Read Iban Jop 34 Bible Online

Jop 34 - Iban bible

Jop 34

¹Udah nya Elihu lalu bejaku:

²“Dingaka jaku aku, kita ke bepenemu-dalam, lalu singitka pending kita ngagai aku, kita ke nemu utai.

³Peratika jaku aku baka nyawa ke meratika penyamai utai ti dipakai.

⁴Awakka kitai milih utai ti ngena. Awakka kitai meri pemutus penemu pasal bagi utai ti manah.

⁵Jop ngumbai diri nadai penyalah, lalu ngumbai Allah Taala enggai meri iya atur ti lurus.

⁶Ku Jop nanya, ‘Baka ni ku aku ulih bula lalu ngumbai diri salah? Aku nyau deka mati laban bakal, tang aku enda bedosa.’

⁷“Kati kita udah kala meda orang ke baka Jop ti nadai kala nangika Allah Taala.

⁸Iya rindu begulai enggau orang ke jai lalu segau-segau bejalai enggau orang ke bedosa.

⁹Ku Jop, ‘nadai guna kitai nguji nitihka peneka Allah Taala.’ ”

¹⁰“Pendingka aku, kita ke mereti! Kati Allah Taala ti Pemadu Bekuasa deka ngereja utai ti salah?

¹¹ Iya ngupah orang nitihka utai ti dikereja sida lalu ngukum sida enggau pematut.

¹²Allah Taala ti Pemadu Bekuasa enda ngereja penyai, lalu Iya enda kala meri atur ti enda lurus.

¹³Sapa meri Allah Taala kuasa merintah dunya? Sapa ngengkahka dunya tu ba jari Iya?

¹⁴Enti Allah Taala ngambi seput pengidup ari kitai, lalu ngambi seput nya pulai baru ngagai Iya Empu,

¹⁵semua mensia deka mati magang lalu pulai nyadi amau baru.

¹⁶“Pendingka aku diatu, enti kita amat bepenemu-dalam.

¹⁷Kati orang ke begedika atur ti lurus, ulih megai perintah? Kati kita besalah Allah Taala ti lurus sereta bekuasa,

¹⁸ke bejaku ngagai raja, ‘Nuan tu nadai guna,’ lalu bejaku ngagai orang ke tinggi pangkat, ‘Nuan tu orang ke jai’;

¹⁹lalu enda ngemesaika orang ke kaya lebih agi ari orang ke seranta? Laban semua sida iya digaga Iya magang.

²⁰Enda lama da agi sida deka mati; Ba urung tengah malam sida digusak lalu mati, lalu orang ke bekuasa ukai dibunuh mensia.

²¹“Laban Allah Taala nengkilaka semua ulah kitai, lalu meda semua singkang kitai.

²²Nadai pemetang ulih ngelalaika orang ke bedosa ari Allah Taala.

²³Laban Allah Taala enda ibuh ngeletak maya kitai mupuk lalu diakim ulih Iya.

²⁴Iya enda ibuh mansik orang ke bekuasa sebedau Iya nganchurka sida, lalu ngeletak orang bukai nganti sida

²⁵Laban Iya nemu utai ti dikereja sida, nya alai Iya muai lalu ngeredakka sida lebuh malam hari.

²⁶Iya nyamah sida di mua orang mayuh ketegal penyai ti dikereja sida,

²⁷laban sida enggai agi nitihka Iya lalu enda bedulika pesan Iya.

²⁸Ketegal sida, orang ke seranta nyabak ngangauka Allah Taala, lalu Iya ningaka kangau sida ke kena perinsa.

²⁹Lebuh Allah Taala enda ngereja utai, sapa ulih mantah Iya? Lebuh Iya ngelalaika mua Iya, sapa ulih meda Iya, nemuka nya bansa tauka orang?

³⁰Ngambika orang ke enda nangika Allah Taala, tauka orang ke nipu orang mayuh enda megai perintah.

³¹“Jop, kati nuan udah ngaku dosa nuan di mua Allah Taala lalu besemaya enda agi bedosa?

³²Kati nuan bisi udah minta Allah Taala ngayanka penyalah nuan, lalu nuan besemaya enggai agi ngereja penyai?

³³Laban nuan nulak utai ti dikereja Allah Taala, kati nuan patut ngarapka Iya deka ngereja utai ti dikinginka nuan? Laban nuan empu ke patut milih, ukai aku; nya alai sebut utai ti ditemu nuan.

³⁴Orang ke mereti deka nyebut ngagai aku, lalu orang ke bepenemu-dalam ke ninga aku deka nyebut,

³⁵‘Jop bejaku laban iya enda nemu utai lalu semua utai ti disebut iya sigi nadai reti magang.’

³⁶Manah amat enti Jop diuji enggau penuh, laban iya nyaut munyi orang ke jai.

³⁷Laban iya angkat ngelaban Allah Taala kena iya nambahka dosa diri. Iya betempap jari di mua semua kitai, lalu ngeleseka Allah Taala.”