Read Iban Jop 2 Bible Online

Jop 2 - Iban bible

Jop 2

¹Lebuh bala orang serega datai baru ngadap TUHAN, Sitan bisi mega datai enggau sida.

²TUHAN lalu nanya Sitan, “Datai ari ni nuan?” Sitan lalu nyaut, “Aku udah bejalai kia-kia, segau-segau nengah dunya.”

³TUHAN lalu nanya Sitan, “Kati nuan bisi udah berundingka nembiak Aku Jop? Nadai orang dalam dunya tu badas sereta lurus baka iya, ke nangika Allah Taala sereta enggai ngereja penyai. Iya agi majak diau lurus, taja pen nuan udah nyungkak Aku ngelaban iya, lalu ngerusak iya enggau nadai kebuah.”

⁴Ku Sitan nyaut TUHAN, “Mensia deka ngelengkaka semua utai, asal nyawa iya idup.

⁵Tang enti nuan ngemediska iya, lalu negu tulang enggau isi iya, iya tentu deka nyumpah Nuan mua mata!”

⁶TUHAN lalu bejaku, “Barang ku jaku, iya ba jari nuan, tang nuan enda tau munuh iya.”

⁷Udah nya Sitan lalu ninggalka TUHAN, lalu ngasuh penyakit rumbak nyelamar ba sebelah tubuh Jop.

⁸Jop mupuk lalu duduk ba endur alai orang ke muai uras, lalu ngambi kerimpak periuk kena iya ngikis tubuh diri.

⁹Ku bini iya bejaku enggau iya, “Kati nuan agi mengkang tetap ati? Nama kebuah nuan enda nyumpah Allah Taala, lalu mati?”

¹⁰Disaut Jop, “Nuan bejaku munyi indu ke beli! Kati kitai semina nerima utai ti manah ari jari Allah Taala, lalu enggai nerima utai ti jai?” Dalam semua utai nya Jop nadai bedosa ngena mulut iya.

¹¹Jop bisi tiga iku pangan. Sida nya Elipas, ari nengeri Teman, Bildat, ari menua Suah, enggau Sopar, ari menua Naamah. Lebuh sida ninga Jop balat merinsa, sida berunding deka nemuai lalu merindang iya.

¹²Lebuh sida tepedaka Jop ari jauh, sida nyau enda ngelala iya agi. Lebuh sida nyau ngelala iya, sida lalu bekeduie nyabak, nyarikka gari diri, lalu ngerabuka amau ngagai pala sida, laban sida balat tusah ati.

¹³Udah nya sida lalu duduk enggau iya tujuh hari tujuh malam, nadai bejaku seleka, laban sida meda iya kelalu balat merinsa.