Read Iban Jop 41 Bible Online

Jop 41 - Iban bible

Jop 41

¹ “Kati nuan ulih ngulihka naga[55] ngena ginti tauka nanchang dilah iya ngena tali?

²Kati nuan ulih nanchangka tali ba junggur iya tauka ngaitka ginti ba rang iya?

³Kati iya deka minta nuan ngelepaska iya? Kati iya deka minta nuan kasihka iya?

⁴Kati iya deka ngaga sempekat enggau nuan lalu besemaya deka betuaika nuan belama iya?

⁵Kati nuan deka nambat iya baka ke nambat burung ayam kena ngelantangka ati sida indu ke digaji nuan?

⁶Kati orang berikan deka betawarka rega iya? Kati orang dagang deka ngelampang lalu nyual iya?

⁷Kati nuan ulih ngebuska kulit iya ngena berayang tauka ngebuska pala iya ngena pendawan?

⁸Tegu iya sekali, lalu nuan enggai agi negu iya. Nuan deka seruran ingatka diri ti udah belaban enggau iya!

⁹Barang sapa meda naga deka takut lalu rebah.

¹⁰Lebuh iya dikachau, iya mangah. Nadai orang berani bediri di mua iya.

¹¹Sapa ulih nyerang iya lalu enda bebadi? Nadai orang di serata dunya tu ulih ngereja nya.[56]

¹²Awakka aku nusui ngagai nuan pasal kaki naga nya lalu madahka pemesai enggau pengering iya.

¹³Nadai orang ulih nyarikka baju iya tauka ngebuska baju kebal iya.

¹⁴Sapa ulih mejalka iya nukangka rang ti penuh laban ngeli ti balat ngenakut?

¹⁵Belakang[57] iya digaga ari rintai terabai ti bejantil enggau pangan diri, lalu kering baka batu.

¹⁶Terabai nya bejantil rapit enggau pangan diri datai ke angin enda ulih tama.

¹⁷Semua terabai nya bejantil rapit amat datai ke nadai utai ulih ningkilka sida ari pangan diri.

¹⁸Lebuh iya engkasi, penampak lalu bekilat, lalu mata iya mirah chinang-chinang baka mata hari ti tumbuh pagi hari.

¹⁹Daun api nyelar ari nyawa iya lalu perechi api pansut.

²⁰Ari idung iya pansut asap, baka asap ti pansut ari rumput ti diempa api di baruh periuk.

²¹Kesuh seput iya ngasuh api menyadi. Daun api nyelar ari nyawa iya.

²²Rekung iya kering datai ke semua orang ke betemu enggau iya bela takut magang.

²³Indah perengka tubuh iya ti pemadu lemi deh kering baka besi.

²⁴Ati iya baka batu, enda nemu takut, enda lembut tang kering baka batu kisar.

²⁵Lebuh iya angkat, indah utai ti pemadu kering[58] deh takut. Sida nadai daya laban takut.

²⁶Nadai pedang ulih nelihka iya nadai sangkuh, tauka laja tauka lunju, ulih ngemediska iya.

²⁷Ba iya, besi lemi baka rumput ti rangkai, lalu temaga, baka kayu ti repuk.

²⁸Nadai panah ulih ngasuh iya rari. Batu ti ditikau ngagai iya baka rumput ti rangkai.

²⁹Ba iya, pemalu baka rumput ti rangkai, lalu iya ketawa lebuh orang numbukka sangkuh ngagai iya.

³⁰Tisik perut iya tajam baka kerimpak periuk. Tisik nya ngeraus tanah ti luchak baka pengeradu tanah.

³¹Lebuh iya nyelam ke dalam tasik ai melidih baka minyak ti melidih dalam periuk,

³²lalu ai ti udah ditengah iya nyau begenyeling bepupu burak.

³³Nadai utai di dunya tu sebaka enggau iya. Iya enda nemu takut.

³⁴Iya nyadi raja ke semua jelu ti sumbung lalu iya ngira jelu bukai nadai guna magang.