Read Iban Jop 40 Bible Online

Jop 40 - Iban bible

Jop 40

¹Jop, nuan udah nyakap Allah Taala ti Pemadu Bekuasa. Kati nuan diatu deka ngalahka diri, tauka nyaut?

³“Aku udah bejaku mapap, TUHAN. Baka ni ku jalai aku nyaut? Aku nadai nemu utai disebut agi.

⁵Aku udah nyebut lebih ari ti patut.”

⁶Udah nya TUHAN lalu bejaku baru ngagai Jop ari kabut biaubalai.

⁷“Bediri rurus lalu saut tanya Aku.

⁸Kati nuan nguji ngumbai Aku enda lurus? Kati nuan deka besalah Aku, lalu ngumbai nuan empu ngena?

⁹Kati nuan kering baka Aku? Kati nyawa nuan inggar munyi guntur baka nyawa Aku?

¹⁰Enti pia, begari nuan lalu bediri ngena pangkat, basa, enggau mulia nuan.

¹¹Bantaika pengeringat nuan, lalu peda enti nuan ulih ngasuh orang ke sumbung nya baruh ati.

¹²Peda sida ke sumbung nya, lalu alahka sida; Redakka sida ke jai nya ba endur alai sida ke bediri.

¹³Tumbakka sida dalam tanah. Tanchang sida di dunya pemati.

¹⁴Nya baru Aku deka ngumbai nuan menang ngena pengering nuan empu.

¹⁵Peda nuan Behemot.[53] Aku udah ngaga iya, lalu Aku udah mega ngaga nuan. Iya makai rumput baka sapi,

¹⁶tang peda nuan pengering dalam tubuh iya, enggau kuasa dalam gumpal isi iya!

¹⁷Iku iya bediri chegit-chegit baka kayu sidar, lalu gumpal isi dalam kaki iya amat kering.

¹⁸Tulang iya kering baka temaga, lalu kaki iya baka lumpung besi.

¹⁹Iya tu utai ti pemadu ngasuh ati iran ari semua utai ti idup ti digaga Aku! Semina Aku ti ngaga iya ulih ngalahka iya.

²⁰Rumput ti dikena nupi iya tumbuh ba bukit alai jelu babas bemain.[54]

²¹Iya gali di baruh madang duri, lalu belalai ba madang purun ti tumbuh ba paya.

²²Lalu iya belindung di baruh madang duri enggau madang kayu willow ti tumbuh ba tebing sungai.

²³Iya enda takutka ai sungai ti deras. Iya enda irau ati lebuh ai Sungai Jordan mangka mua iya.

²⁴Sapa ulih ngasuh iya buta, lalu nangkap iya? Tauka, sapa ulih nyintak junggur iya ngena panjuk?