Read Iban Jop 32 Bible Online

Jop 32 - Iban bible

Jop 32

¹Sida tiga lalu badu agi nyaut Jop, laban iya majak madahka diri nadai ngereja penyalah.

²Tang siku orang ke bediri semak dia, ke benama Elihu, nyau enda ulih natka diri agi pedis ati, laban Jop beluruska diri empu lalu besalah Allah Taala. (Elihu nya anak Barakel, peturun Bus, ari raban peturun Ram.)

³Iya mega pedis ati ngagai pangan Jop ke tiga iku nya, laban sida nadai nemu jalai nyaut Jop, ti ngujungka Allah Taala baka ke salah.

⁴Elihu nya orang ke pengabis biak ke semua sida. Nya alai iya nejuka semua sida ke tuai bejaku dulu.

⁵Lebuh iya meda sida tiga nya enda ulih nyaut Jop, iya pedis ati

⁶lalu belabuh bejaku. Aku tu biak, lalu kita tuai. Nya kebuah aku enda berani mantaika runding diri ngagai kita,

⁷laban dalam runding aku, kita patut bejaku dulu, lalu kita ke tuai patut bekunsika penemu-dalam ti dikembuan kita.

⁸Tang iya ti bendar, Roh Allah Taala ti Pemadu Bekuasa ke meri penemu-dalam ngagai kitai.

⁹Ukai penuai umur kitai ti ngasuh kitai bepenemu-dalam tauka nemu utai ti ngena.

¹⁰Nya alai aku diatu minta kita mendingka aku madahka runding diri ngagai kita.

¹¹Aku udah liat ati mendingka kita bejaku lalu nganti kita begigaka jaku ti menyana agi.

¹²Aku udah diau diri mendingka kita, lalu ninga kita alah penemu. Nadai siku kita ulih madahka jaku Jop salah.

¹³Baka ni ku kita tau ngumbai diri udah tetemuka penemu-dalam? Allah Taala enda tau enda nyaut Jop, laban kita enda tesautka iya.

¹⁴Jop bejaku ngagai kita, ukai ngagai aku, tang aku sigi enggai sekali-kali nyaut ngena chara kita.

¹⁵Jop, sida udah alah jaku laban nuan, enda tesautka nuan.

¹⁶Kati aku patut majak nganti baru aku tau bejaku? Sida enda bemunyi, bediri tegir-tegir, enda nemu utai ti patut disebut diri agi.

¹⁷Aku deka nyaut nuan diatu lalu madahka runding aku ngagai nuan.

¹⁸Aku enda ulih natka diri enda bejaku. Aku enda ulih nagang diri bejaku.

¹⁹Enti aku nadai peluang bejaku, aku deka meletup baka kambut wain ti penuh laban wain ti baru.

²⁰Aku enda ulih natka diri agi. Aku enda tau enda bejaku.

²¹Aku ukai ngarika sapa-sapa dalam randau tu, lalu aku pen enda mega muji sapa-sapa,

²²laban aku enda nemu chara muji orang, lalu Allah Taala deka ngukum aku enggau ngenyit, enti aku muji sapa-sapa.