Read Iban Jop 3 Bible Online

Jop 3 - Iban bible

Jop 3

¹ Nyau kelama udah nya, nya baru Jop bejaku, lalu nyumpah hari iya ada.

² O Allah Taala, sumpah meh hari aku ada. Sumpah mega malam aku dikandungka!

⁴Asuh hari nya nyadi petang, Allah Taala. Anang agi ngingatka hari nya. Anang agi nejuka penampak manchar ngagai iya.

⁵Asuh hari nya nyadi piam sereta petang enda dipeda achuk mata. Bungkur iya ngena mua hari, lalu lindung iya ari mata hari.

⁶Buai malam nya ari taun, Lalu anang ngitung iya agi.

⁷Asuh malam nya kusung, nadai pengaga.

⁸Asuh ti tau tepang nyumpah hari nya, Sida ke nemu merintah naga.[6]

⁹Anang ngasuh bintang bendang-bendang tumbuh pagi hari. Anang ngasuh malam meda penampak dini hari.

¹⁰Sumpah meh malam nya, laban iya udah nejuka aku ada, Udah ngasuh aku natka pemerinsa enggau penusah.

¹¹Manah agi enti aku mati dalam kandung indai aku Tauka mati lebuh aku baru ada.

¹²Nama kebuah indai aku mangku aku? Nama kebuah iya nusuka aku?

¹³Enti aku mati lebuh maya nya suba, aku tentu ulih diau jenuh belelak diatu,

¹⁴Tinduk baka raja enggau bala pemerintah Ke udah nirika baru istana ti lama.

¹⁵Nya baru aku ulih tinduk baka anak raja Ke ngisi rumah diri enggau perengka emas enggau pirak,

¹⁶Tauka tinduk baka anak mit ke mati lulus.

¹⁷Dalam kubur, orang ke jai badu agi ngereja pengawa ti jai, Lalu orang ke bekereja ulih belelak.

¹⁸Indah orang tutup deh nemu gaga ati diau dalam pemaik, Nadai agi ninga jaku perak tauka jaku pejal ti kasar.

¹⁹Semua orang bisi dia magang, orang ke tebilang nama enggau orang ke enda dikelala orang, Lalu ulun dilepaska ari tuan sida.

²⁰Nama kebuah nejuka orang majak idup merinsa? Nama kebuah meri penampak ngagai orang ke tusah ati?

²¹ Sida nganti pemati, tang pemati nadai datai. Sida rindu agi ke kubur ari ti rinduka pengaya.

²²Sida lantang ati enti sida mati, lalu dikuburka.

²³Allah Taala ngelalaika penunga sida ke jemah ila Lalu mempang sida.

²⁴Aku enda makai, tang ngulit, Lalu aku enda badu bedemuh.

²⁵Semua utai ti diketakutka aku, nyadi magang ba aku.

²⁶Aku nadai pemaik, nadai ulih belelak, Lalu penusah aku enda nemu abis.