Read Iban Jop 27 Bible Online

Jop 27 - Iban bible

Jop 27

¹Aku besumpah dalam nama Allah Taala ti Pemadu Bekuasa, ti idup, ke enggai meri aku atur ti lurus tang ngasuh pengidup aku balat tusah:

³seagi-agi Allah Taala meri aku seput,

⁴mulut aku enggai sekali-kali nyebut utai ti jai, dilah aku enggai sekali-kali madahka utai ti bula.

⁵Aku enggai sekali-kali ngumbai kita ngena. Aku deka majak ngumbai diri nadai penyalah nyentuk ngagai maya aku mati.

⁶Aku enggai sekali-kali badu ngumbai diri ngena. Aku endang nemu diri nadai udah ngereja utai ti salah.

⁷Awakka semua orang ke nyakal sereta ngelaban aku diukum baka orang ke jai enggau orang ke enda lurus.

⁸Nama utai ti diadang orang ke enda nangika Allah Taala, lebuh Allah Taala ngambi seput sida?

⁹Lebuh penusah datai, kati Allah Taala deka ningaka sabak sida?

¹⁰Sida patut udah keran deka bempu pengaga ti diberi Iya. Sida patut udah seruran besampi ngagai Iya.

¹¹Awakka aku ngajar kita pasal pemesai kuasa Allah Taala, lalu nerangka utai ti udah diperambu Allah Taala ti Pemadu Bekuasa.

¹²Tang enda ibuh, laban kita empu udah meda utai nya. Nya alai nama kebuah kita bejaku mapap munyi nya?

¹³[36]Tu jalai Allah Taala ti Pemadu Bekuasa ngukum orang ke jai, orang ke mangah.

¹⁴Sida nyangka mayuh anak lelaki, tang semua sida nya deka mati beperang. Bala anak sida seruran suntuk pemakai.

¹⁵Sida ke agi idup, deka mati laban penyakit. Indah balu sida deh enggai ngulitka pemati sida.

¹⁶Orang ke jai nyangka bisi pirak ti enda ulih itung sereta mayuh agi gari ari ti dipeguna orang,

¹⁷tang sekeda orang ke badas deka ngena gari nya lalu orang ke lurus ati, deka bulih pirak nya.

¹⁸Orang ke jai ngaga rumah baka pukat empelawa[37] tauka baka langkau ulun ke nyaga umai.

¹⁹Ba pengujung iya sida deka gali natka pengaya diri, lalu lebuh sida dani, sida deka nemu pengaya sida nyau nadai agi.

²⁰Utai ti balat ngenakut deka nuntung sida baka bah. Ribut ti muput malam hari deka ngebuka sida.

²¹Ribut ari timur deka ngebuka sida ari rumah sida.

²²Ribut nya deka ngebuka sida balat amat lebuh sida enggau naka ulih ngerarika diri.

²³Kabut nya nyau guntam-guntam mangkaka sida lebuh sida belanda, ngenakutka sida ngena kuasa iya ti tau ngerusak.