Read Iban Jop 39 Bible Online

Jop 39 - Iban bible

Jop 39

¹Kati nuan nemu maya kambin bukit ada? Kati nuan kala nengkilaka rusa beranak?

²Kati nuan nemu pengelama sida ngandung? Kati nuan nemu maya anak sida patut ada?

³Kati nuan nemu maya sida deka ningkap lalu beranak?

⁴Anak sida mansang kering-sekering dalam babas. Sida angkat, lalu enda pulai agi.

⁵Sapa udah ngelepaska keledai kampung? Sapa muka tanchang sida lalu ngasuh sida mawa?

⁶Aku meri sida menua puang alai sida diau, lalu nejuka sida diau ba emperan garam.

⁷Sida diau jauh ari nengeri ti inggar, lalu nadai orang ulih bejinakka sida, lalu ngena sida ngereja pengawa.

⁸Padang rumput ba bukit nyadi endur alai sida ngulam, alai sida ngiga rumput.

⁹Kati sapi ti siga deka bekereja ke nuan? Kati iya deka bemalam ba bansal jelu tupi nuan?

¹⁰Kati nuan ulih nanchang sapi nya ngena tali, lalu mejalka iya ngeradu tanah? Tauka mejalka iya narit pengeradu tanah ba umai nuan?

¹¹Kati nuan ulih ngarapka pengering iya, lalu ngarapka iya ngereja pengawa ti berat ke nuan?

¹²Kati nuan ngarapka iya ngetau umai nuan lalu mai gandum nuan ngagai endur alai nungku?

¹³Naka meh penyampat kebap sayap burung unta! Tang burung unta enda ulih terebai baka burung bangau.[51]

¹⁴Burung unta ninggalka telu iya ba tanah ngambika telu nya angat laban pengangat tanah.

¹⁵Iya enda nemu telu nya tau kena indik lalu redak tauka jelu babas mechahka sida.

¹⁶Burung unta nya baka ke ngumbai telu nya ukai telu iya lalu enda irauka diri deka lebu ngapa betelu.

¹⁷Aku Empu ti udah ngasuh iya beli lalu enda meri iya penemu-dalam.

¹⁸Tang lebuh iya belabuh belanda,[52] iya laju agi ari kuda enggau orang ke nepan kuda nya.

¹⁹Kati nuan, Jop, bisi udah ngasuh kuda kering lalu meri sida bulu ti panjai melulur rekung sida?

²⁰Kati nuan bisi udah ngasuh sida merejuk baka buntak lalu ngasuh orang takut ninga munyi kesuh idung sida?

²¹Sida ransing ngerumbak tanah ba lebak. Sida belanda mansang beperang enggau pengabis pengering sida.

²²Sida enda nemu reti takut, lalu pedang enda ulih ngasuh sida nikal.

²³Senyata ti dibai orang ke nepan sida begetar inggar sereta bekilap dipanchar mata hari.

²⁴Kuda betegitik isi ransing, lalu belanda mansang ke mua. Lebuh terumpit disepu, sida enda ulih diau jenuh.

²⁵Genap kali terumpit nya disepu, sida inggar ngesuhka seput. Sida nemu ngembau perang sebedau sida datai semak lalu sida ninga bala pemesai merakka nyawa meri atur.

²⁶Kati burung menaul bisi belajar ari nuan chara terebai lebuh iya ngerembaika sayap iya lalu nuju ke selatan?

²⁷Kati burung menaul nganti atur ari nuan sebedau iya ngaga tansang ba tuchung bukit?

²⁸Iya ngaga tansang ba tuchung bukit ti bebatu lalu ngaga tuchung ti tajam nya nyadika kuta iya.

²⁹Ari nya iya ninjau utai ti semak enggau ti jauh ngintaika utai ti tau dibunuh lalu diempa iya.

³⁰ Menaul begempuru ngelingi bangkai lalu anak menaul ngirup darah.