Read Iban Jop 28 Bible Online

Jop 28 - Iban bible

Jop 28

¹[38] Pirak endang diulihka ari lumbung pirak. Bisi mega endur alai nuchi emas.

²Besi dikali ari tanah lalu engkeraju dilelaka orang ari batu.

³Orang ngiga utai dalam lumbung ti pemadu petang. Sida ngiga di buntut dunya, lalu ngali batu dalam petang.

⁴Sida numbak lumbung jauh ari endur alai orang diau, jauh ari endur ti udah kala ditengah mensia. Dia meh endur alai sida gawa kediri-diri, betayun ngena tali dalam lumbung nya.

⁵Pemakai tumbuh ba tanah, tang di baruh tanah nya semua utai rumuh magang baka ke diempa api.

⁶Batu ti dalam tanah ngundan batu nilam, lalu amau batu nya ngundan emas.

⁷Menaul nadai nemu jalai tama ngagai lumbung nya, indah burung ti pemadu lansik deh enda kala meda lumbung nya.

⁸Nadai singa tauka jelu bukai ti mangah kala nengah jalai ti sunyi nya.

⁹Orang ngali batu ti pemadu kering, Ngali nyentuk ngagai buntut bukit.

¹⁰Lebuh sida nebuk lubang nengah batu, sida tetemuka batu ti berega.

¹¹Sida ngali[39] tanah nyentuk ngagai entigis ulu sungai lalu tetemuka utai ti enda kala dipeda.

¹² Tang dini alai kitai ulih tetemuka penemu-dalam? Dini alai kitai tau belajar ngambika kitai mereti?

¹³ Nadai mensia nemu jalai ngagai[40] penemu-dalam, lalu iya nadai ditemu di menua mensia.

¹⁴Tasik ti dalam enggau tasik ti mit Madahka penemu-dalam nadai dalam sida.

¹⁵Penemu-dalam enda ulih dibeli ngena pirak tauka emas.

¹⁶Emas ti pemadu tulin enggau batu ti pemadu berega enda ulih dibandingka enggau iya.

¹⁷Iya berega agi ari emas, lalu enda ulih disilih enggau emas ti tulin.

¹⁸Penemu-dalam lebih agi berega ari batu karang tauka batu kristal, tauka batu rubi.

¹⁹Batu jakut kuning ti pemadu manah, enggau emas ti pemadu tulin Enda ulih dibandingka enggau penemu-dalam.

²⁰Nya alai, ari ni penatai penemu-dalam? Dini alai kitai belajar ngambika kitai mereti?

²¹Nadai utai ti idup ulih meda iya. Indah burung ti terebai deh enda ulih meda iya.

²²Indah pemati enggau pengerusak deh madahka diri semina bisi udah ninga berita ngapa pasal iya.

²³ Semina Allah Taala aja nemu jalai ngagai endur penemu-dalam,

²⁴Laban Iya meda pengujung dunya, Meda semua utai di bap langit.

²⁵Lebuh Allah Taala meri kuasa ngagai ribut lalu ngeletak pemesai tasik,

²⁶lebuh Allah Taala ngeletak endur alai ai ujan labuh, enggau arus ti deka ditengah kilat enggau mua hari,

²⁷ nya baru Allah Taala meda penemu-dalam, nguji iya, lalu ngemendarka iya.

²⁸ Ku Allah Taala bejaku ngagai mensia, “Enti kita deka bepenemu-dalam, kita enda tau enda nangika TUHAN. Enti kita deka nemu reti utai, kita enda tau enda ngelengkaka penyai.”