Read Iban Jop 35 Bible Online

Jop 35 - Iban bible

Jop 35

¹Jop, nuan enda patut ngumbai diri enda salah di mua Allah Taala.

³Enti nuan nanya, ‘Baka ni ku dosa aku tau ngawa Nuan? Nama untung aku, enti aku enda bedosa?’

⁴Aku deka nyaut nuan, enggau bala pangan nuan.

⁵Peda nuan langit! Peda nuan mua hari ti tinggi agi ari nuan!

⁶ Enti nuan bedosa ngelaban Iya, nama utai ulih nuan ari nya? Enti nuan ngereja mayuh macham penyalah, nama utai ti dikereja nuan ngagai Iya?

⁷Enti nuan lurus, nama utai ti diberi nuan ngagai Iya? Nama utai ti diterima Iya ari jari nuan?

⁸Orang bukai nyau merinsa laban dosa nuan, lalu pengelurus nuan ulih mai penguntung ngagai orang bukai.

⁹Lebuh orang kena tekan, sida bedemuh. Sida nyabak minta orang ngelepaska sida.

¹⁰Tang sida enda nguing ngagai Allah Taala, ke ngaga sida, ke meri sida pengering lebuh malam hari,

¹¹ke ngajar sida lebih agi ari ke ngajar jelu di dunya tu, lalu ngasuh sida lebih agi pintar ari burung.

¹²Sida nyabak minta tulung, tang Allah Taala enda nyaut, laban sida sumbung sereta jai.

¹³Nadai guna sida ngangau. Allah Taala ti Pemadu Bekuasa enda meda tauka ninga sida.

¹⁴Jop, nuan madahka diri enda ulih meda Allah Taala. Tang nuan patut nganti enggau ati ti liat. Pekara nuan bisi di mua Iya.

¹⁵Nuan ngumbai Allah Taala enda ngukum, ngumbai Iya enda tentu ibuhka dosa.

¹⁶Nadai guna nuan majak bejaku. Nuan endang nyata enda nemu utai ti disebut diri.