Read Iban Jop 24 Bible Online

Jop 24 - Iban bible

Jop 24

¹Nama kebuah Allah Taala enda ngeletak maya ngakim, hari alai Iya ngayanka atur ti lurus ngagai orang ke betuaika Iya?

²Orang nginsitka kelai entara ngambika tanah sida besai agi. Sida ngenchuri jelu bedus, lalu nyimpan jelu nya ba raban jelu sida empu.

³Sida ngambi keledai orang ke nadai apai indai, lalu nyimpan jelu sapi ti diempu indu ke balu nyentuk ngagai maya indu nya ulih mayar utang iya.

⁴Sida nagang orang ke seranta nerima hak diri lalu mejalka orang ke seranta rari lalu belalai.

⁵Nya alai orang ke seranta nyau baka jelu keledai begigaka pemakai di menua puang. Sida nadai endur bukai alai sida begigaka pemakai ke bala anak sida.

⁶Sida dipejalka ngetau ba umai orang bukai,[30] lalu begumpulka buah anggur ari kebun anggur orang ke jai.

⁷Lebuh malam hari sida tinduk enda bepua, sereta nadai utai kena ngangatka tubuh.

⁸Sida basah laban ujan ti labuh ba bukit, lalu sida engketut belindung ngimbai batu.

⁹Orang ke jai beulunka anak mit ti nadai apai indai, lalu ngambi bala anak orang ke seranta nyadika bayar utang sida.

¹⁰Tang orang ke seranta gawa nadai diberi gari. Sida enda diberi makai lebuh sida ngetau gandum.

¹¹Sida diasuh mitan buah kana ngulihka minyak, lalu mitan buah anggur ngulihka wain, tang sida empu aus.

¹²Dalam mayuh bengkah nengeri orang ke bakal enggau orang ke nyau deka mati ngangau enggau sabak, tang Allah Taala enggai ibuhka sampi sida.

¹³Orang nulak penampak. Sida enda meretika penampak, lalu enda nitihka iya.

¹⁴Orang ke pemunuh angkat dini hari lalu bebunuhka orang ke seranta, lalu lebuh malam hari, iya ngenchuri.

¹⁵Orang ke butang nganti hari petang. Iya ngelalaika mua diri ngambika orang enda ngelala iya.

¹⁶Penchuri tama ngagai rumah orang lebuh malam hari, tang lebuh siang hari sida belalai, ngerarika diri ari penampak.

¹⁷Sida takutka penampak siang hari, tang sida enda takutka pemetang.

¹⁸[31]Orang ke jai anyut ditabanka ai bah, lalu tanah sida disumpah Allah Taala. Sida nadai agi bekereja dalam kebun anggur sida empu.

¹⁹Sida lela baka seleju ti dipanchar mata hari, enggau laban kemarau. Baka nya meh orang ke bedosa lesap ari dunya orang ke idup.

²⁰Indah indai sida empu deh enda agi ingatka sida diatu. Sida diempa ulat, lalu dirusak baka kayu ti udah rebah.

²¹Utai nya nyadi laban sida merinsaka indu ke balu lalu enda ngayanka penelap ngagai sida indu ke nadai anak.

²²Ngena pengering Iya, Allah Taala ngerusak orang ke kering. Allah Taala bekereja, lalu orang ke jai mati.

²³Allah Taala tau nejuka sida idup likun, tang Iya seruran nengkilaka ulah sida.

²⁴Orang ke jai kaya enda lama, tang udah nya sida layu baka rumput, baka tangkai gandum ti udah ditetak.

²⁵Kati orang ulih ngumbai utai tu nadai udah nyadi? Kati orang ulih ngumbai aku bejaku bula?