Read Iban Jop 30 Bible Online

Jop 30 - Iban bible

Jop 30

¹Tang diatu, lelaki ke biak agi ari aku, beduan aku! Apai sida endang nadai guna, datai ke aku enggai ngasuh sida nulung ukui aku ngibun bedus.

²Sida nya orang ke nadai pengering agi, ke kelalu lembut tulang lalu enda ulih bekereja ke aku.

³Sida iya kelalu seranta sereta keberuran datai ke sida nyau bekunyahka urat ti rangkai ba tanah lebuh malam hari, di menua ti nadai orang nguan.

⁴Sida nyabut lalu makai sebarang utai ti tumbuh di menua puang. Indah urat utai ti enda nyamai, deh abis diempa sida!

⁵Semua orang manjung muru sida, baka ke muru penchuri.

⁶Sida diau dalam lubang gua, dalam lubang ti ba tingkah.

⁷Lebuh sida dalam utan, sida meraung munyi jelu lalu bekempit duduk di baruh pun kayu.

⁸Sida nya orang ke nadai guna! Sida udah dibuai ari menua tu.

⁹Diatu sida datai lalu ketawaka aku. Ba sida, aku tu nadai reti tang semina orang ke diketawaka sida.

¹⁰Sida nyau kejika aku. Sida ngumbai diri kelalu manah lalu enda patut begulai enggau aku, lalu ngeludah mua aku.

¹¹Laban Allah Taala udah ngasuh aku lemi sereta nadai daya agi, sida lalu ngelaban aku enggau naka pemalat.

¹²Bala orang ke jai tu lalu nyerang aku ari mua. Sida muru aku. Sida sedia deka nyerang aku lalu ngerusak aku.

¹³Sida mempang jalai aku rari, lalu ngerusak aku, lalu nadai orang nagang[41] sida.

¹⁴Sida beterudus tama nengah lubang ba dinding kuta aku lalu ninggang aku.

¹⁵Aku balat amat takut. Pangkat aku lenyau, baka ke dikesuhka ribut, lalu pengandal aku ke diri deka menang, lesap baka mua hari.

¹⁶Diatu aku nyau deka mati. Nadai utai ulih muai pemerinsa aku.

¹⁷Lebuh malam hari, semua tulang aku pedis magang. Tubuh aku enda badu pedis.

¹⁸Allah Taala ngeruntun rekung baju aku lalu mulaska gari aku nadai temu tunga.

¹⁹Iya ngempaska aku ngagai luchak, datai ke aku nyau baka tanah.

²⁰Aku ngangauka Nuan, O Allah Taala, tang Nuan nadai kala nyaut, lalu lebuh aku besampi, nuan enda mending.

²¹Nuan balat amat jai enggau aku. Nuan merinsaka aku ngena semua kuasa Nuan.

²²Nuan nejuka ribut ngebuka aku. Nuan ngelambungka aku ngena ribut biaubalai.

²³Aku nemu Nuan deka ngasuh aku mati, lalu muai aku ngagai endur ti endang udah digalau Nuan ke semua mensia.

²⁴Nama kebuah Nuan nyerang orang ke udah rusak, orang ke nadai daya agi, ke ngangau minta saup?[42]

²⁵Kati aku enda kala nyabak enggau orang ke ditinggang penusah lalu berasai sinu ati ke orang ke suntuk?

²⁶Aku ngadang diri tau bulih pengelantang enggau penampak, tang penusah enggau pemetang datai.

²⁷Ati aku balat tusah laban pengirau enggau pemedis. Aku merinsa tiap hari.

²⁸Aku bejalai dalam petang, nadai dipanchar mata hari. Aku bediri di mua orang mayuh, minta saup orang.

²⁹Aku nyabak seilu-ilu tusah ati munyi nyawa pasun tauka burung unta.

³⁰Kulit aku nyau bebali chelum. Tubuh aku nyau angat laban penyakit.

³¹Dulu menya aku ninga munyi musik ti ngasuh ati gaga, tang diatu aku semina ninga munyi orang ke ngulit enggau nyabak.