Read Iban Jop 42 Bible Online

Jop 42 - Iban bible

Jop 42

¹Udah nya Jop lalu nyaut TUHAN.

²“TUHAN, Aku nemu Nuan endang bekuasa ari atas semua, lalu Nuan ulih ngereja semua utai ti dikedekaka Nuan.

³ Nuan nanyaka kebuah aku kakang ati ke penemu-dalam Nuan taja pen aku nadai nemu utai. Aku bejakuka pasal utai ti enda ditemu aku, pasal utai ti nyelai ti enda ulih ditemu aku.

⁴ Nuan udah ngasuh aku mendingka Nuan lebuh Nuan bejaku lalu ngasuh aku nguji nyaut tanya Nuan.

⁵Dulu menya, aku semina nemu utai ti dipadahka orang ngagai aku, tang diatu aku udah meda Nuan ngena mata aku empu.

⁶Nya alai aku malu ke semua utai ti udah disebut aku lalu aku nesal ati lalu ngerabu diri enggau amau enggau abus.

⁷Lebuh TUHAN udah tembu bejaku ngagai Jop, Iya lalu bejaku ngagai Elipas, “Aku ringat ngagai nuan, enggau ngagai pangan seduai ke dua iku nya, laban nuan enda nyebut utai ti bendar pasal Aku, baka nembiak Aku Jop.

⁸Nya alai bai diatu tujuh iku sapi ti lelaki, enggau tujuh iku bedus ti lelaki, ngagai Jop, lalu beri utai nya nyadika piring ke nuan empu. Jop deka besampika nuan, lalu Aku deka nyaut sampi iya, lalu enda ngukum nuan nitihka pemeli nuan. Nuan enda baka iya laban Nuan enda nyebut utai ti bendar pasal Aku.”

⁹Elipas, Bildat, enggau Sopar lalu ngereja utai ti diasuh TUHAN, lalu TUHAN nyaut sampi Jop.

¹⁰ Udah nya, lebuh Jop udah besampika pangan iya ke tiga iku nya, TUHAN lalu merekatka iya nyadi kaya-raja baru, lalu meri iya dua kali lipat mayuh agi utai ari ti dikemisi iya sebedau nya.

¹¹Semua sida menyadi lelaki enggau menyadi indu Jop, enggau semua pangan iya ke dulu suba, bela datai nemuai ngagai iya, lalu ngintu pengerami makai besai enggau iya ba rumah iya. Sida madahka penyinu ati sida ngagai iya, lalu merindang iya, ketegal semua penusah ti udah diasuh TUHAN ninggang iya. Genap iku sida bela meri iya sesingkap duit, enggau siti tinchin emas.

¹²TUHAN merekatka pengidup Jop lebuh iya nyau tuai, lebih agi ari ti terubah. Jop bisi empat belas ribu iku jelu bedus, enam ribu iku unta, dua ribu iku jelu sapi, enggau seribu iku keledai.

¹³Iya bisi tujuh iku anak lelaki enggau tiga iku anak indu.

¹⁴Iya meri nama Jemimah ngagai anak indu iya ke tuai, iya ti kedua Kesiah, lalu iya ke pemadu biak Keren-hapuk.

¹⁵Nadai indu di serata dunya tu ti bajik agi ari anak indu Jop. Apai sida meri sida ungkup ari pesaka iya, sebaka enggau ungkup ti diberi iya ngagai sida menyadi lelaki sida.

¹⁶Udah bekau nya, Jop idup seratus empat puluh taun, lalu meda bala uchu enggau bala ichit diri.

¹⁷Iya mati lebuh umur iya nyau tuai amat.