Read Iban Jop 29 Bible Online

Jop 29 - Iban bible

Jop 29

¹Jop lalu belabuh bejaku baru.

²Naka meh pemanah enti pengidup aku ulih diulang baru baka lebuh maya Allah Taala ti ngibun aku.

³Lebuh maya nya suba Allah Taala endang seruran enggau aku lalu meri aku penampak lebuh aku bejalai nengah petang.

⁴Nya meh maya aku kaya-raja, lalu kaul aku enggau Allah Taala nyaga rumah aku.

⁵Allah Taala ti Pemadu Bekuasa bisi enggau aku lebuh maya nya suba, lalu aku dikelingi semua anak aku.

⁶Bala jelu sapi enggau kambin aku mansutka mayuh ai tusu, lalu aku bulih mayuh minyak kana ari pitan aku.

⁷Genap kali bala tuai nengeri baum lalu aku duduk enggau sida,

⁸bala orang ke biak meri awak jalai aku mansa lebuh sida meda aku, lalu orang ke tuai bediri masa aku.

⁹Bala tuai orang mayuh lalu ngetu bejaku.

¹⁰Indah orang ke pemadu tinggi pangkat, deh enda engkeretik.

¹¹Semua orang ke meda aku, tauka ninga pasal aku bela bejakuka pemanah utai ti udah dikereja aku.

¹²Lebuh orang ke seranta ngangau, aku nulung sida. Aku nulung orang ke nadai apai indai, ti nadai orang nulung.

¹³Orang ke pengabis merinsa idup, muji aku lalu aku nulung indu ke balu diau likun.

¹⁴Aku endang seruran ngereja utai ti lurus, sereta enda bepilih mata.

¹⁵Aku nyadi mata ke orang ke buta lalu nyadi kaki ke orang ke enda ulih bejalai.

¹⁶Aku udah nyadi apai ke orang ke seranta lalu setanah enggau orang kampar ke kena laban penusah.

¹⁷Aku ngerusak kuasa orang ke jai lalu ngelepaska orang ke diperinsaka sida.

¹⁸Aku endang seruran ngadang diri panjai umur lalu mati di rumah diri enggau nyamai.

¹⁹Aku tu baka kayu ti galak urat ti seruran chukup ai lalu dan seruran basah laban ambun.

²⁰Semua orang seruran muji aku, lalu pengering aku nadai kala ngelebuka aku.

²¹Lebuh aku meri jaku lalau, orang enda engkeretik lalu diau jenuh mendingka jaku aku,

²²lalu lebuh aku udah badu bejaku, sida nadai ibuh nambahka jaku ngagai utai ti disebut aku. Leka jaku aku ngenyamaika ati sida baka leka ujan.

²³Genap iku sida bela gaga ati nerima jaku aku, baka orang bumai ke gaga ati ke ai ujan lebuh musin bungai.

²⁴Aku tuchum ngagai sida, lebuh sida enda kempang. Mua aku ti lantang, meransang sida.

²⁵Aku nyadi tuai sida, lalu meri pemutus penemu. Aku nguluka sida baka raja ke nguluka bala soldadu iya, lalu ngelantangka sida, lebuh ati sida tusah.