Read Iban Jop 22 Bible Online

Jop 22 - Iban bible

Jop 22

¹ Kati orang bisi tau diguna Allah Taala, nyengkaum orang ke pemadu pintar?

³Kati Allah Taala bisi penguntung enti nuan ngereja utai ti lurus? Kati pemadas pendiau nuan ulih mai penguntung ngagai Allah Taala?

⁴Nuan dianu lalu diakim Allah Taala ukai laban nuan nangika Allah Taala

⁵tang laban nuan udah balat bedosa ketegal semua penyai ti dikereja nuan.

⁶Kena nuan mejalka menyadi nuan mayar utang iya, nuan ngambi gari iya, lalu nejuka iya nadai gari dikena.

⁷Nuan enggai meri ai ngagai orang ke aus, lalu enggai meri orang ke lapar makai.

⁸Nuan ngerampas semua menua ngena kuasa enggau pangkat nuan.

⁹Nuan ukai semina enggai nulung indu ke balu, tang nuan mega ngerumpak sereta merinsaka orang ke nadai apai indai.

¹⁰Nya alai, diatu nuan dikelingi panjuk, lalu nuan ngenyit takut.

¹¹Hari nyau balat amat petang datai ke nuan nyau enda ulih meda utai, lalu bah besai ngelamun nuan.

¹²Kati Allah Taala enda diau di serega ti pemadu tinggi lalu nilik ke baruh ngagai bintang, taja pen sida nya ba endur ti tinggi?

¹³Lalu ku nuan nanya, “Nama utai ti ditemu Allah Taala? Iya dilindung mua hari, nya alai baka ni ku iya ulih ngakim kitai?”

¹⁴Nuan ngumbai mua hari ti tebal ulih ngasuh Iya enda ulih meda, lebuh Iya bejalai ba kebung langit.

¹⁵Kati nuan mutus ati deka bejalai nengah jalai ti seruran ditengah orang ke jai?

¹⁶Indah sebedau timpuh datai deh sida anyut ditabanka ai bah.

¹⁷Ku sida bejaku ngagai Allah Taala, ‘Anang ngachau kami,’ lalu ku sida bejaku, ‘Nama utai ti ulih dikereja Allah Taala ti Pemadu Bekuasa[27] ngagai kitai?’

¹⁸Tang iya ti bendar, Allah Taala Empu ke ngasuh sida nyadi kaya-raja. Aku sigi kejika pelan orang ke jai.

¹⁹Orang ke badas, gaga ati, lalu orang ke nadai penyalah, ketawa lebuh sida meda orang ke jai diukum.

²⁰Semua utai ti dikemisi orang ke jai, dirusak magang, lalu api nganguska utai bukai ti tinggal.

²¹Jop, manah nuan bebaik enggau Allah Taala, lalu badu agi ngaga Iya nyadi munsuh, nya baru Iya deka merekatka nuan.

²²Terima meh ajar ti diberi Iya. Simpan leka jaku Iya dalam ati nuan.

²³Sigi amat. Nuan enda tau enda ngemaruhka diri lalu pulai baru ngagai Allah Taala lalu badu agi ngereja penyai ti dikereja dalam rumah nuan.

²⁴Buai semua emas nuan. Buai emas nuan ti pemadu tulin ngagai buntut sungai ti rangkai.

²⁵Awakka Allah Taala ti Pemadu Bekuasa nyadika emas nuan, lalu awakka Iya nyadika pirak nuan.

²⁶Nya baru nuan deka seruran manggaika pengarap nuan ba Allah Taala lalu nemu Iya endang penatai pengaga nuan.

²⁷Lebuh nuan besampi, Iya deka nyaut nuan, lalu nuan deka ngamatka sumpah ti udah digaga nuan.

²⁸Nuan deka mujur dalam semua utai ti dikereja nuan, lalu penampak deka manchar ba jalai ti ditengah nuan.

²⁹Allah Taala ngemaruhka orang ke sumbung lalu ngidupka orang ke baruh ati.

³⁰Iya deka ngelepaska nuan, enti nuan nadai penyalah,[28] enti nuan ngereja utai ti ngena.[29]