Read Iban Jop 5 Bible Online

Jop 5 - Iban bible

Jop 5

¹Jop, uji nuan ngangau; kati orang bisi nyaut? Kati melikat bisi alai nuan ngadap?

²Munuh diri ngena pengeringat nya utai ti beli, ti nadai reti.

³Aku bisi udah kala meda orang ke beli, ti baka ke likun pendiau, Tang tekala nya aku nyumpah rumah ti alai sida diau.

⁴Bala anak sida nadai agi pengelikun. Nadai orang deka angkat bejaku ngarika sida dalam kot.

⁵Orang ke lapar deka bepakaika utai ti ditanam orang ke beli nya Nyengkaum gandum ti tumbuh ba madang duri Lalu orang ke aus deka ngining pengaya orang ke beli nya.

⁶Penyai ukai tumbuh ba tanah, Lalu penusah pen ukai mega pansut ari tanah.

⁷Ukai! Kitai empu ke ngasuh diri ditinggang penusah, Baka murun api ti terebai ke langit.

⁸Enti aku baka nuan, aku tentu deka nguing ngagai Allah Taala Lalu mantaika pekara aku di mua Iya.

⁹ Kitai enda ulih meretika pemesai pengawa Allah Taala, Lalu kereja ajih Iya endang enda nemu abis.

¹⁰Iya ngasuh hari ujan Lalu manjah tanah.

¹¹Sigi amat! Allah Taala ngangkatka orang ke baruh ati Lalu ngelantangka ati semua orang ke ngulit.

¹² Iya ngemuntanka pelan orang ke pintar, Lalu manjuk orang ke bepenemu-dalam ngena akal sida empu, Ngambika pengawa sida puntan.

¹⁴Indah lebuh tengah hari deh sida besagam dalam petang.

¹⁵Tang Allah Taala ngelepaska orang ke seranta[9] ari kuasa pemati. Iya ngelepaska orang ke seranta ari kena tekan.

¹⁶Iya meri pengandal ngagai orang ke seranta lalu ngasuh orang ke jai badu agi bemunyi.

¹⁷ Beberekat meh orang ke diajar Allah Taala! Anang ngenggai lebuh TUHAN ti Pemadu Bekuasa[10] disiplin nuan.

¹⁸ Allah Taala ngemakal, lalu Iya mega malut bakal nya. Jari Iya ngemedis, lalu jari Iya mega ngerai.

¹⁹Iya deka seruran ngelepaska nuan ari utai ti tau ngemedis.

²⁰Lebuh maya lapar pungkang, Iya deka nebus nuan ari pemati, Lalu lebuh maya perang, Iya deka nebus nuan ari kuasa pedang.

²¹Allah Taala deka ngelepaska nuan ari jaku petenah orang. Iya deka ngidupka nuan lebuh pengerusak nuntung.

²²Nuan deka ketawaka pengerusak enggau lapar pungkang Lalu enda takutka jelu babas.

²³Tanah umai ti dichangkul nuan, enda bebatu. Jelu babas enda nerekam nuan.

²⁴Nuan deka diau likun dalam langkau kain nuan. Lebuh nuan meresa raban bedus nuan, nuan deka nemu sida likun.

²⁵Bala anak nuan Deka mayuh baka daun rumput ti ba padang.

²⁶Baka gandum ti mansau nyentuk ngagai maya iya patut diketau, Baka nya meh nuan deka gayu-guru gerai nyamai.

²⁷Jop, kami udah nemu utai tu laban kami lama udah belajarka iya. Utai tu amat, nya alai terima iya.