Read Iban Jop 36 Bible Online

Jop 36 - Iban bible

Jop 36

¹Anang enda liat ati, lalu pendingka lama agi utai ti disebut aku ngarika Allah Taala.

³Penemu aku luas. Ngena utai ti ditemu aku, aku deka mandangka pengelurus Allah Taala ti udah ngaga aku.

⁴Utai ti disebut aku ngagai nuan nadai bula siti. Orang ke di mua nuan nya orang ke amat bepenemu-dalam.

⁵Allah Taala endang amat bekuasa, lalu Iya enda ngeleseka orang; Iya nemu semua utai.

⁶Iya enda nejuka orang ke bedosa majak idup, lalu Iya meri atur ti lurus ngagai orang ke kena perinsa.

⁷Iya nyaga orang ke lurus. Iya ngemendarka sida merintah baka raja lalu nejuka sida dibasa belama iya.

⁸Lalu enti sida ditanchang ngena rantai, lalu kena perinsa ketegal utai ti udah dikereja sida,

⁹Allah Taala deka madahka ngagai sida utai ti udah dikereja sida enggau penyalah sida, ti nunjukka sida udah ngenyumbungka diri.

¹⁰Iya ngasuh sida mendingka jaku ajar Iya, lalu ngasuh sida ngelengkaka penyai.

¹¹Enti sida mending lalu betuaika Iya, sida deka bulih pengaya seumur idup, sereta nyamai diau.

¹²Tang enti sida enda mendingka Iya, sida deka dipantap ngena pedang, lalu mati mengkang nadai nemu utai.

¹³Orang ke enda arapka Allah Taala majak ringat; sida enda besampi minta tulung lebuh Iya nanchang sida.

¹⁴Sida mati biak, nabanka ati ti malu.

¹⁵Tang Allah Taala ngajar orang ngena pemerinsa lalu muka mata sida ngena penusah.

¹⁶Allah Taala udah mai nuan pansut ari penusah ngagai endur ti luas ti nadai utai nekul, lalu pemakai ti pemadu manah ditugungka ba mija nuan.

¹⁷Tang diatu nuan benung diukum nitihka pematut.

¹⁸Bejimat nuan, enggai ke nuan kena tipu lalu makai suap, tauka pengaya nuan mai nuan limpang.

¹⁹Nadai guna nuan ngangau minta tulung. Semua pengering nuan enda ulih nulung nuan diatu.

²⁰Anang ngajihka malam datai alai semua bansa deka mati.

²¹Bejimat nuan, enggai ke nuan nguingka diri ngagai penyai. Pemerinsa nuan endang diasuh datai kena nagang nuan ari penyai.

²²Kingatka pemesai kuasa Allah Taala. Iya pengajar ti pemadu besai.

²³Nadai orang ulih madahka ngagai Allah Taala utai ti patut dikereja Iya tauka ngumbai Iya udah ngereja penyai.

²⁴Iya endang seruran dipuji ketegal utai ti dikereja Iya. Nuan empu pen enda tau enda mega muji Iya.

²⁵Semua mensia udah meda utai ti udah dikereja Iya, tang kitai semina ulih ninjau ari jauh.[44]

²⁶Kitai enda ulih nemu enggau silik pasal pemesai kuasa Iya tauka ngitung umur Iya.

²⁷Allah Taala ngambi ai ari dalam tanah lalu ngaga ai nya nyadi leka ujan.

²⁸Iya ngasuh ujan labuh ari mua hari ti bekeberai ninggang semua mensia.

²⁹Nadai orang nemu jalai mua hari mindah tauka jalai guntur meletup di langit, ti alai Allah Taala diau.

³⁰Iya ngasuh kilat nyelar di langit, tang buntut tasik mengkang petang.

³¹Nya meh chara Iya nupi[45] mensia lalu meri pemakai ti mayuh.

³²Iya nangkap kilat ngena jari Iya lalu ngasuh kilat nya mangka ba endur ti udah diletak.

³³Guntur madahka hari deka kabut lalu jelu sapi nemu kabut nya deka datai.