Read Iban Jop 18 Bible Online

Jop 18 - Iban bible

Jop 18

¹Jop, kati nuan enda nemu ngetu bejaku? Enti nuan ngetu bejaku lalu mending, nya baru kami ulih bejaku enggau nuan.

³Nama kebuah nuan ngumbai kami tu beli baka sapi?

⁴Nuan semina ngemediska diri empu aja ringat baka nya. Kati dunya tu deka nadai orang nguan laban nuan ringat? Kati Allah Taala deka nginsitka bukit kena ngemuaska ati nuan?

⁵ Penampak orang ke jai ulih dipadamka. Api iya enda ulih menyadi agi.

⁶Lampu ti dalam langkau kain sida deka piam.

⁷Sida amat kering bejalai, tang diatu sida tesangkut. Sida rebah, dipanjuk jaku lalau sida empu.

⁸Sida bejalai nempuh jarin, lalu kaki sida kena sintak.

⁹Panjuk nyintak tumbit sida, lalu nanchang sida.

¹⁰Amba dilalaika ba tanah. Panjuk udah ditan ba jalai ti ditengah sida.

¹¹Sida dikelingi utai ti balat ngenakut. Utai nya betitihka sida genap kali sida nyingkang.

¹²Dulu menya sida udah kaya, tang diatu sida lapar. Penusah ti besai bediri, lalu nganti ngimbai sida.

¹³Penyakit ti tau munuh nyelamar ba sebelah tubuh sida lalu ngasuh jari enggau kaki sida buruk.

¹⁴Sida ditarit ari langkau kain ti alai sida diau likun, lalu sida diirit ngagai Raja Pemati.

¹⁵Diatu langkau kain sida nadai utai agi, merirang lalu ditaburka dalam langkau kain sida.[24]

¹⁶Urat enggau dan sida layu lalu rangkai.

¹⁷Sida nadai agi didinga rita di menua tu enggau di menua bukai. Orang nadai agi ingatka sida.

¹⁸Sida deka diburu ari menua orang ke idup, diburu ari penampak ngagai pemetang.

¹⁹Sida nadai peturun, nadai telesak.

²⁰Ari timur nyentuk ke barat, semua orang ninga penusah sida lalu getar-getar takut.

²¹Nya meh pengujung orang ke jai, pengujung orang ke enda nangika Allah Taala.