Read Iban Jop 33 Bible Online

Jop 33 - Iban bible

Jop 33

¹Nya alai, Jop, pendingka enggau manah semua utai ti deka disebut aku.

²Aku diatu udah sediaka mantaika runding diri.

³Semua jaku aku tu endang datai ari ati aku empu, lalu aku nyebut utai ti bendar.

⁴Roh Allah Taala udah ngaga aku lalu ngasuh aku idup.

⁵Saut aku, enti nuan ulih. Sediaka penemu nuan.

⁶Ba mata Allah Taala, tua tu sebaka. Tua tu sama ditempa ari tanah.

⁷Nya alai nuan nadai kebuah takutka aku. Aku ukai deka ngalahka nuan.

⁸Tu jaku nuan ti udah didinga aku:

⁹“Aku enda salah. Aku nadai udah ngereja penyalah. Aku nadai penyalah, lalu aku enda bedosa.

¹⁰Tang Allah Taala begigaka tegal kena Iya ngelaban aku lalu ngaga aku baka munsuh.

¹¹ Iya nanchang kaki aku ngena rantai. Iya nengkilaka semua utai ti dikereja aku.”

¹²Tang, aku madahka ngagai nuan, Jop, nuan salah. Allah Taala bekuasa agi ari mensia.

¹³Nama kebuah nuan besalah Allah Taala ngumbai Iya nadai kala nyaut jaku putap kitai?

¹⁴Taja pen Allah Taala enda ngetu bejaku, nadai orang mendingka utai ti disebut Iya.

¹⁵ Lebuh orang tinduk malam hari, Allah Taala bejaku dalam mimpi enggau genera.

¹⁶Iya ngasuh sida mendingka utai ti disebut Iya, lalu sida takut ninga jaku tangkan Iya.

¹⁷Allah Taala bejaku ngasuh sida badu agi bedosa lalu nagang sida ngenyumbungka diri.

¹⁸Iya enggai nejuka sida dirusak. Iya ngelepaska sida ari kuasa pemati.

¹⁹Allah Taala nganu kitai ngena penyakit lalu ngisi tubuh kitai enggau pemedis.

²⁰Orang ke sakit enggai makai. Indah pemakai ti pemadu manah deh ngasuh sida mutah.

²¹Tubuh sida mansang kurus-sekurus. Semua tulang sida ayan magang.

²²Sida baru deka mansang ngagai dunya pemati.

²³Nyangka ukur melikat bisi deka datai nyaup sida, siku ari beribu-ribu iku melikat Allah Taala, ke ngasuh kitai ingatka pengawa kitai.

²⁴Enggau ati ti kasih melikat nya bejaku, “Lepaska sida! Sida enda tau nurun ngagai dunya pemati. Tu tebus kena ngelepaska sida.”

²⁵Tubuh sida deka mansang biak sereta kering baru.

²⁶Lebuh sida besampi, Allah Taala deka nyaut. Sida deka nyembah Allah Taala enggau ati ti gaga. Allah Taala deka ngaga utai ngena baru ke sida.

²⁷Genap iku sida deka bejaku di mua orang mayuh, “Aku udah bedosa. Aku nadai ngereja utai ti ngena, tang Allah Taala udah ngampun aku.

²⁸Iya udah nagang aku mansang ngagai dunya pemati, lalu aku mengkang idup.”

²⁹Allah Taala endang seruran ngereja semua utai nya,

³⁰lalu ngidupka nyawa orang lalu ngasuh orang nya gaga idup.

³¹Jop, diatu pendingka utai ti disebut aku. Anang bemunyi, lalu awakka aku bejaku.

³²Tang enti nuan bisi utai ti deka disebut nuan, awakka aku ningaka utai nya. Aku deka gaga ati ngumbai nuan ngena.

³³Tang enti nuan nadai utai disebut, anang bemunyi, lalu pendingka aku, ngambika aku ngajar nuan jalai nyadi orang ke bepenemu-dalam.