Read Iban Jop 38 Bible Online

Jop 38 - Iban bible

Jop 38

¹Udah nya TUHAN lalu bejaku ngagai Jop ari biaubalai nya.

²“Sapa nuan nya ti berani betanyaka penemu-dalam ari Aku, ngena jaku ti beli sereta kusung?

³Bediri terit lalu saut tanya Aku.

⁴Kati nuan bisi dia lebuh Aku ngaga dunya? Enti nuan amat mayuh penemu, padahka nya ngagai Aku.

⁵Sapa ngeletak pemesai dunya? Sapa nerantingka tali kena nyukat pemesai dunya? Kati nuan nemu semua saut ke semua tanya nya?

⁶Nama utai ti ngasuh tungkat dunya bediri? Sapa nudukka batu pemun dunya?

⁷ Pagi nya, semua bintang belagu sama sereta, lalu bala orang serega[48] manjung gaga ati.

⁸ Sapa nikupka pintu kena nagang ai tasik masuk[49] lebuh ai nya pansut ari pusat dunya?

⁹Aku tu ke mungkur tasik ngena mua hari lalu mungkus iya ngena pemetang.

¹⁰Aku tu ke ngeletak garis entara darat enggau tasik lalu nagang ai tasik tama nengah pintu ti bekalang.

¹¹Ku Aku bejaku enggau ai tasik, ‘Naka tu aja! Anang ngelui tu! Gelumbang nuan ti balat enda tau ngalun ngelui tu.’

¹²Jop, kati nuan, dalam sepemanjai umur nuan, bisi udah kala ngasuh hari siang?

¹³Kati nuan udah kala ngasuh merekah pajar merintah dunya lalu ngusak orang ke jai pansut ari endur alai sida ke belalai?

¹⁴Penampak mata hari ngasuh bukit enggau lebak ayan nyata baka lepi kain, nyengala baka chop ti ditekanka ba tanah liat.

¹⁵Penampak siang hari kelalu terang ke orang ke jai lalu nagang sida ngayanka pemangah sida.

¹⁶Kati nuan bisi udah kala bejalai ngagai mata ai ti ba buntut tasik? Kati nuan udah kala bejalai nengah buntut tasik?

¹⁷Kati orang bisi udah kala mandangka ngagai nuan pintu ti nyaga dunya pemati ti petang?

¹⁸Kati nuan nemu pemesai dunya? Padahka ngagai Aku, enti nuan nemu semua utai nya.

¹⁹Kati nuan nemu asal penatai penampak tauka asal penatai pemetang?

²⁰Kati nuan ulih madahka ikas entara pemetang enggau penampak, tauka ngasuh seduai iya pulai baru lebuh seduai iya udah datai?

²¹Aku nemu nuan ulih ngereja nya, laban nuan tuai amat umur lalu nuan endang bisi dia lebuh dunya digaga!

²²Kati nuan udah kala tama ngagai bilik setor, endur alai Aku ke naruh seleju enggau ujan batu?

²³Aku naruh sida nyendiaka maya penusah nyadi maya orang beperang.

²⁴Kati nuan udah kala bejalai ngagai endur alai mata hari pansut, tauka ngagai endur alai penatai ribut ti muput ari timur?

²⁵Sapa ke numbak parit ke ujan ti lebat lalu ngelasi jalai keguntur enggau kilat?

²⁶Sapa ngasuh ai ujan labuh ba endur ti nadai mensia?

²⁷Sapa meri ai ngagai menua ti rangkai, sereta aus, lalu ngasuh rumput tumbuh?

²⁸Kati ujan tauka ambun bisi apai?

²⁹Sapa indai ais enggau batu seleju,

³⁰ti ngasuh ai bebali nyadi batu lalu ngasuh ai tasik meku?

³¹ Kati nuan ulih ngerempungka bintang tujuh tauka muka tanchang bintang banyak?

³²Kati nuan ulih ngatur pejalai bintang ari musin siti ngagai musin siti lalu ngatur pejalai bintang tiga enggau bintang tujuh?

³³Kati nuan nemu adat ti merintah langit. Kati nuan ulih neritka adat nya ngagai dunya?

³⁴Kati nuan ulih manjung merintah mua hari lalu ngasuh sida manjah nuan ngena ujan?

³⁵Lalu enti nuan ngasuh kilat nyelar, kati iya deka datai ngagai nuan, lalu bejaku, ‘Tu aku, tuan’?

³⁶Sapa madahka ngagai burung ibis[50] tauka madahka ngagai manuk sabung hari deka ujan?

³⁷Sapa chukup bepenemu-dalam lalu ulih ngitung mua hari? Sapa ulih nyingitka mua hari ngambika sida mansutka ujan,

³⁸ujan ti ngasuh amau betekang?

³⁹Kati nuan ngiga pemakai ke singa, ngambika anak singa kenyang

⁴⁰lebuh sida belalai dalam lubang sida tauka gali ngipa ba alai sida ke belalai?

⁴¹Sapa nupi burung kak lebuh sida terebai segau-segau lapar, lebuh anak sida nyabak minta pemakai ngagai Aku?