Read Iban Jop 31 Bible Online

Jop 31 - Iban bible

Jop 31

¹Aku udah besumpah madahka diri enggai merening ngagai indu enggau ati ti kanji.

²Nama utai ti dikereja Allah Taala ti Pemadu Bekuasa ngagai kitai? Baka ni ku jalai Iya malas utai ti dikereja mensia?

³Iya ngasuh penusah ti besai enggau pengerusak ninggang orang ke ngereja penyalah.

⁴Allah Taala nemu semua utai ti dikereja aku. Iya meda semua singkang aku.

⁵Aku besumpah madahka diri nadai kala ngereja penyai lalu nadai kala nipu orang.

⁶Awakka Allah Taala nimbang aku ngena dachin ti betul, nya baru Iya deka nemu aku endang nadai penyalah.

⁷Enti aku udah limpang ari jalai ti ngena tauka nejuka diri tetengukka penyai, enti jari aku udah kamah laban dosa,

⁸awakka utai ti ditanam aku dirusak magang, tauka awakka orang bukai makai pemakai ti ditanam aku.

⁹Enti aku udah kala inginka bini orang, lalu ngipa iya ba mua pintu iya,

¹⁰awakka bini aku manduk pemakai ke lelaki bukai lalu tinduk ba peninduk lelaki bukai.

¹¹Penyai ti baka nya patut diukum ngena pemati.

¹²Utai nya baka api ti ngerusak, ti datai ari neraka, ti nganguska semua utai ti dikemisi aku.

¹³Lebuh orang gaji aku mutap ngelaban aku, aku mending lalu aku manah enggau sida.

¹⁴Enti aku enda, baka ni ku aku ulih bediri di mua Allah Taala ila? Nama utai ti deka disebut aku lebuh Allah Taala datai ngakim aku?

¹⁵Allah Taala ngaga aku lalu Iya mega ngaga orang gaji aku.

¹⁶ Aku nadai kala enggai nyaup orang ke seranta. Nadai aku kala nejuka indu ke balu diau tusah ati

¹⁷tauka nejuka anak mit ti nadai apai indai lapar, lebuh aku makai.

¹⁸Seumur idup, aku udah ngibun sida.[43]

¹⁹Lebuh aku tetemuka orang ke suntuk, ke kelalu seranta lalu enda ulih meli gari ke diri empu,

²⁰aku meri iya gari ti digaga ari bulu bedus ari raban bedus aku empu. Nya baru iya deka muji aku enggau pengabis ati iya.

²¹Enti aku udah nipu anak mit ti nadai apai indai, ketegal aku nemu diri deka menang enti aku bechara dalam kot,

²²awakka lengan aku dipatahka. Awakka lengan aku diputuska ari bau aku.

²³Aku nangika ukum Allah Taala, nya kebuah aku enda ulih ngereja utai ti baka nya.

²⁴ Aku nadai kala manggaika diri ba pengaya

²⁵tauka temegahka pengaya aku.

²⁶Aku nadai kala nyembah mata hari ti manchar terang tauka bulan ti manah gaya.

²⁷Aku nadai kala dibai tesat lalu ngemesaika sida besiumka jari diri ketegal bebasaka sida.

²⁸Dosa ti baka nya patut diukum ngena pemati, laban iya besangkalka Allah Taala ti Pemadu Bekuasa.

²⁹Aku nadai kala gaga ati lebuh munsuh aku merinsa, tauka lantang ati lebuh sida dituntung penusah.

³⁰Aku nadai kala bedosa besampi minta sida mati.

³¹Semua orang ke bekereja ke aku nemu aku endang seruran ngelaluka temuai ngagai rumah aku.

³²Aku ngelaluka temuai tama ngagai rumah aku lalu aku enda kala nejuka sida tinduk ba jalai raya.

³³Orang bukai nguji ngelalaika dosa diri, tang aku nadai kala ngelalaika dosa aku.

³⁴Aku nadai kala nangika jaku orang. Aku nadai kala enda bemunyi, tauka diau di rumah, ketegal takutka diri dikeleseka sida.

³⁵Kati orang nadai deka mendingka utai ti disebut aku? Aku besumpah, semua utai ti disebut aku endang amat magang. Awakka Allah Taala ti Pemadu Bekuasa nyaut aku. Enti dawa ti dikena munsuh aku besalahka aku dituliska magang ngambika aku ulih meda dawa nya,

³⁶aku deka ngelekatka dawa nya ba bau aku lalu ngengkahka dawa nya nyadika makota ba pala aku.

³⁷Aku deka madahka ngagai Allah Taala semua utai ti udah dikereja aku lalu enda malu bediri di mua Iya.

³⁸Enti aku udah ngenchuri tanah ti dipumai aku lalu udah ngerampas tanah nya ari orang,

³⁹lalu enti aku udah bisi makai utai ti tumbuh ba tanah nya tang nejuka orang ke nanam utai nya, lapar

⁴⁰awakka umai aku tumbuh rumput enggau lalang lalu enda tumbuh gandum enggau barli. Baka nya ku pengujung jaku Jop.