Read Iban Jop 23 Bible Online

Jop 23 - Iban bible

Jop 23

¹Aku agi angkat ngelaban, sereta mutap ngelaban Allah Taala. Aku enda tetagangka diri bedemuh.

³Naka meh pemanah enti aku tetemuka endur alai aku ulih nemu Allah Taala, lalu nemu chara datai ngagai endur alai Iya.

⁴Aku deka mantaika pekara aku di mua Iya lalu mantaika semua penemu kena aku bejaku ngarika diri empu.

⁵Aku keran deka nemu utai ti deka disebut Iya enggau chara Iya nyaut aku.

⁶Kati Allah Taala deka ngelaban aku enggau pengabis pengering Iya? Enda. Iya deka mending lebuh aku bejaku.

⁷Aku endang betul ati, lalu aku ulih berandau enggau Allah Taala. Iya deka ngumbai aku nadai penyalah sekali aja enggau ke belama iya.

⁸Aku udah begigaka Allah Taala di timur, tang Iya nadai dia. Aku nadai tetemuka Iya lebuh aku ngiga Iya di barat.

⁹Allah Taala udah bekereja di utara enggau di selatan, tang aku mengkang nadai meda Iya.

¹⁰Tang taja pia, Allah Taala nemu genap singkang aku. Enti Iya ngabas ati aku, Iya deka nemu ati aku tuchi.

¹¹Enggau ati ti tetap aku nengah jalai ti dipilih Iya lalu aku enda sekali-kali limpang ari jalai nya.

¹²Aku seruran ngereja utai ti diasuh Allah Taala. Aku nitihka peneka Iya.

¹³Allah Taala endang enda berubah. Nadai orang ulih nyakal penemu Iya tauka nagang Iya ngereja utai ti deka dikereja Iya.

¹⁴Iya deka ngamatka utai ti udah diperambu Iya ke aku. Perambu nya siti ari pemayuh pelan Iya.

¹⁵Aku getar-getar takut di mua Iya.

¹⁶Allah Taala ti Pemadu Bekuasa udah ngerusak pemerani aku. Allah Taala Empu ke ngasuh aku takut, ukai pemetang, taja pen pemetang udah ngasuh aku enda ulih meda.