Read Iban Jop 37 Bible Online

Jop 37 - Iban bible

Jop 37

¹Kabut ngasuh tungkul ati aku ketap-ketap.

²Pendingka ulih semua kita, munyi nyawa Allah Taala, munyi guntur ti pansut ari nyawa Iya.

³Iya ngasuh kilat nyelar di langit, ari ujung dunya siti ngagai ujung siti.

⁴Nya baru auh nyawa Iya didinga, munyi guru guntur ti manah didinga, sekumbang kilat ti nyelar.

⁵Lebuh Allah Taala bejaku, utai lalu nyadi, utai ti badas, ti enda ditemu kitai reti.

⁶Iya ngasuh seleju labuh ke tanah, lalu ngasuh ujan bangat.

⁷Iya ngasuh kitai badu gawa. Iya mandangka ngagai kitai utai ti ulih dikereja Iya.[46]

⁸Jelu babas pulai ngagai lubang sida.

⁹Ribut biaubalai datai ari selatan, lalu ribut ti udu chelap datai ari utara.

¹⁰Kesuh seput Allah Taala ngasuh ai meku, lalu ngasuh sida bebali nyadi ais.

¹¹Kilat nyelar ari mua hari,[47]

¹²nitihka peneka Allah Taala. Sida ngereja semua utai ti diasuh Allah Taala, di semua endur, di serata dunya.

¹³Allah Taala ngasuh ujan ngemasahka tanah. Nyangka Iya ngukum kitai ngena ai ujan, tauka mandangka pengerindu Iya ke kitai.

¹⁴Ngetu enda lama, Jop, lalu pendingka aku. Peratika utai ti badas ti dikereja Allah Taala.

¹⁵Kati nuan nemu jalai Allah Taala meri pesan Iya lalu ngasuh kilat nyelar ari mua hari?

¹⁶Kati nuan nemu jalai mua hari ulih melepung di langit, pengawa ti dikereja Allah Taala ngena pengelandik Iya?

¹⁷Nuan enda nemu. Nuan semina merinsa natka pengangat lebuh ribut muput ari selatan.

¹⁸Kati nuan ulih nulung Allah Taala mintarka langit lalu ngasuh langit nya kering baka besi ti dipugar?

¹⁹Ajar kami utai ti patut disebut kami ngagai Allah Taala. Kami nadai penemu, nadai utai disebut.

²⁰Aku enggai minta diri bejaku enggau Allah Taala. Nama kebuah aku meri Iya peluang ngerusak aku?

²¹Diatu penampak di langit nyau manchar terang, kelalu tampak lalu enda ulih diperening kitai, lalu langit udah beresi laban iya dipuputka ribut.

²²Panchar ti be-emas emas bisi dipeda di utara, lalu mulia Allah Taala ngasuh kitai nangi.

²³Kuasa Allah Taala endang besai, datai ke kitai enda ulih datai semak ngagai Iya. Iya endang lurus sereta betul dalam semua pengawa Iya enggau kitai.

²⁴Nya alai, semua orang endang patut nangika Iya. Iya enggai ibuhka orang ke ngumbai diri bepenemu-dalam.