Read Iban Jop 4 Bible Online

Jop 4 - Iban bible

Jop 4

¹Jop, aku ngarapka nuan enda ringat ninga aku bejaku. Aku enda ulih natka diri enda bejaku.

³Mayuh orang udah diajar nuan Lalu nuan udah ngeringka jari ti lemi.

⁴Lebuh orang tesangkut, lembut tulang sereta lelak, Jaku nuan meransang orang nya bediri.

⁵Diatu tu meh maya nuan empu deka ditinggang penusah, Lalu nuan deka temati-kutu napi penusah nya.

⁶Nuan udah nyembah Allah Taala, lalu pengidup nuan nadai jalai mantah. Nya alai nuan patut kempang ati sereta andal.

⁷Uji kingatka utai ti udah, lalu sebut siti pekara Alai orang ke lurus udah dituntung penusah.

⁸Aku bisi udah meda orang ngeradu tanah penyai Lalu nanam penyai baka ke nanam leka utai. Diatu sida ngetau penyai enggau penyalah.

⁹Allah Taala ringat lalu ngerusak sida baka kabut.

¹⁰Orang ke jai bejaku munyi singa ti negung, Tang Allah Taala ngasuh sida badu agi bemunyi lalu matahka ngeli sida.

¹¹Sida mati baka singa ti nadai utai dipakai, Lalu semua anak sida pambar pendiau magang.

¹²Nyadi sekali siti pesan datai enda inggar, Datai ke aku nyau deka enda ulih ninga iya.

¹³ Iya ngachau aku tinduk lalu ngasuh aku ngigau.

¹⁴Aku getar-getar sereta digak-digak. Semua tubuh aku getar-getar takut.

¹⁵Ribut ti enda deras muput ngagai mua aku, Bulu aku lalu nyeregu laban aku takut.

¹⁶Aku bisi meda utai bediri dia. Aku bebendar amat merening, tang aku enda ngelala utai nya. Udah nya aku lalu ninga munyi nyawa bejaku ari utai ti sunyi nya:

¹⁷“Kati mensia ulih diau lurus di mua[7] Allah Taala Tauka diau tuchi di mua[8] Allah Taala ti ngaga iya?

¹⁸Allah Taala enda arapka bala nembiak Iya ke di serega. Indah bala melikat Iya deh dikumbai Iya bisi penyalah.

¹⁹Kati nuan ngumbai Iya deka arapka utai ti ditempa ari tanah liat, Utai ti datai ari amau ti ulih dipichit baka indu buyah?

²⁰Kitai nyangka idup lebuh pagi hari, Tang kitai mati enda ditemu orang sebedau lemai hari.

²¹Semua utai ti dikemisi kitai dirampas magang. Kitai mati, mengkang enda bepenemu-dalam.”