku. Aku tu semina tinggal kulit enggau tulang aja, lalu orang ngumbai nya nunjukka penyalah aku.[22]

⁹Allah Taala ringat, lalu nyarikka tubuh aku. Iya begedika aku lalu melutka mata merening ngagai aku.

¹⁰Orang enchebirka mulut ngeleseka aku. Sida besedul bekelingika aku, lalu nampar mua aku.

¹¹Allah Taala udah nyerahka aku ngagai jari orang ke jai.

¹²Sebedau nya, aku udah diau nadai utai ngachau, tang Allah Taala nyekal rekung aku, mangkaka aku, lalu ngeredakka aku. Allah Taala ngaga aku nyadika alai Iya belajar nimbakka laja,

¹³lalu Iya nimbakka laja ngagai aku ari semua endur, laja ti ngebuska isi lalu ngemakalka aku, tang taja pia Iya mengkang enda sinu ati ke aku.

¹⁴Iya enda ngetu-ngetu ngemakalka aku. Iya nyerang aku baka soldadu ti gila laban pemenchi.

¹⁵Aku ngulit lalu begari ngena kain guni, lalu duduk ditu malai amau laban aku alah.

¹⁶Aku nyabak datai ke mua aku nyau mirah, lalu mata aku nyau bangkung,

¹⁷tang aku nadai ngaga ulah ti kasar lalu sampi aku ngagai Allah Taala endang amat.

¹⁸O dunya! Anang ngelalaika utai ti salah ti udah dikereja orang ngagai aku! Anang mampul kangau aku ke minta atur ti lurus!

¹⁹ Di serega bisi siku orang ti deka bejaku ngarika aku, lalu setanah enggau aku.

²⁰Bala pangan aku ngelanyaika aku. Aku nyabak minta tulung Allah Taala.

²¹Aku begunaka orang bejaku ngarika aku ngagai Allah Taala, baka ke bejaku ngarika pangan.

²²Umur aku nyau deka abis, lalu aku enda pulai agi.