Read Iban Jop 19 Bible Online

Jop 19 - Iban bible

Jop 19

¹Nama kebuah nuan enda ngetu-ngetu merinsaka aku ngena jaku?

³Nuan seruran mechat aku, lalu enda nemu malu ke jalai nuan ngayahka aku.

⁴Enti sema aku bisi udah ngereja penyalah baka ni ku nya tau ngawa nuan?

⁵Nuan ngumbai diri manah agi ari aku, lalu ngumbai penusah aku tu nunjukka aku udah ngereja penyalah.

⁶Kati nuan enda nemu, semua utai tu udah dikereja Allah Taala? Iya udah nan panjuk kena Iya nyintak aku.

⁷Aku nyakal ulah Iya ti kasar, tang nadai orang mendingka aku. Nadai orang ninga aku minta atur ti lurus.

⁸Allah Taala udah mempang jalai aku, lalu aku enda ulih nengah jalai nya. Iya udah ngelalaika jalai aku dalam pemetang.

⁹Iya udah ngambi semua pengaya aku lalu ngerusak pemanah nama aku.

¹⁰Iya malu aku ba sebelah tubuh. Iya nyabut pengadang aku baka ke nyabut kayu lalu ninggalka aku layu lalu mati.

¹¹Allah Taala ringat lalu ngeransi ngelaban aku. Iya ngaga aku baka munsuh ti pemadu jai.

¹²Iya ngasuh bala soldadu Iya nyerang aku. Sida ngaga parit ngelulung langkau kain aku.

¹³Allah Taala udah nyungkak bala kami sebilik ninggalka aku. Aku nyau nyadi orang kampar ba orang ke ngelala aku.

¹⁴Kaban belayan enggau bala pangan aku nyau nadai agi.

¹⁵Orang ke nyadi temuai dalam rumah aku nyau nadai agi ingatka aku. Bala orang gaji aku ti indu ngaga aku baka orang kampar enggau baka orang bansa bukai.

¹⁶Lebuh aku ngangauka orang gaji aku, iya enda nyaut taja pen aku minta iya nulung aku.

¹⁷Bini aku enda tan nyium bau kesuh seput aku, lalu sida menyadi lelaki aku enggai datai semak ngagai aku.

¹⁸Bala anak mit enda bebasaka aku, lalu ketawa lebuh sida meda aku.

¹⁹ Pangan rapat aku kejika aku. Orang ke pemadu dikerinduka aku, udah nguing ngelaban aku.

²⁰Aku tu semina tinggal kulit enggau tulang aja. Aku nyau deka enda ulih ngidupka nyawa diri.

²¹Kita tu pangan aku! Kasihka aku! Jari Allah Taala udah nyamah aku.

²²Nama kebuah kita merinsaka aku baka chara Allah Taala? Kati kita enda udah chukup merinsaka aku?

²³Naka meh pemanah enti orang bisi ngingatka jaku aku lalu nuliska jaku nya dalam bup!

²⁴Tauka nebukka leka jaku nya ba batu ngena pat ngambika tan belama iya.

²⁵Laban aku nemu, aku bisi siku pengari ti idup ti deka bejaku ngarika aku ba pengujung dunya ila.

²⁶Lalu lebuh kulit aku udah abis diempa penyakit, ngena tubuh tu[25] aku deka meda Allah Taala

²⁷ngimbai aku, lalu mata aku empu deka meda Iya ukai meda orang kampar. Ati enda sabar nganti!

²⁸Enti kita nyebut, “Baka ni ku jalai kitai deka merinsaka iya?” Lalu nyebut, “Semua pekara tu bepun ba iya magang”;

²⁹kita patut takutka pedang, laban pedang mai pengeringat Allah Taala, ngambika kita nemu, Allah Taala Empu ke ngakim mensia.